"Bul – anasynyń tragedııasy". Abaev Aısultan Nazarbaev týraly aıtty (vıdeo)

Qazaqstan aqparat jáne qoǵamdyq damý mınıstri Dáýren Abaev eldiń eks-prezıdenti Nursultan Nazarbaevtyń jıeni, parlament senatynyń qazirgi spıkeri Darıǵa Nazarbaevanyń uly Aısultan Nazarbaevtyń áleýmettik jelide jazǵandaryna qatysty pikir bildirdi.

Habar aranasyndaǵy "Otkrytyı dıalog" baǵdarlamasynda Abaev Aısultan Nazarbaevtyń birazdan beri "psıhıkalyq aýrýmen aýyryp júrgenin" aıtty. Onyń sózinshe, Aısultan Nazarbaev aıtqan aqparattar shyndyqqa janaspaıdy. 

"Bul másele boıynsha aǵaıynǵa aıtqym keledi. Qazir jalpy bizdiń qoǵamda ǵana emes, álem boıynsha da ótirik pen shyn aqparatty ajyratý – úlken másele bolyp tur. Keıbir toptar jalǵan aqparat taratyp, úlken kompanııalardyń, jeke adamdardyń, tipti bútin bir eldiń abyroıyna nuqsan keltirip júrgenin kórip júrmiz. Biraq munyń artynda jymysqy oı, paıda kórý nıeti turady jáne mundaı mysaldar sońǵy ýaqytta bizdiń elde de kóbeıip keledi. Munyń sońy arandap qalýǵa ákelýi múmkin. Aısultanǵa qatysty da osyny aıtqym keledi. Bul – birinshi kezekte onyń anasynyń tragedııasy. Ana úshin balasynan asqan qandaı qymbat nárse bolýy múmkin? Keıbireýler osy oqıǵaǵa elbasyn da aralastyrǵysy keledi. Shý jasap, eldi dúrliktirýge tyrysady. Biraq halyqtyń baǵyna týǵan jaqsymyzdy qańqý sózge qalaı qııamyz? О́zińiz oılańyzshy, ekonomıkasy quldyraǵan, joq bop ketken, óndirisi toqtaǵan eldi 30 jylda qazirgideı deńgeıge kóterý kimniń qolynan keledi? Qazaq qashanda el úshin týǵan erlerdi baǵalaǵan, tóbesine kótergen, abyroıyn saqtaǵan. Babalar aıtqandaı, "Betege ketse – bel qalar, berekeń ketse – neń qalar?". Aǵaıyn, sondyqtan berekemizdi baǵalaıyq. Jel sózge erip jaqsy isti joqqa shyǵarmaıyq, – dedi Abaev.