IIM Dýlat Aǵadildiń ólimine qatysty resmı málimdeme jasady

Ishki ister mınıtrligi belsendi Dýlat Aǵadildiń ólimine qatysty búgin saǵat 17.00-de Nur-Sultan qalasynda brıfıng ótkizip resmı málimdeme jasady. 

Ishki ister mınıstriniń orynbasary Arystanǵalı Zapparovtyń aıtýynsha, Dýlat Aǵadil polısııa qyzmetkerleri úıinen alyp ketetin kezde mas kúıinde bolǵan.  

– 24 aqpanda keshki saǵat 21 shamasynda Aqmola oblysy Selınograd aýdandyq polısııa bóliminiń qyzmetkerleri sot qaýlysyn oryndaý maqsatynda Talapker eldi mekeninde turatyn 1977 jyly týǵan Dýlat Aǵadildi Aqmol aýylynyń emhanasyna jetkizgen. Sol jerde tártip boıynsha saraptama ótkizildi.Saraptama nátıjesi azamat Aǵadildiń qan quramynda alkogol bar ekenin anyqtady. Dene jaraqatynyń bar-joqtyǵyna kóz jetkizý úshin Nur-Sultan qalasy sot saraptamasyna jetkizildi. Jaraqaty joq degen qorytyndy shyqty. Túngi 12-ge taman qylmystyq atqarý júıesiniń 166-1 mekemesine jetkizildi. Kameraǵa jabar aldynda densaýlyǵyna baılanysty eshqandaı aryz-shaǵym túspegen. Kamerada odan basqa tórt adam boldy. Tańǵy saǵat 6-da tamaǵyn ishken. 7-de dárethanaǵa ketedi. Odan shyǵysymen tizerlep otyryp, esinen tanyp qulap qalǵan. Kameradaǵylar Aǵadildiń densaýlyǵynyń nasharlaǵany týraly baqylaýshyǵa habarlaıdy. Ol alǵashqy medısınalyq járdem shaqyrady. Kelgen jedel járdem Aqádildiń kóz jumǵanyn tirkeıdi. Teksergen kezde denesinen zorlyq-zombylyq belgileri anyqtalmady. Búginde oǵan júrek qan-tamyrlarynyń jetispeýshiligi dıagnozy qoıylyp otyr. Beınekamera onyń uıyqtap almaı, mazasyndanyp júrgenin kórsetti, – dedi Zapparov.

Belsendi Dýlat Aǵadildiń qaıtys bolǵany búgin saǵat kúndizgi 12.00 shamasynda belgili boldy. Aǵadildiń qazasynan keıin eldiń birneshe qalasynda belsendiler jınalyp, bılikten Aǵadil qazasynyń aq-qarasyn aıtýdy talap etti. Nur-Sultanda Ishki ister mınıstrligi ǵımartatyna barǵan belsendilerdi polısııa kúshpen alyp ketti.

Dýlat Aǵadil áleýmettik problemalar jáne azamattyq quqyqty saqtaý máselesin kóterip júrgen. Ol ótken jyly birneshe márte ákimshilik jazaǵa tartylyp, keminde 60 táýlik qamaýda otyrǵan. 

43 jastaǵy belsendi qarashanyń ortasynda ákimshilik qamaýda otyrǵan Selınograd aýdandyq tergeý ızolıatorynan qashyp ketken edi. Keıin ol áreketiniń sebebin "zańsyz qýdalaýǵa qarsylyǵym" dep túsindirgen. Polısııa eki kún boıy izdegen belsendi 15 qarashada ózi bas prokýratýra aldyna kelgen. Keıin ol "sot qaýlysyn oryndamaǵany úshin" taǵy 6 táýlikke sottalǵan edi.