Qoryqshylardyń materıaldyq-tehnıkalyq bazasy kúsheıtiledi

– Qazaqstanda qoryqshy ınspektorlarǵa oq ótkizbeıtin keýdeshe berilýi múmkin. Qazir bul másele Ishki ister mınıstrliginde qarastyrylyp jatyr, dep habarlaıdy Qamshy.kz aqparat agenttigi. QR Ekologııa, geologııa jáne tabıǵı resrýrstar vıse-mınıstri Erlan Nysanbaev Ortalyq kommýnıkasııalar qyzmetinde ótken brıfıngte osyndaı málimet berdi.

"Qazirgi tańda bizdiń ınspektorlarymyz qajetti qarýmen qamtylǵan. Al oq ótpeıtin keýdeshe berý máselesin Ishki ister mınıstrligimen birge qarap jatyrmyz. Bizdiń ınspektorlarǵa da polısııa qyzmetkerleri sııaqty oq ótkizbeıtin keýdeshe kııýge ruqsat alýdamyz. Bolashaqta bul naqty sheshiledi. Ol úshin normatıvtik-quqyqtyq aktilerge ózgeris engizsek boldy. Bul jumysty endi ǵana bastadyq, – dedi Erlan Nysanbaev.

Mınıstrlik ókili keleshekte qoryqshy ınspektorlardyń arnaıy jabdyqtalǵan qyzmettik kólikteri de bolatynyn aıtty.

"Inspektorlardyń qazasynan keıin Bas prokýratýramen  jáne ózge de múddeli memlekettik organdarmen birge Parlament Májilisinde keńes ótkizdik. Sonyń nátıjesinde jedel aldyn alý sharalaryna qatysty zańnamany kúsheıtý týraly tapsyrma berildi. Brakonerlermen kúreste qyzmettiń materıaldyq-tehnıkalyq bazasyn nyǵaıtý boıynsha naqty sharalar atqarylady. Drondar men keýdege taǵylatyn beınekameralar, elektroshoker men travmatıkalyq qarý, jeke qorǵanys quraldary sol sharada qarastyrylǵan. Jol júrý erejesine bizdiń ınspektorlar minetin kólikterdi arnaıy tehnıka retinde tirkeý týraly ózgerister engiziledi", – dedi Erlan Nysanbaev.

Esimjan Naqtybaı

inform.kz