Svetqalı Nurjan: "Bizdiń Otan – aryn satqan nan tappaı, arýlardyń yshqyrynda bylǵanǵan!"

Eki OTAN

Sizden maǵan esh paıda joq, eı, aǵa!
Aspanym bar, zárý emen saıańa.
Jylap keldim, jylap ótem ómirden –
Aqsyn qanym!
Shyqsyn janym!
Aıama!

Aıamaısyń!
Aıamasyn bilgenmin,
Sen Esikti teýip ashyp kirgen kún.
Tesiginen kijingenmen Túrmemniń,
Jortqan Baqqa ere almaıdy
Úrgen Muń.

Kár qylar dep men de yǵa alman,
aı, taqsyr!
Endi mende jaı qalǵan joq taıqaqsyr.
Ataqtaryn art jalaýmen shyǵarǵan,
Kóp járeýke jasaı bersin aıtaqshyl!

Qyzarmaýǵa úırengesin bet eptep,
Er basyna shatyr bolǵan etek kóp.
Eńbegińiz tóte sińgen, júre ber
Tekesingen aq shybyshty jetektep.

Ánshiń – árli.
Zańshyń – zárli.
Aqyn – shat.
Aı-haı, zaman, tursyz taqqa taqym sap.
Siz ursasyz – kúńirensek, ah ursaq,
Biz sııaqty bolmaısyń, – dep, – satymsaq.

Tek sizdiki – ordamyz ben qordamyz,
Tek sizdiki – dorbamyz ben jorǵamyz.
Sizben birge shyǵa almaımyz jolǵa biz,
Eliń – erý!
Eleńdeýshi bolmańyz.

Bı ornyna kil jelǵaýyz boldy abyz,
Júregimde – órt,
kózimde – kúl,
qolda – muz.
...«Júrek» degen boztorǵaıdy qorǵańyz,
«Izgi qala» jaıyndaǵy, Sorly Ańyz!..

О́rip shyqqan qubyjyq pen jalmaýyz!
Ar-amanat-qazynama saldy aýyz.
Degenmenen abaılańyz, armańyz,
Qandy aýyzda Siz de ketip qalmańyz!

Tórińizdi toltyrǵasyn kil kezbe,
Bilinýshi ed, ilinýshi ed kim kózge!
Otan jaıly tebirene kórme tek,
Bizdiń Otan sizdikinen múlde ózge.

Bizdiń Otan – órtke úıtilý, sharpylý,
Sizdiń otan: basy – gý-gý, arty – dý.
Bizdiń Otan – óksý menen ókirý,
Sizdiń otan – yńyrsý men alqyný.

Bizdiń Otan – árýaq qonǵan beıitte,
Sizdiń otan – jarmaq tolǵan seıfte.
Bizdiń Otan – arman búrgen Júrekte,
Sizdiń otan – jalǵan kúlgen keıipte.

Birde – orysqa, birde – shúrshit, shtatqa
Birdeı bulǵap, quıryǵyndy ustatpa!
Sizdiń otan – qoldan soqqan ushpaqta,
Bizdiń Otan – sordan soqqan qystaqta.

Týlaq bolǵan buralqy men ógeıge,
Erteń: «Mynaý kimniń jeri?» –
demeı me...
Sizdiń otan – Astana men Almaty,
Bizdiń Otan – Aral menen Semeıde.

Záýzatymnyń Esesinen tólengen,
Sizdiń otan – jasalǵan shart kóp elmen.
Bizdiń Otan – Ulytaý men Baıqońyr,
Sý ornyna ý jaýatyn tóbeńnen!

Sizdiń otan – alǵys, qaýma... kók orman,
Bizdiń Otan qarǵys, daýda joǵalǵan.
Sizdiń otan – shetelderdiń bankinde,
Bizdiń Otan – Mańǵystaýda tonalǵan!

Habaryń kem, bizdiń Otan jutaı ma?..
Sizdiń otan uttyrmaıtyn upaıda.
Bizdiń Otan – qora, mola adyra
Qalǵan jerde – ketken keshe Qytaıǵa!

Bizdiń Otan – qysqy qyrda tul qalǵan,
Sizdiń otan – kúshti jyrda júlde alǵan.
Bizdiń Otan – aryn satqan nan tappaı
Arýlardyń yshqyrynda bylǵanǵan!

Sizdiń otan – atqaly tur jel berse,
Bizdiń Otan – qorǵaıdy elin ólgenshe!
Bizdiń Otan – muhıt asyp joǵalǵan
Týmaı týa shókken baqsyz kórdemshe!..

Bizdiń Otan – «dana túrde» sheshilgen
Myılaý zańnyń monshasynda sheshingen.
Sizdiń otan – qara túrme halyqqa,
Bizdiń Otan: Ana tilde – kesilgen!

Sizdiń otan – mármár úıler qozdaǵan,
Bizdiń Otan – boz torǵaıly boz dalam.
Sizdiń otan – ibilister áninde,
Bizdiń Otan – qyl qobyzda bozdaǵan.

Bizdiń Otan – bershimek zar týmaǵan,
Sizdiń otan – Sháddad-baqtaı shýlaǵan.
Bizdiń Otan – Qazaqstan-bekire,
Qulqyn atty qyzǵylt aýda týlaǵan...

Já!
Kúızelme,
kúńirenbe,
sarqylma! –
Mola baǵyp otyrǵan joq nar tulǵa:
Qoldanbaǵan aqyl bar-dy qartymda,
Joldanbaǵan hatym qaldy artymda.

Sarqylmaıtyn jymysqy arbap,
jaý ishsin,
Nesibem bar – kúnim bultqa qaýyssyn!
Men shydaımyn –
tyrymdy urlap taýyssyn,
Sizdiń otan jyryn jyrlap taýyssyn!

Sábı-halqym!
Jáýteńdegen quldyqta,
Myń jut kórdiń,
Shydashy eńdi Syn-Jutqa.
Bizdiń Otan jetkizedi habaryn
Erteń degen – órtenbegen Shyndykqa!

Qashyp jatyr – aldap-arbap týdy alǵan
Zyr-zybyldar – aqsha-masy týǵannan.
Bizdiń Otan alady Erteń Azattyq,
Táýelsizdik Túrmesinde ýlanǵan.

Dalam meniń!
Orda tikken myń atam,
Kók baıraqtaı aspanyndy unatam.
...Eshqashan da Otan ekeý bolmaıdy:
Qalady áli Jalǵyz Otan – Shyn Otan!
Uly Otan!..

SVETQALI NURJAN

Eskertý: bas taqyryp aqynnyń óleńinen alynyp otyr