Nazarbaev Qazaqstan úshin 30 jyl boıy aıanbaı eńbek etkenin maqtana aıtyp, qazaqstandyqtarǵa alǵysyn bildirdi (vıdeo)

Qazaqstannyń eks-prezıdenti Nursultan Nazarbaevtyń baspasóz hatshysy Aıdos Úkibaı Twitter-degi paraqshasynda Nazarbaevtyń qazaqstandyqtardy Táýelsizdik kúnimen quttyqtaǵan vıdeosyn jarııalady. 

Vıdeoda Nazarbaev 30 jyl boıy el múdesi jolynda aıanbaı eńbek etkenin maqtana aıtyp, Qazaqstan halqyna  birge bolǵany úshin alǵys bildiredi. 

- Men 30 jyl boıy jas urpaqtyń jarqyn bolashaǵy men el múddesi jolynda aıanbaı eńbek etkenimdi maqtan tutamyn jáne aıtamyn. Bul - zor mártebe, mol baqyt. Elim úshin, halqym úshin, táýelsiz Qazaqstanym úshin naryqtyń qaı synaǵyna da táýekel dep bas tigýge daıyn turǵanymdy bilesizder. Táýelsizdik sııaqty qasterli qundylyqtardy saqtaýǵa tyrystym. Bar kúsh-jigerimdi týǵan elimniń eńsesin bıik ustaýǵa arnadym. Artymda arqa súıer halqymnyń turǵany barlyq synaqtardy súrinbeı ótýime uıtqy boldy. Egemendiktiń alǵashqy sátinen bastap, Otanymyzdy órkendetýge, eldigimizdi nyǵaıtýǵa zor úles qosqan, zamannyń aýyr júgin birge kótergen barsha Qazaqstan jurtshylyǵyna shynaıy alǵysymdy bildiremin,- dedi Nazarbaev.

Qazaqstan Respýblıkasynyń Táýelsizdik kúni qutty bolsyn! pic.twitter.com/ekUqtyccFp

— Aidos Ukibay (@Aidos_Ukibay) 16 dekabrıa 2019 g.

16 jetoqsan - Qazaqstanda Táýelsizdik kúni. Jáne bul data el tarıhynda aıtýly eki oqıǵamen de erekshelenedi. 1986 jyldyń dál osy kúni sol kezdegi Qazaqstan Ortalyq komıtetiniń birinshi hatshylyǵynan Dinmuhamed Qonaevty alyp, ornyna Gennadıı Kolbındi taǵaıyndaǵan Máskeý sheshimine qarsy shyǵyp, Almatyda beıbit sherýge shyqqan stýdent jáne jumysshy qazaq jastaryn bılik kúshpen taratyp, keıin júzdegen adamdy qýǵynǵa salǵan. Al 2011 jyly Mańǵystaý oblysynyń Jańaózen qalasynda birneshe aı boıy ereýilge shyqqan munaıshylarǵa polısııa oq atqan. Resmı derek boıynsha, Jańaózen men Shetpedegi oqıǵalarda 17 adam qaza tapqan. Sondyqtan da, sońǵy kezderi Qazaqstan qoǵamynda "16-17 jeltoqsandy mereke retinde toılaý durys emes. Bul kún - Jeltoqsan men Jańaózen qurbandaryn eske alatyn qaraly kún" degen pikirler jıi aıtylady. 

Búgin Almatyda azamattar túske deıin "Respýblıka" alańyna baryp, Jeltoqsan men Jańaózen oqıǵalary qurbandaryn eske alyp, quran baǵyshtady. Al tústen keıin qala kóshelerinde "Shal, ket!" dep qrandata bastaǵanda olardy polısııa ustady. Sherýge shyqandardyń keıbiriniń qolynda "Nazarbaesyz Qazaqstan" degen plakattar boldy. 

Qazaqstandy táýelsizdik alǵan 1991 jyldan bastap úzdiksiz basqarǵan Nazarbaev bıylǵy jyldyń naýryz aıynda prezıdenttik ókilettigin merziminen buryn toqtatqan. Biraq ol eldegi bılik partııasy sanalatyn "Nur Otan" partııasyn áli de basqaryp otyr jáne Qaýipsizdik keńesiniń máńgilik tóraǵasy.