Merzimi ótken júrgizýshi kýáligine ótinishti úıden shyqpastan berýge bolady

«Elektrondyq úkimet» portalynda júrgizýshi kýálikterin berý boıynsha kórsetiletin qyzmet jetildirildi, dep habarlady «Ulttyq aqparattyq tehnologııalar» aksıonerlik qoǵamynyń baspasóz qyzmeti.

Endi kýáliktiń merzimi ótse, qujat joǵalǵan nemese urlanǵan kezde, qujat ıesiniń tegi, aty jáne ákesiniń aty ózgergen jaǵdaıda ótinishti onlaın berýge múmkindik týdy.

Qyzmetti jeke tulǵalar paıdalana alady.

– Biz turaqty jáne táýlik boıy monıtorıng júrgizip, keri baılanys jasaımyz. Azamattardan kelip túsetin barlyq usynystar jeke keıs retinde qaralady jáne pysyqtalady. Bul sondaı-aq onlaın rejıminde kórsetiletin memlekettik qyzmetterdi alý prosesin jaqsartýǵa jáne jeńildetýge yqpal etedi, – dedi  «UAT» AQ Basqarma tóraǵasy Áset Turysov.

Qyzmetti qoldaný úshin eGov.kz portalyna kirip, «Kólik jáne kommýnıkasııa», «Avtomobıl kóligi», «Júrgizýshi kýálikterin berý» túımelerin basý kerek. Budan ári avtorızasııa jasap, «Kórsetiletin qyzmetke onlaın tapsyrys berý» batyrmasy boıynsha ótý qajet. Barlyq mindetti jolaqtar toltyrylǵan soń, fotosýret jáne qol qoıý úlgisi júktelýge tıis. Artynsha 1,25 AEK mólsherinde tólem jamsap, ESQ kómegimen qyzmetke qol qoıý kerek.

«Tegin, atyn jáne ákesiniń atyn ózgertý» jolyn tańdaǵan kezde tegin, atyn, ákesiniń atyn aýystyrǵany týraly kýálikti júkteý qajet bolady. Qujattyń merzimi ótken bolsa, 083-Ý medısınalyq anyqtamasyn, joǵalǵan nemese urlanǵan jaǵdaıda aýdandyq polısııa basqarmasynan anyqtama tirkeý qajet.