Ishki ister mınıstrligi shetelden ákelingen kólikterden qalaı qutylýǵa bolatyn aıtty

Ishki ister mınıstriniń birinshi orynbasary Marat Qojaev Armenııa men Qyrǵyzstannan ákelingen róli oń jaqtaǵy jáne eskirip qalǵan kólikterden qalaı qutylýǵa bolatynyn aıtyp berdi, dep jazady Qamshy.kz aqparat agenttigi. Bul týraly ol Ortalyq kommýnıkasııalar qyzmetinde ótken baspasóz máslıhatynda málimdedi.

Qojaevtyń sózinshe, ondaı kólikterden qutylýdyń birneshe joly bar.  

– Qazirgi tańda zańmen bekitilgen tehnıkalyq reglamentterdi aınalyp ótetin amal joq. Bul - róli oń jaqtaǵy kólikterge qatysty másele. Bul ereje kerek deseńiz, 2008 jyly qabyldanyp qoıǵan. Ony Qazaqstan azamattarynyń bári biledi. Al endi ne isteý kerek degenge kelsek, joq degende shyǵynnyń bir bóligin óndirip alýdyń ártúrli joly bar. Ondaı kólikterge tehnıkalyq reglament ruqsat beretin elderge ótkizýge bolady. Avtokólikti qosalqy bólshek túrinde satýǵa da jol ashyq. Kólik ákelingen elge qaıta aparyp, onyń sapasy men kedendik tólemderi týraly jalǵan aqparat bergen adamǵa qarsy sot shaǵymyn túsirýge bolady. Bul jerde jaǵdaı ár túrli. Ár jaǵdaıdy jeke taldap, adamdarǵa soǵan sáıkes áreket algorıtmin usynyp jatyrmyz, – dedi  Qojaev. 

Qańtar aıynyń ortasynda ishki ister mınıstrligi Qazaqstan aýmaǵynda júrgenine bir jyl bolǵan, biraq esepke turmaǵan shetelden ákelingen kólik ıelerine eskertý jasap, zańdy tirkeýge qoıýǵa shaqyrǵan. Osydan keıin Aqtaý, Aqtóbe, Jańaózen, Oral, Semeı, Petropavl, Qyzylorda  qalalarynda tirkelmegen kólik ıeleri jınalyp, narazylyqqa shyqqan. Olar Qazaqstanǵa ákelgen kólikti tirkeý tym qymbat ekenin aıtady. Bılik tirkelmegen kólikter zań buzsa, jaýapkershilikten jaltarady dep esepteıdi.