Oqytýshylar arasynda ozattar anyqtaldy

Búgin Nur-Sultan qalasynda Qazaqstan Respýblıkasy Mádenıet jáne sport mınıstrligi Til saıasaty komıteti Shaısultan Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵynyń uıymdastyrýymen Oqytýshylar arasyndaǵy Ahmet Baıtursynuly atyndaǵy respýblıkalyq baıqaýy ótti.

Basty maqsat – Ahmet Baıtursynulynyń ǵylymı-pedagogıkalyq muralarynynyń sabaqtastyǵyn jalǵastyrý. Uly tulǵanyń ádistemelik ıdeıalaryn, qazaq tiliniń memlekettik til retindegi mártebesin ulyqtaý men qoldanylý aıasyn keńeıtýdegi oqytýshylar isin dáripteý.

Ult tili – qazaq tili janashyrlarynyń eń úzdigin tańdaý arqyly oqytýdyń jańashyl ádis-tásilderin taratýǵa negiz bolary sózsiz.

Ashylý saltanatynda Shaısultan Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵynyń bas dırektory Álibek Asqar "Bul baıqaýdan kútip otyrǵan nátıjemiz, qazaq tilin oqytýdyń ınnovasııalyq ádis-tásilderin anyqtaý jáne taratý, oqytýshylardyń kásibı biliktiligin arttyrý jáne ózara tájirıbe almasýy, eresekterge qazaq tilinen sabaq berýdiń sapasyn arttyrý" – dep oıyn túıindedi.

Sondaı-aq Qazaqstan Respýblıkasy Parlamenti Májilis depýtaty Abaı Tasbolatov, Senat depýtaty Nurtóre Júsip baıqaý qatysýshylaryna sáttilik tiledi.

Baıqaý tórine birinshi bolyp aqtóbelik Altyngúl Táńirbergenova, qyzylordalyq Ásel Baqytova, nur-sultandyq Erkebulan Erbolatuly, Pavlodarlyq Qazyna Qadas, qaraǵandylyq Mýnıra Aǵymbaeva, batys qazaqstandyq Indıra Baımoldına, atyraýlyq Áıgerim Qoıtanovalar kóterilip ózderiniń elektrondyq portfolıony tanystyrý jáne pedagogıkalyq-psıhologııalyq jaǵdaıattarǵa arnalǵan tapsyrmalary men ozyq sabaq úlgilerin kórsetip, ádis-tásilderin kórermen nazaryna usyndy.

Al fılologııa ǵylymynyń doktory, professor, QR UǴA korrespondent múshesi Sherýbaı Qurmanbaıuly bastaǵan ádilqazylar alqasy jeńimpazdar men júldegerlerdi anyqtady.

Bas júldeni Rýdnyı qalasy “Qalalyq tilderdi oqytý ortalyǵynyń” oqytýshysy Janat Dosýbaeva ıelendi. Al birinshi júlde Nur-Sultan qalasy Rýhanııat ortalyǵy ıdeologııalyq jumystary jáne jobalardy júzege asyrý bóliminiń basshysy Erkebulan Erbolatuly, ekinshi Qaraǵandy oblysynyń Tilderdi oqytý ortalyǵynyń oqytýshysy Mýnıra Aǵymbaeva, úshinshi Shyǵys Qazaqstan oblysy Tilderdi oqytý ortalyǵynyń oqytýshysy Ásem Mamyranova ıelendi. Sondaı-aq yntalandyrý syılyǵyn Qyzylorda oblysy Tilderdi oqytý ortalyǵy oqý-ádistemelik bólimniń basshysy Ásel Baqytova, Jambyl oblysy Tilderdi oqytý ortalyǵynyń oqytýshysy Aqmaral Tursynbekova, Shymkent qalasy Tilderdi oqytý ortalyǵynyń oqytýshysy Aısulý Ospanovalarǵa buıyrdy. Barlyq baıqaýǵa qatysýshylarǵa syı-sııapat jasaldy.

Endigi mindet – ulttyq pedagogıkamyzdyń tarıhı, mádenı ári rýhanı aspektilerin jáne bilim berýdiń zamanaýı jetistikterin ushtastyra otyryp, elimizdiń bilim berý salasyn damytýǵa úles qosý. Osy oraıda, respýblıka kóleminde oqytýshylardyń kásibı biliktiligin artyrýdy ult zııalylarynyń pedagogıkalyq tájirbıesine negizdep júrgizý kezek kúttirmes is.