Taraz qalasynda jeltoqsan aıynda 4 áleýmettik jataqhana paıdalanýǵa beriledi

Taraz qalasyndaǵy turǵyn úı kezeginde turǵan birqatar az qamtylǵan jáne kóp balaly otbasylar úshin jyl sońynda baspana máselesi túbegeıli sheshilmek. Qazir oblys ortalyǵyndaǵy №5 «Qarasý» yqshamaýdanynda áleýmettik jataqhana qurylysy qarqyndy júrgizilip jatyr, dep jazady Qamshy.kz aqparat agenttigi. 

Áleýmettik 4 jataqhananyń bólmesi oblys ortalyǵynda turǵyn úı kezeginde turǵan az qamtylǵan jáne kóp balalaly otbasylarǵa berilmek. Nysan paıdalanýǵa berilgende munda atalǵan sanatqa jatatyn 180 tarazdyq otbasy panalaıtyn bolady. Jalpy kólemi 8100 sharshy metrdi quraıtyn jataqhanalar tutas eki bólmeli páterlerden turady. Mundaǵy ár páterdegi kólemi 52-54 sharshy metr shamasynda. Aty jataqhana demeseńiz mundaǵy árbir páterdiń jeke as úıi,ájethanasy jáne jýynatyn bólmesi bolady.

–Bizdiń seriktestik qurylys jumystaryn tamyz aıynda bastady. Qazirgi tańda bul nysanǵa 500-ge jýyq jumysshysy jumyldy. Jataqhanany jeltoqsandy paıdalanýǵa berý josparlanǵan. Sondyqtan qurylys jumystaryna qosymsha kúsh tartylady. Nysandy tapsyrys berýshige mejeli merzinde tapsyrýǵa áleýetimiz tolyǵymen jetedi. Qazirdiń ózinde biz qurylys jumystary boıynsha bekitilgen kesteden bir apta merzimge ozyp kele jatyrmyz. Qazirgi ýaqytta negizgi jumystar tolyǵymen aıaqtaldy. Endigi kezekte nysandy montajdaý jáne ishki árleý jumystary qatar júrgizilip jatyr, – deıdi «Bınom» jaýapkershiligi shekteýli seriktestigi bas dırektorynyń orynbasary Mádı Izenbaev.

Jalpy qurylysy qatar júrgizilip jatqan árbir jataqhanada 45 páterden bolady.Mundaǵy árbir jataqhananyń jobalyq-smetalyq quny 280 mıllıon 175 myń teńgeni quraıdy. Merdiger kompanııa ókilderi qurylys jumystaryna negizinen seriktestiktiń óz zaýytynan shyǵarylatyn ónimderdiń qoldanylyp jatqanyn aıtady. Sondaı-aq munda qurylys materıaldaryn óndirýshi otandyq kásiporyndardyń ónimderi de paıdalanylýda. О́z kezeginde bul faktorlar qurylysqa jumsalatyn shyǵyndy azaıtýǵa múmkindik beredi.

Áleýmettik jataqhana qurylysy jaıynda alǵash ret aqpan aıynda oblys ákimimen kóp balaly analardyń kezdesýinde aıtylǵan-dy. Sonda óńir basshysy kóp balaly analardy áleýmettik qoldaý sharalaryn júzege asyrýda múmkindiginshe olardy baspanamen qamtý tetikteriniń qarastyrylatyndyǵyn jetkizgen. Mine 8 aı ishinde sózden iske kóshken jergilikti bılik jeltoqsan aıynda oblys ortalyǵynda kóp balaly jáne az qamtylǵan otbasylarǵa baspanaly bolýy baqytyn syılaǵaly tur.