5 myńnan astam almatylyq medısınalyq tekserýden ótti

Almatyda qala ákimi Baqytjan Saǵyntaevtyń tapsyrmasy boıynsha 1 jeltoqsanǵa deıin densaýlyq aılyǵy ótýde. Aılyq bastalǵaly beri, 29 qazannan bastap medıkterdiń kóshpeli brıgadalary ortalyqtan shalǵaı jatqan 23 eldi-mekende boldy. Bul rette 5 myńnan astam qala turǵyny túrli máseleler boıynsha tegin medısınalyq keńes alyp, tekserýden ótti.

Densaýlyq aılyǵy aıasynda emdelýshiler endokrınolog, kardıolog, jalpy praktıka dárigeri, oftalmolog, gınekolog jáne basqa da beıindi dárigerlerden tegin keńes alady. Flıýorografııalyq tekserý, arterııalyq qysymdy, kóz túbin ólsheý, EKG dıagnostıkasy, AITV-ınfeksııasyn anyqtaýǵa ekspress-testileý, qandaǵy holesterın men qanttyń deńgeıin anyqtaý júrgiziledi.

Profılaktıkalyq tekserý barysynda qan qysymy joǵary, qandaǵy qant deńgeıi, holesterın deńgeıi joǵary pasıentter anyqtaldy. Olardyń barlyǵy ýchaskelik dárigerge qaralýǵa jiberildi.

Sonymen qatar, aılyq sheńberinde medısına qyzmetkerleri halyq arasynda mindetti áleýmettik medısınalyq saqtandyrýdy engizý, skrınıngtik tekserýden ótý, halyqty tirkeý tirkelimi arqyly bekitý jáne mobıldik qosymshany belgileý máseleleri boıynsha aqparattyq-túsindirý jumystaryn júrgizýde.

Densaýlyq aılyǵynyń maqsaty – qala turǵyndaryna qoljetimdi medısınalyq qyzmet kórsetýdi qamtamasyz etý. Ásirese, bul shalǵaı jatqan aýdandarǵa qatysty. Sondaı-aq, aksııa megapolıs turǵyndarynyń óz densaýlyǵyna nemquraıly qaramaýǵa úndeıdi.