Áleýmettik kómektiń jańa tásilderi túsindirildi

Almaty qalasy ákimdiginiń baspasóz ortalyǵynda ótken brıfıngte Áleýmettik ál-aýqat basqarmasy basshysynyń orynbasary Danııar Álkebaıuly ataýly áleýmettik kómektiń 2020 jyldyń 1 qańtarynan bastap josparlanǵan jańa mehanızmderi týraly aıtyp berdi, dep jazady almaty.gov.kz saıty.

Qazaqstan Prezıdentiniń AÁK- ti tóleý mehanızmderine túzetýler engizý jónindegi tapsyrmasyna oraı QR Eńbek jáne halyqty áleýmettik qorǵaý mınıstrligi áleýmettik kómektiń jańa tásilderin usyndy.

Birinshi – kópbalaly otbasylar jeke sanatqa engiziledi jáne olarǵa kepildemeli kómek kórsetiledi.

Atalǵan memlekettik kómektiń otbasynyń tabysyna esh qatysy joq ári kámeletke tolmaǵan 4 jáne odan kóp balalary bar otbasylardyń barlyǵyna beriledi.

Bul kómektiń kólemi bala sanyna qaraı saralanady, ár balaǵa orta eseppen 10-11 myń teńgeden keledi jáne kólemi 2018 jyly toqtatylǵan osyǵan uqsas kómekterden 4-7 ese kóp bolady.

Ekinshi – azamattardyń az qamtylǵan sanatyna qoldaý kórsetiledi jáne olar eńbekke tartylady.

AÁK az qamtylǵan otbasylarǵa, onyń ishinde kópbalaly otbasylarǵa da tólenedi.

AÁK-tiń kólemi jan basyna shaqqandaǵy tabys pen kún kóris mınımýmynyń 70%-y arasyndaǵy aıyrmashylyqty quraıdy. Sonymen qatar, tabysy joq otbasylar bıylǵy jylǵydaı kómek alatyn bolady.

AÁK-tiń basty sharttarynyń biri – otbasynyń eńbekke jaramdy músheleri jumys isteýleri jáne otbasy úshin jaýapkershilikti moınyna alýlary tıis. AÁK shartty aqshalaı tólem retinde «Eńbek» nátıjeli jumyspen qamtý baǵdarlamasyn tolyq qoldaný arqyly tólenedi jáne ol az qamtylǵan otbasylardaǵy jumyssyz azamattarǵa baǵyttalǵan.

Memleket arqyly sýbsıdııa bólinetin jumystar odan ári jalǵasady, olar: jeńildetilgen mıkronesıeler jáne bıznes ashý úshin beriletin qaıtarylmaıtyn granttar.

Eger jumysqa jaramdy otbasy múshesi usynylǵan jumystan bas tartatyn bolsa, onda AÁK otbasyǵa berilmeıdi.

Úshinshi - AÁK alýshylardyń barlyǵyna quramyna balalarǵa naqtyly qoldaý kórsetý engen kepildemeli paket beriledi.

Pakette mynalar bolady:

- mektep jasyna deıingi balalar úshin: balalar taǵamdary jáne gıgıenalyq zattar (323,4 myń balaǵa 5302 teńgeden).

- mektep jasyndaǵy balalar úshin: mektepte ystyq tamaq beriledi, mektep kıimi jáne qajetti zattarmen qamtamasyz etiledi, jolaqysynyń shyǵyny tólenedi.