Jańaózen klınıkalarynda oń ózgerister kóp

«О́zenmunaıgaz» AQ qarasty mekemelerinde mindetti áleýmettik medısınalyq saqtandyrý júıesi týraly aqparattyq-túsindirý jumystary belsendi júrgizildi.

           Munaıshylarmen ótken kezdesýge «Áleýmettik medısınalyq saqtandyrý qory» Mańǵystaý oblysy boıynsha fılıalynyń dırektory Baqyt Ismahanbetov pen №1,2,3 Jańaózen qalalyq emhanalardyńbasshylary, «Neıron», «Jalymbetov» jeke menshik klınıkalarynyń ókilderi belsendi qatysyp, pasıenttermen júrgiziletin basty jumystar men olardyń múmkindikteri týraly máselege  toqtalyp ótti.

             13-shi qarasha kúni bastaý alǵan munaıshylarmen eń alǵashqy kezdesýde jalpy densaýlyq salasyna 2020 jyldyń 1 qańtarynan bastap Mindetti áleýmettik medısınalyq saqtandyrý (odan ári - MÁMS) júıesiniń iske qosylatyny týraly aqparat berildi.  

            MÁMS júıesiniń artyqshylyqtary men pasıentterdiń quqyqtary men múmkinshilikteri týraly jan - jaqty túsinik bergen Baqyt Ismahanbetov turǵyndardy tolǵandyratyn eń basty máselelerdi aıta kele, memleket tarapynan atqarylatyn qoldaýlar men múmkinshilikterge toqtalyp ótti.

             Atalmysh kezdesý kezinde munaıshylar tarapynan MÁMS júıesi boıynsha suraqtar qoıylyp, oı - pikirler aıtyldy.

              «О́zenmunaıgaz» AQ qarasty  óndiris basqarmalaryndaǵy jumysshylar men ákimshilik ókilderi osy jańadan engizilgeli jatyrǵan júıege qoldaý kórsete otyrsa da, búgingi kórsetilip jatyrǵan medısınalyq qyzmettiń sapasyna kóńilderi tolmaıtyndaryn tilge tıek etti. Sonyń  ishinde dári dármektiń jetispeýshiligi, dárigerlerdiń paıenttermen jumys jasaýy áli de bolsa baqylaýdy qajet etip otyr degen pikirlerin jetkizdi.

              Memleket tarapynan saqtandyrylǵan azamattar kimder jáne mártebesi anyqtalmaǵandar qalaı saqtandyrylady degen suraqtarǵa da tushymdy jaýaptardy Baqyt Ismahanbetovpen birge kezdesýge kelgen №1 Jańaózen qalalyq emhananyń basshysy Mánshúk Muratova da naqty aqparat berdi.

             Munaıshylarǵa emhanaǵa tirkelý máselesi de túsindirildi. Mánshúk Myrzaǵalıqyzynyń aıtýynsha, turǵyn ózi turatyn ákimshilik terrıtorııalyq aımaq sheńberinde  qyzmet etetin klınıkanyń birin tańdaı alady.Tańdaǵan emhananyń úıge jaqyn mańda, jaıaý júrgende 15-20 mınýttyq jerde bolǵany durys. Bul úıde bireý aýyryp, ózin jaısyz sezingen jaǵdaıda dárigerlerdiń jedel kómek kórsetýine múmkindikteri bar ekeni mańyzdy.

          Sonmen qatar, búginde MÁMS júıesiniń engizilýimen birge densaýlyq salasyna bólinetin qarjy kóleminiń ulǵaıýy da kútilýde. Osyǵan baılanysty, ólkemizde  densaýlyq salasyna ınvestısııa tartý jumystary da qolǵa alynýda. Aıta ketetin jaıt, bıyl Jańaózen qalasynda «Neıron-О́zen» medısınalyq klınıkasy ashylyp, turǵyndardy qabyldaý bastalyp ketti. Sonymen birge Jańaózen kópbeıindi aýrýhanasy janynan jeke kásipkerdiń qarjysyna angeograf apparaty alynyp, qymbat turatyn medısınalyq qyzmetti halyqqa tegin  kórsetý  úshin  jaǵdaı jasalýda.  Bul apparat júrek, mı, ishki organ qan tamyrlaryn tekserip, dıagnoz anyqtap, júrekke stend qoıýǵa, júrek tamyrlaryn qalpyna keltirý operasııalaryna joldama berýge múmkindik beredi. Osy oń ózgerister arqyly Jańaózen qalasynyń turǵyndaryna sapaly medısınalyq qyzmet kórsetý deńgeıi artady degen úmittemiz.