Ana men bala ólimine jol bermeýdiń arnaıy jol kartasy jasaldy

Densaýlyq saqtaý salasyndaǵy negizgi kórsetkishke yqpal etetin basty faktor ana men náreste ólim-jitimin tómendetý bolyp tabylady. Ári bul jaıynda Qazaqstan Respýblıkasy Prezıdenti Qasym-Jomart Toqaevtyń halyqqa arnaǵan Joldaýynda aıtylady. Prezıdent pármen bergen bul sharalardyń óz deńgeıinde uıymdastyra bilý densaýlyq saqtaý salasyn basqarýdaǵy ózekti másele sanalady. Jambyl oblysynda ana men náreste ólimniń aldyn-alý, boldyrmaý sharalary, arnaıy jol kartasyna saı júrgizilip keledi, dep jazady Qamshy.kz aqparat agenttigi. 

Atalǵan jol kartasyndaǵy is-sharalar boıynsha Jambyl oblystyq perınataldyq ortalyǵynda oqý klınıkalyq ortalyǵy ashyldy. Ortalyqta jyl basynan beri 211 maman oqytyldy. Sondaı-aq Jambyl joǵary medısınalyq kolledjiniń sımmýlıasııalyq ortalyǵynda 212 medısına qyzmetkeri óz bilimi men biligin jetildirildi. Al oblystyq perınataldyq ortalyǵynyń bazasyna jalpy quny 169,4 mıllıon teńge bolatyn 9 medısınalyq qural - jabdyq satyp alyndy. Osy qural-jabdyqtyń kómegimen týa bitken aqaýlardy erte anyqtaýda 57 paıyzdyq kórsetkishke qol jetkizildi. Bosandyrý bólimderiniń materıaldyq-tehnıkalyq bazasyn nyǵaıtýǵa 413,8 mıllıon teńge qarastyrylyp, 18 medısınalyq qural-jabdyq satyp alyndy.

–Búginde basqarma tarapynan bul jumystarda oń nátıjege qol jetkizý úshin júkti jáne bosanǵan áıelderdiń densaýlyǵyna turaqty monıtorıng júrgiziledi. Densaýlyq saqtaý uıymdarynda apta saıyn dıspetcherlik saǵat ótkiziledi. Júkti jáne fertıldi jastaǵy áıelder tizimine naqtylaý jumystary júrgizilýde. «Kardıohırýrgııa jáne transplantologııa ǵylymı klınıkalyq ortalyǵy» jaýapkershiligi shekteýli seriktestigimen ýltra dybyqtyq zertteý qurylǵysynyń mamandaryna «Júrek týa bitken aqaýlardy erte anyqtaý» boıynsha oqytýlar, sheberlik synyptar da udaıy uıymdastyrylyp turady, –deıdi oblys ákimdiginiń densaýlyq saqtaý basqarmasynyń basshysy Marat Jumanqulov.

Basqarma basshysynyń aıtýynsha óńirde ana men bala ólimin azaıtýdyń uzaq merzimdi josparyna saı birer jyldyń kóleminde oblystyq balalar aýrýhanasynda kýratorlyq qyzmet uıymdastyrylyp, oqytý-ádistemelik ortalyǵyn ashý qolǵa alynbaq. Sonymen qatar júktilik kezinde týa bitken ahaýlardy erte anyqtaý maqsatynda oblystyq perınataldyq ortalyǵynda ýltra dybystyq zertteý ortalyǵyn ashý josparlanýda. ÝZI dárigerleriniń «Týa bitken aqaýdy erte anyqtaý» boıynsha biliktiligin jetildirý máselesi de kún tártibinen túsken emes.