Atyraýlyq stýdent "Tildaryn – 2019" respýblıkalyq baıqaýynda oblys namysyn qorǵaıdy

"Tildaryn – 2019" respýblıkalyq baıqaýynyń oblystyq kezeńinde H. Dosmuhamedov atyndaǵy Atyraý memlekettik ýnıversıtetiniń 3-kýrs stýdenti Tımýr Muhametqalıev jeńiske jetti. Qazylar alqasy qatysýshylardyń bilimin úsh kezeń arqyly baǵalady. Baıqaýǵa 18-22 aralyǵyndaǵy jastar qatysty. Baıqaý qorytyndysy boıynsha, qatysýshylar dıplomdarmen, alǵys hattarmen jáne aqshalaı sertıfıkattarmen marapattaldy.

– Baıqaý til saıasatyn, atap aıtqanda – úshtildilikti damytýǵa baǵyttalǵan. Basty maqsat – qabiletti jastardy anyqtaý jáne qoldaý, mádenıetti qalyptastyrý, kóptildilikti úıretý, patrıotızmdi nyǵaıtý, basqa halyqtardyń mádenıeti men tilin qurmetteýge shaqyrý. Baıqaýdyń jeńimpazy respýblıkalyq olımpıadada oblysymyzdyń namysyn qorǵaıtyn bolady. Aıta ketý kerek, respýblıkalyq kezeń bıylǵy jyldyń qazan aıynda Shymkent qalasynda ótedi, – deıdi Atyraý oblystyq tilderdi damytý basqarmasynyń basshysy Ásııa Qystaýbaeva.