Qazaqstanda bir fýtbolshy 1222 ananyń járdemaqysyn alyp júr

"Astana" fýtbol klýbynyń burynǵy shabýylshysy, qazirgi ýaqytta rýmynııalyq "Astra" klýbynyń jeıdesin kıip júrgen Azdren Llýlaký birqatar beımálim jaıttardyń betin ashty dep jazady Qamshy.kz aqparat agenttigi.

"Sheteldik oıynshylar aıyna shamamen 60 myń eýro tabys tabady. Júldeli oryn men Chempıondar Lıgasy kezinde tabys kólemi arta beredi. Chempıondar Lıgasyna qatysqany úshin ár oıynshy 100 myń eýrodan alady. Al árbir jeńis saıyn 15 myń eýro syıaqy tóleıdi", - dedi 31 jastaǵy fýtbolshy.

Eske sala keteıik, Llýlaký 2016 jyly "Astana" fýtbol klýbymen eki jyldyq kelisimshart jasasqan. 17 oıynda alańǵa shyǵyp, nebári 1 gol soqqan. 2017 jyly "Tobyl" komandasyna jalǵa berilgen. Biraq albanııalyq fýtbolshy qostanaılyq klýbta 13 ret alańǵa shyǵyp, birde-bir ret gol soqpady.

Llýlakýdyń málimetine súıensek, aıyna bir sheteldik oıynshy shamamen 25 680 000 jalaqy alady. Kópbalaly analardyń daýǵa aınalǵan járdemaqysy - aıyna 21 myń teńge. Eger fýtbolshy jalaqysyn analardyń járdemaqysyna bólsek, 1222 degen sıfr shyǵady. Bul - bir fýtbolshy myńnan astam ananyń járdemaqysyn jalǵyz ózi qaltaǵa basyp júr degen sóz.