Qazaqstanda taǵy bir adam koronavırýstan qaıtys boldy

Qazaqstanda koronavırýs boıynsha 10 sáýirdegi epıdemıologııalyq jaǵdaıǵa sáıkes indet juqtyrǵan 21 adam tirkeldi. Almaty qalasynda koronavırýs indetinen bir naýqas kóz jumdy.

Búgingi kúnge deıin koronavırýstyń 802 jaǵdaıy tirkelgen. 60 adam aýrýdan aıyǵyp shyqsa, 9 adam indetten kóz jumdy.

Almatyda qaıtys bolǵan naýqas 1956 jyly dúnıege kelgen. Pasıent baılanysta bolǵandar qatarynan, onyń oń taldaýy 16 naýryzda anyqtaldy.

Qosymsha aýrýlar, atap aıtqanda ókpeniń sozylmaly obstrýktıvti aýrýlary, júrektiń sozylmaly jetkiliksizdigi men júrektiń ıshemııalyq aýrýlary, stenokardııasy, arterııalyq gıpertenzııasy boıynsha naýqas 18 naýryzda reanımasııa jáne qarqyndy terapııa bólimshesine ornalastyrylǵan. 

Júrgizilgen qarqyndy terapııaǵa qaramastan, jaǵdaı polıorgandyq jetkiliksizdiktiń saldarynan nasharlady.

9 sáýirde qosymsha aýrýlarynyń údeýi kúsheıip, qan aınalymy toqtady. 30 mınýt boıy júrgizilgen reanımasııalyq is-sharalar sátsiz bolyp, naýqasty qutqarý múmkin bolmady.

Negizgi dıagnozy: COVID-19 koronavırýstyq ınfeksııasy, rastalǵan jaǵdaı. Eki jaqty polısegmentti pnevmonııa, aýyr aǵymy. Eki jaqty plevrıt. О́kpeniń isinýi, Laıella sındromy.