• USD 389.52
  • EUR 429.21
  • RUB 6.07
  • CNY 54.94
17 Qazan, 12:06:02
Prezıdenttik jastar kadr rezervine irikteýdiń kelesi kezeńine 904 qatysýshy ótti

10 Qazan, 2019 Suhbat

Oǵyz Doǵan: Maǵan janjaldyń keregi ne?!

"Fly Arystan" áýe kompanııasynyń qyzmetkerleri keshe Nur-Sultannan Shymkentke ushpaq bolǵan Oǵyz Doǵandy "kompanııanyń qara tizimindesiz" degen ýájben ushaqqa otyrǵyzýdan bas tartqany belgili. Oǵyz Doǵan esimi kópshilikke 2017 jyly "Air Astana" kompanııasyna tıesili ushaqta bortseriktiń qazaq tilinde qyzmet kórsetýin talap etken oqıǵa boıynsha tanys. Bul jaǵdaı Oǵyz Doǵannyń "Air Astana"-ny sotqa berip, jeńip shyǵýymen aıaqtalǵany belgili. Osydan keıin kompanııa atalmysh azamatty ózderiniń "qara tizimine" engizipti. Daýdyń basy osydan shyǵyp otyr. Qamshy.kz aqparat agenttiginiń tilshisi Oǵyz Doǵanǵa habarlasyp, jaǵdaıdyń barysy týraly bildi.

– Keshegi oqıǵaǵa qatysty kompanııa tarapynan qandaıda bir resmı jaýap, ıa túsindirme boldy ma?

– Resmı jaýap ta, túsindirý de bolǵan joq. Meniń "qara tizimde" ekenimdi rastaıtyn qujat, túsindirme suraǵanymda ony da taýyp bere almady. Jalpy kompanııalar klıentine kúlimsirep qarap, mán-jaıdy túsindirip, kómektesýge tyrysyp jatýshy edi. Keshe ondaıdyń birin de kórmedim.

– Siz "qara tizimde" ekenińizdi bilmegen bolyp tursyz ǵoı.

– Bilmedim. Maǵan ony habarlaǵan emes. Tek 2 jyl burynǵy sot kezinde meniń elektrondyq poshtama kompanııanyń sur tizimine engizilgenim jóninde habar aldym. Sur tizimge engenderge ushaqta sýsyn, tamaq berilmeıdi eken. "Bermese, bermeı-aq qoısyn. Tek qazaqsha sóılese boldy" dedim de, qoıǵanmyn. Al "qara tizim" týraly maǵan eshqandaı aqparat, málimet berilgen joq. Men ony bilsem, "Fly Arystan"-nyń bıletin alyp qaıtem. Áıelimdi, kishkentaı balamdy sabyltyp qaıtem. Maǵan janjaldyń keregi ne?!

– Kompanııanyń PR menedjeri Lázzat Nábıevanyń "ondaı adamdar qandaı da bir tizimde ekenin ózderi bilýi kerek" degeni negizsiz be, sonda?

– Álbette negizsiz. Maǵan habarlamasa, aıtpasa qaıdan bileıin. Qaıdan bilýim múmkin?! Bir jarym aı buryn bılet alarda aty-jónimdi, tólqujattyq derekterimdi engizdim ǵoı. Eger "qara tizimde" bolsam, sol kezde nege birden bas tartpaıdy. Menińshe, bul – ádeıi jasalǵan áreket. Meni qor qylý maqsatynda kezinde masqara bolǵandary úshin alǵan kegi dep esepteımin. Bul endi uıat qoı. Osy ulttyq kompanııa degen atqa laıyq is pe? Olardyń óz abyroılaryn ózderi túsirip, ne kózdep otyrǵany tipten túsiniksiz.

– Máselege qatysty sotqa shaǵymdanatynyńyzdy aıttyńyz. Zańger Abzal Quspannyń aty ataldy. Kompanııanyń ishki tártibine qatysty zań ne deıdi eken? Keńesip, surap kórdińiz be?

– Ábekeńmeń (Abzal Quspan) jańa  ǵana sóılestim. Egjeı-tegjeıli eshteńe aıtqan joq. Sotqa deıingi prosess boıynsha kompanııa basshylyǵy Pıter Fosterdiń atyna hat jazylatynyn bildirdi. Onyń mazmunyn zańger bolmaǵannan keıin bilmeımin. Hat mátini qalaı qolǵa túsedi, sol kezde oqımyn.

– Is sotqa jeter bolsa, bul joly 1 teńgemen qutylmaıtynyn aıttyńyz. Moraldyq, materıaldyq shyǵynnyń óteýi retinde naqty somadaǵy aqsha talap etpeksiz be?

– Naqty soma týraly áli oılamadym. Ony Ábekeń, zańdyq jaǵynan ózi aıta jatar. Qazaq tiline qatysty eki jyl burynǵy sotta 6800 teńge kóleminde aıyppul salǵany bolmasa, menen eshqandaı materıaldyq shyǵyn shyqqan joq. Biraq osy joly meni materıaldyq jaǵynan da, moraldyq jaǵynan da qıyn jaǵdaıǵa túsirip otyr. Otbasymdaǵy eki adamnyń bıleti kúıip ketti, búgin ushý úshin basqa áýe kompanııasynan 3 ese qymbat baǵaǵa 3 bılet satyp alýymyzǵa týra keldi. Baratyn jerdegi josparymyzdyń bári ózgeriske ushyrap, qosymsha máseleler týdy. Birinshi jaǵdaıda til aqshamen ólshenbeıdi dep, eń mınımaldy soma – 1 teńge suraǵanymyz sodan. Qazir jaǵdaı basqasha. Zań qansha somaǵa ruqsat beredi, sonsha talap etemiz. Bularmen osylaı ǵana sóılesý kerek sııaqty.

– Sizdiń bıletińizdiń aqshasyn qaıtaryp berdi me?

– Árıne qaıtaryp bergen joq.

– Eń bolmaǵanda merzimin aıtyp jatyr ma?

– Ázirge aıtpady. Birazdan keıin "Air Astana"-ǵa habarlasamyn. Menikin qaıtaramyz degen.

– Feısbýkta 100-den astam adam habarlasyp, moraldyq kómek bildirip, qoldap jatqanyn jazdyńyz. Al materıaldyq qoldaý bildirip jatqandar bar ma?

– Materıaldyq qoldaý jasaý týraly usynys jasaǵandar boldy. Men ázirshe eshkimnen aqsha almadym.

R.S. Zańger Abzal Quspanǵa habarlasqanymyzda "Air Astana"-ǵa hat jazyp jatqanyn, sonyń jaýabyna qaraı áreket etetinin jetkizdi. Onyń aıtýynsha, Oǵyz Doǵan "qara tizimge" ishimdik iship, buzaqylyq jasaǵandyqtan enip otyrǵan joq, qazaq tilin qorǵap, "Air Astana" kompanııasy qyzmetkerleriniń áreketiniń durys emestigin zań júzinde dáleldep, sotta jeńip shyqqandyqtan "qara tizimge" enip otyr. Sondyqtan ishki tártip, ishki ereje degen áńgime qozǵalýy múmkin emes. "Air Astana"-nyń áreketi zańsyz! Zańger bul iste aqyryna deıin barmaq nıetti.

Oqı otyryńyz!

♦ Abzal Quspan: "Qazaq halqy aldynda keshirim suraýdy talap etem!"

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir