Almaty qalasy ákimdiginiń baspasóz ortalyǵynda ótken onlaın-brıfıngte Almaty qalalyq Turǵyn úı basqarmasynyń basshysy Erjan Seıtenov dezınfeksııalaý jumystarynyń barysy týraly aıtty.

Qazirgi tańda aınalany, qoǵamdyq oryndardy zalalsyzdandyrý jumystary jedel qolǵa alý boıynsha birneshe mekemeniń basyn biriktirgen úsh top júıeli túrde jumys isteýde.

– Almaty áskerı garnızonynyń qyzmetkerleri barshaǵa ortaq qoldanystaǵy oryndardy bekitilgen kestege sáıkes kún saıyn eki aýdannan dezınfeksııalap otyrady. Seısenbi jáne senbi kúnderi indet oshaqtary, aýrýhanalar men emhanalar, shıpajaılar, azyq-túlik bazarlary dezınfeksııalanady. Búgingi kúni bul jumystarǵa 635 adam, 48 búrikkish, 14 birlik tehnıka jumyldyryldy. Al "Almaty Tazalyq" jáne aýdan ákimdikteriniń merdiger uıymdary kún saıyn aıaldamalarǵa, qoqys jáshikterine, oryndyqtarǵa, jerústi jáne jerasty ótkelderine, sondaı-aq azyq-túlik dúkenderi men dárihanalardyń kireberisterine dezınfeksııa jasaıdy, – dedi E. Seıtenov.

Spıkerdiń sózine júginsek, búgingi kúni joldardy, trotýarlardy, jaıaý júrginshiler aımaqtaryn, ortaq paıdalanylatyn oryndardy jýý jáne dezınfeksııalaý boıynsha jumystarǵa 102 sýarý-jýý mashınasy, 48 trotýarlardy tazalaıtyn mashına, 734 jol jumysshysy jáne 156 dezınfektor jumyldyrylǵan.

Budan basqa, konteınerler ornalasqan alańdarǵa da kúnde zalalsyzdandyrý jumystary júrgizilýde. Ol úshin 85 adam tartylǵan.

– Turǵyn úı saıasaty basqarmasynyń merdiger uıymdary da aptasyna 2 ret kóppáterli úılerdiń kireberisteri men aýla aýmaqtaryn dezınfeksııalap otyrady. Jeksenbiden basqa kúnderi, kún saıyn kóppáterli turǵyn úılerdi óńdeýge quramynda 525-ke jýyq dezınfeksııalaýshy adamy bar 70 brıgada jumyldyrylǵan. Búginge deıin árbir kireberis pen aýla 3 ret zalalsyzdandyryldy. Erteń dezınfeksııalyq jumystardyń 4-kezeńi aıaqtalady, – dedi spıker.

Spıkerdiń málimdeýinshe, dezınfeksııalyq quraldar barlyq jerde ázirge jetkilikti. Zalalsyzdandyrý jumystaryna qoldanylyp jatqan dezınfeksııalyq eritindilerdiń adam jáne janýarlar ómirine eshqandaı zııany joq.

Almaty qalalyq Turǵyn úı basqarmasynyń basshysy E. Seıtenov turǵyndar tarapynan keı jerlerde dezınfeksııa jasalmaıtyndyǵy, jasalǵan kúnde de sapasyz bolatyndyǵy týraly shaǵymdar túskeni týraly da atap ótti. Sondaı talap-tilekter eskerilip, BAQ-ta, qalalyq jáne aýdandyq ákimdikterdiń áleýmettik jelileriniń akkaýnttarynda ár aýdan boıynsha kóppáterli turǵyn úılerge dezınfeksııa júrgizýge jaýapty tulǵalardyń baılanys nómirleri ornalastyrylǵandyǵyn da tilge tıek etti.

Sondaı-aq, +77010382525 nómiri boıynsha WhatsApp jelisi jumys isteıdi. Oǵan kez kelgen turǵyn zalalsyzdandyrý jumystarynyń sapasyzdyǵyn nemese múldem dezınfeksııa jasalmaǵandyǵyn dáleldeıtin beıne jáne foto materıaldaryn jibere alady.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir