Qarın Toqaevtyń Almaty ataýyn ózgertýge qalaı qaraıtynyn jetkizdi

Prezıdent keńesshisi Erlan Qarın prezıdent Qasym-Jomart Toqaevtyń Almaty ataýyn ózgertýge qalaı qaraıtyn aıtty. Bul týraly Qarın Telegram kanalynda jazdy. 

Qarınniń jazýynsha, Toqaev mundaı máseleler kabınette ǵana emes, qala turǵyndarynyń basym kópshiliginiń ustanymy negizinde, azamattardyń oıyn bilip baryp sheshilýi kerek dep esepteıdi eken.

- Oljas Súleımenov ońtústik astananyń atyn ózgertý kerektigin baıaǵydan aıtyp keledi. Alaıda onyń prezıdentpen kezdesý barysynda bul máseleni qaıta kóterýi – memleket basshysynyń bul bastamany qoldaıtynyn bildirmeıdi. Prezıdent Almatyny damytýdyń mańyzdy máselelerine nazar aýdarý kerek dep esepteıdi. Ol týraly prezıdent osy jyldyń 29 qazanynda qala aktıvimen kezdesý kezinde aıtqan edi. Memleket basshysy mundaı máseleler kabınette ǵana emes, qala turǵyndarynyń basym kópshiliginiń ustanymy negizinde, azamattardyń oıyn bilip baryp sheshilýi kerek dep esepteıdi, - dep jazdy Qarın.

Buǵan deıin birqatar BAQ-ta aqyn Oljas Súleımenovtiń prezıdentpen kezdeskeni, kezdesýde "Almaty ataýyn "Alma-Ata" dep ózgertý bastamasyn prezıdent qoldady" degen syńaıda aqparat taraǵan bolatyn.

Qazaqstandy úzdiksiz 30 jylǵa jýyq bılegen Nursultan Nazarbaev bıylǵy jyldyń 19 naýryzynda merzimen buryn prezıdenttik ókilettigin toqtatqan. Zań boıynsha, prezıdent qyzmetin ýaqytsha atqarýǵa kirisken sol kezdegi senat tóraǵasy Qasym-Jomart Toqaev 23 naýryzda Astana qalasynyń atyn "Nur-Sultan" dep ózgertý týraly jarlyqqa qol qoıǵan. Toqaev ol kezde qala turǵyndarynyń basym kópshiliginiń ustanymyna, azamattardyń oıyn-pikirine qaramastan el astanasynynń atyn ózgertý týraly jarlyq shyǵarǵan. 

Qazaqstan Zań boıynsha, Konstıtýsııaǵa ózgeris engizý týraly prezıdent, úkimet nemese parlament usynys jasaı alady. Al usynysqa oraı búkilhalyqtyq referendým ótýi tıis. Biraq sol kezde Qazaqstan parlamenti qala ataýyn ózgertý úshin referendým ótkizý qajet emes dep sheshken. Bul sheshimdi Konstıtýsııalyq keńes oń baǵalaǵan.