Qasym-Jomart Toqaev: Abaıdy ǵana emes, Qunanbaıdy da qurmetteýimiz qajet

"Uly Abaıdy ulyqtaǵanda, onyń ákesi – Qunanbaıdyń el tarıhyndaǵy eńbegin umytpaýymyz qajet." Bul týraly Memleket basshysy Qasym-Jomart Toqaev Semeı qalasynyń zııaly qaýym ókilderimen kezdesýinde aıtty. 

"Ol – Semeıde ǵana emes, tutas qazaq tarıhynda óz orny bar tulǵa.
Ony halqymyz jaqsy biledi, qadir tutady. Sondyqtan, aldaǵy ýaqytta oblys ákimdigi Qunanbaıdyń esimin ulyqtaýǵa baılanysty tıisti sharalar qabyldaý múmkindigin qarastyrýy qajet.
Jas urpaqqa jaqsy úlgi-ónege bolatyn isti men árqashan qoldaımyn.
Elbasynyń «Rýhanı jańǵyrý» baǵdarlamasyn júzege asyrý úshin biz, shyn máninde, osyndaı sabaqtastyq dástúrine jol ashatyn biregeı bastamalardy qolǵa alýymyz kerek." dedi Qazaqstan Prezıdenti Qasym-Jomart Toqaev.

Al aldaǵy jyly Abaı Qunanbaevtyń týǵanyna 175 jyl tolady. Toqaev osyǵan oraı  "Uly Abaıdyń murasy «Rýhanı jańǵyrýdyń» mańyzdy baǵdaryna aınalýy qajet ekendigin aıtty.
–Osy aıtýly datany biz tutas el bolyp, memlekettik deńgeıde atap ótemiz.
Biz úshin bul mereıtoıdyń mańyzy erekshe. Tarıhı datany aqyl-parasatpen, salıqaly deńgeıde ótkizýge basa mán berý kerek.
Negizgi maqsat – dana Abaıdyń taǵylymyn jastardyń sanasyna sińirý, uly tulǵanyń oı-tolǵamdaryn keńinen dáripteý.
Úkimetke Abaıdyń mereıtoıyna qajetti sharalar ázirleýdi tapsyramyn.
Abaı, shyn máninde, qazaq bolmysynyń aınasy.
Aqynnyń dara tulǵasy – halqymyzdyń rýhanııatyn álemge tanytatyn teńdesi joq qundylyq.
Dúnıe júzi ádebıetinde Abaı sııaqty aqyn, aǵartýshy, oıshyl, synshy kemde-kem.
Abaı, shyn máninde, qazaqtyń birtýar perzenti. Jıdebaıdaǵy keshendi jańǵyrtyp, ınfraqurylymdy qalpyna keltirý qajet.
Hakim Abaıdyń týǵan jeri dúnıe júziniń túkpir-túkpirinen keletin týrısterdi qarsy alýǵa laıyqty iri ortalyqqa aınalýy tıis.
Jergilikti basshylar osy mańyzdy máselege nazar aýdarýy qajet.
Bul – babalar aldyndaǵy boryshymyz ári óskeleń urpaq úshin jaqsy ónege.
«Rýhanı jańǵyrý», túptep kelgende, osy mindetti júrekpen sezinip, eshqandaı nusqaýsyz oryndaý ekenin biz tereń túsinýimiz kerek".
Bul týraly Memleket basshysy Qasym-Jomart Toqaev Semeı qalasynyń zııaly qaýym ókilderimen kezdesýinde aıtty.