Nurlan Nyǵmatýlın: turǵyndarmen jumys sapasyn kúsheıtý qajet

Búgin Májilis Tóraǵasy Nurlan Nyǵmatýlın «Nur Otan» partııasy fraksııasynyń alǵashqy otyrysyn ótkizdi dep habarlaıdy Qamshy.kz aqparat agenttigi Májilistiń Baspasóz qyzmetine silteme jasap.

Bul týraly Májilis Tóraǵasy óziniń tvıtterinde: «Májilistegi Nur Otan partııasy fraksııasynyń alǵashqy otyrysyn ótkizdim. Áriptestermen Elbasy N.Á.Nazarbaev tapsyrmalaryn oryndaý josparyn belgiledik. Basty maqsat-jumysta jańa tásil engizý, halyq máselelerin sheshý, saılaýaldy baǵdarlamany oryndaý,sonyń ishinde, zańdyq qamtamasyz etý» - dep jazdy.  

«Nur Otan» partııasynyń Saıası keńesiniń keńeıtilgen otyrysynda partııa Tóraǵasy, Qazaqstannyń Tuńǵysh Prezıdenti Nursultan Nazarbaev Májilistegi  fraksııanyń laýazymyna Palata Spıkeri Nurlan Nyǵmatýlındi usynǵan bolatyn.

Osyǵan oraı, «Nur Otan» partııasy fraksııasynyń otyrysynda partııa Tóraǵasy, Elbasy Nursultan Ábishuly Nazarbaevqa ózine zor senim artqany úshin alǵys bildirgen Nurlan Nyǵmatýlın fraksııadaǵy barlyq áriptesterine qoldap daýys bergeni úshin rahmetin aıtyp, bul úlken jaýapkershilik ekenin jetkizdi.

Nurlan Nyǵmatýlın nurotandyq depýtattardyń aldaǵy ýaqyttaǵy jumysy týraly aıta kele, fraksııa óziniń kúsh-jigerin, eń aldymen, partııa Tóraǵasy Nursultan Nazarbaevtyń tapsyrmalaryn, «Nur Otan» partııasynyń saılaýaldy tuǵyrnamasy men Memleket Basshysy Qasym-Jomart Toqaevtyń saılaýaldy baǵdarlamasynyń oryndalýyn baqylaýǵa jumyldyratynyn atap ótti.

Barshańyz jaqsy bilesizder, elimiz damý jolynda árbir kezeńde, árbir ýaqytta – «Nur Otan» partııasyna zor jaýapkershilik júktelip keledi. Keshe ǵana Nursultan Ábishuly «Nur Otan» partııasy Saıası Keńesiniń keńeıtilgen otyrysynda damyǵan 30 eldiń qataryna jetý týraly taǵy da atap ótti. Osy  jolda partııamyzdyń aldynda  turǵan úlken  mindetterge nazar  aýdardy. Sonymen birge, partııamyzdyń Májilistegi fraksııasy jumysyn kúsheıtýge erekshe kóńil  bóldi, - dedi N. Nyǵmatýlın.

Aldaǵy ýaqytta fraksııa depýtattary Úkimetpen birge partııa tuǵyrnamasynyń árbir tarmaǵy qalaı júzege asyrylyp jatqanyn jete taldap, fraksııanyń qatysýymen Úkimettiń keńeıtilgen otyrysynda halyqtyń naqty máselelerin sheshýge nazar aýdaratyn bolady.

Fraksııa otyrysynda N.Nyǵmatýlın áriptesterin zań shyǵarý bastamasyn belsendi paıdalanýǵa shaqyrdy. Depýtattyq zań jobalardy ázirleý barysynda partııa janyndaǵy Qoǵamdyq saıasat ınstıtýty óz úlesin qosady.

Sondaı-aq, depýtattyq saýaldardy daıyndaý barysynda aldymen saılaýshylardy tolǵandyrǵan máseleler, sonymen birge partııanyń saılaýaldy tuǵyrnamasyn iske asyrýǵa jete kóńil bólinedi.

Taǵy bir negizgi baǵyt - sybaılas jemqorlyqqa qarsy kúresti kúsheıtý. Osy baǵytta ozyq tájirıbelerdi eskere otyryp, júıeli jumystar júrgiziledi.

Elbasynyń ekonomıkalyq ósýdi qamtamasyz etýge qatysty qoıǵan  mindetterin tabysty oryndaý úshin N.Nyǵmatýlın ekonomıka, áleýmet, bıýdjet, jastar saıasaty, ınnovasııa jáne t.b. baǵyttar boıynsha Úkimetpen birge jumys isteıtin naqty depýtattardy bekitýdi usyndy.

Is-sharada Úkimetpen ózara is-qımyl týraly aıtqan  Nurlan Nyǵmatýlın jumystyń tásilderi ózgeretinin aıtty.

Mysaly, jańa tásil boıynsha Úkimet saǵattarynda mınıstrlerdiń salaǵa qatysty jalpy jumys jaǵdaıy emes, naqty bir memlekettik baǵdarlamanyń oryndalýy baıandalyp, atqarylǵan jumystar talqylanatyn bolady.

Nátıjesinde baǵdarlamany iske asyrýdy jaqsartý boıynsha usynystar ázirlenedi. Sondaı-aq, qajet bolǵan jaǵdaıda laýazymdy tulǵalardyń jeke jaýapkershiligi de qaralatyny aıtyldy.

- Mınıstrlerdiń barlyǵy bizdiń partııamyzdyń músheleri «Úkimet saǵaty» aıasynda ǵana emes, «Nur Otan» partııasy fraksııasynyń otyrystarynda da esep berýi kerek», - dedi N. Nyǵmatýlın.

Nurlan Nyǵmatýlın depýtattarǵa áleýmettik jelilerdi belsendi qoldanyp, saılaýshylarmen tyǵyz baılanysta bolýǵa, zań shyǵarýshylyq jumystaǵy jańalyqtar týraly aıtyp, halyqtyń pikirlerin bilýge jáne ony kúndelikti jumysta paıdalanýǵa shaqyrdy.

Budan bylaı fraksııa músheleri de depýtattyq tósbelgimen birge partııalyq tósbelgini taǵyp júretin bolady.