Koronavırýstan qorǵanýdyń eń basty amaly maska taǵý emes – professor

Medısınalyq maskany taǵý aýrýǵa shaldyqqan adam men dárigerge ǵana kerek. Bul týraly koronavırýstyq ınfeksııanyń ákelinýi men taralýynyń aldyn alý maqsatynda ótken brıfıngte aıtyldy, dep habarlaıdy QazAqparat.

– DDSU jáne koronavırýs boıynsha jumys isteıtin uıymdar bul derten qorǵanýdyń eń basty amaly maska taǵý emes ekenin aıtady. Sebebi bul aýada ushyp juǵatyn aýrý emes. Eń bastysy – jeke bas gıgıenasyn durys saqtaý kerek, – deıdi Balalar juqpaly aýrýlar kafedrasynyń meńgerýshisi, professor Dınagúl Baeshova.

Onyń aıtýynsha, medısınalyq maska aýrý adam túshkirgen kezde silekeıin shashpaýy úshin jáne naýqastarmen jumys isteıtin medısınalyq qyzmetkerlerge kerek.

– Bul jaǵdaıda qasyńda turǵan adamnan ózińdi kem degende eki metr alys ustaýyń kerek. Eger aýyrǵan adamǵa óte jaqyn tursańyz, sizdi medısınalyq maska qutqarmaıdy. Ony koronavırýs ınfeksııasyn aldyn alý úshin qoldanýǵa bolady. Ońtústik Koreıada dúkende kezekte turǵan adamdar medısınalyq maska taqqanymen, bir-birine óte jaqyn ornalasqan. О́zderińiz kórip otyrǵandaı, sonyń saldarynan aýyrǵandar sany kúrt ósip keledi. Vırýs jaqyn baılanys bolǵan kezde juǵajy. Jasandy dúrligý jaǵdaıyn týdyrýdyń qajeti joq, – deıdi ol.

Sondaı-aq, professor koronavırýstan saqtaný joldaryn aıtty.

– Koronavırýs 60-70 ystyq temperatýra jaǵdaıynda birden ólip qalady, sol sebepti shıki azyq-túlik tutynbańyzdar. Aldymen ystyq sýmen jýyp alý kerek. Qoldy jıi jýý qajet, – deıdi ol.