Tursymbaev: Nazarbaev qatty sasyp otyr (vıdeo)

Oppozısııalyq baǵyttaǵy "Azat" JSDP-nyń múshesi, Qazaqstannyń burynǵy vıse-premeri Baltash Tursymbaev eldi 30 jylǵa jýyq basqarǵan, búginde bıliktegi "Nur Otan" partııasynyń tóraǵasy bolyp otyrǵan Nursultan Nazarbaevtyń 21 tamyzda partııanyń saıası keńesiniń keńeıtilgen otyrysynda kóp balaly analarǵa qarata aıtqanyn "sasqan adamnyń sózine" teńedi dep jazady Qamshy.kz aqparat agenttigi. Bul týraly saıasatker Azattyq Radıosynyń "AzattyqLive" baǵdarlamasyna bergen suhbatynda aıtty. 

Nazarbaev sol jıynda "Kóp balaly analar "maǵan ber, meniń balam kóp, aılyǵym az" deıdi. Sen ne oıladyń? Bul – seniń máseleń ǵoı, sen buryn memleketpen aqyldaspadyń ǵoı". Mıkrokredıt al da eki sıyr satyp al. О́zińdi asyra" degen bolatatyn.

Saıasatker Tursymbaev burynǵy prezıdenttiń bul sózderinen onyń "qatty sasyp otyrǵanyn" aıtty. 

"Nazarbaevtyń málimdemesinen baıqaǵanym - Nursultan myrza qatty sasyp otyr. Sasqan adam ǵana sondaıdy aıtady. Nege deseńiz, biz kóp balaly analardy alaqanymyzda ustaýymyz kerek. Olar bizdiń demografııany túzeıdi. Bizdiń ulan baıtaq jerimizge bes Fransııa, úsh Túrkııa sııady. Sol jerdi saqtap qalý úshin biz halyqtyń sanyn kóbeıtkenimiz jón. Nazarbaev eldi basqarǵan 30 jylda bizdiń sanymyz úsh mıllıonǵa ǵana ósti. Onyń ózinde 1 mıllıon adam shetelden kelgen qandastarymyz. Sonda qosqanymyz barlyǵy 2 mıllıon ǵana. Eger dál osylaı 30 jylda eki mıllıon ǵana kóbeıetin bolsaq, bizdiń jerimiz bos qalady. Sondyqtan kóp balaly analarǵa barlyq jaǵdaıdy jasaýymyz kerek", - dedi Tursymbaev. 

Sondaı-aq Tursymbaev eks-prezıdenttiń "Barlyq saılaýlar konstıtýsııalyq merzimde ótedi" degen sózine eshqandaı kepildik joq ekenin aıtty. 

"Mysaly, Nazarbaev búgin "saılaý ýaqytynda ótedi" dep aıtady da bes kúnnen keıin saılaý ótkiziý týraly úkim jazyp, qol qoıyp, (qazir tipti ózi jazbaıdy da, jazatyn adam bar) bir aıdan keıin saılaý ótkizip jiberýi múmkin. Saılanatyn adamdardy da ózi tańdaıdy. Men qazir saıasatker retinde, sarapshy retinde buǵan eshteńe aıta almaımyn. Eshqandaı kepildik joq. Eger Nurekeń (red. N. Nazarbaev) jaqsy uıyqtasa, Parlament taramaıdy. Al  túsinde Parlamenttegiler ony synap jatqanyn nemese sondaı qorqynyshty nárseler kórse, azańda saılaý ótkizýge buıryq berip, Parlamentti taratyp jiberedi. Eshkim oǵan qarsy tura almaıdy, óıtkeni bizde dıktatorlyq júıe", - dedi saıasatker. 

Vıdeo Azattyq Radıosynan alyndy