Qazaqstandaǵy eń úzdik ákim - Amandyq Batalov

El Prezıdenti qaıta saılandy. Ekonomıkalyq daǵdarys esik qaǵýda. Álemdik geosaıası ahýal kún saıyn qubylyp tur. Táýelsizdiktiń 25 jylynda sheneýnikterdiń tizgindi myqty ustaǵany da, attan qulaǵany da az emes. Ákim kim? Halyqqa jaqyn kim? Ony myna jurt anyq ańǵarýda. Shendilerdiń ishinde aty áıgilisi de, esimin el bilmeıtin eleýsizi de kóp. Qaı óńirde óndiris órkendep, qaı óńirde korrýpsııa qanat jaıyp otyrǵany qarapaıym halyqqa aıan. Qaı ákimniń ulttyq rýhty ulyqtap, qaı ákimniń sheteldiń shekpenine qumar ekeni de jasyryn bolmasa kerek.

Biz osy ólshemderdi negiz etip, oqyrmandar arasynda «Eń úzdik ákimdi tańdańyz» atty saýalnama uıymdastyrǵan bolatynbyz. Saýalnamaǵa 7000-ǵa jýyq adam nazar salsa, 2000-ǵa jýyq adam daýys beripti. Saýalnama nátıjesi boıynsha Almaty oblysynyń ákimi Amandyq Batalov 34%(572) daýys jınap, qara úzip alǵa shyqty. Oqyrmanǵa árbir kompıýterden bir jolǵa ǵana ıaǵnı bir IP-den bir ret qana daýys berý múmkindigi berilgenin eskersek, bul, árıne úlken jeńis.

Jeri túńkeli, qonysy qutty Almaty oblysynyń tizginin ustaǵan Amandyq myrzanyń ákimder arasynda kósh bastaýyn árkim árqalaı túsiner. Biz óz álimizshe baǵamdap kórdik. Sóıtsek, Amandyq Ǵabbasulynyń Jetisý óńirine sińirgen eńbegi jyldar qoınaýynan menmundalyp tur eken.

Ol 2001-2008 jyldary ákimniń orynbasary bolsa, 2008-2014 jyldary ákimniń birinshi orynbasary qyzmetin atqarǵan. Bildeı bir oblysta 13 jyl boıy orynbasarlyq qyzmet atqarǵan Amandyq myrza Ákim oryntaǵyna jaıǵaspaı-aq biraz jumystyń núktesin qoıypty.

Almaty oblysynyń ortalyǵy Taldyqorǵan qalasyna kóshirilgen kezde qaladaǵy Til saraıy, Dostyq úıi, Jastar sport saraıy syndy kólemdi jobalardy júzege asyrýda Batalov myrzanyń aıqyn qoltańbasy ańǵarylady. Qurylys salasynda qyzmet atqaryp, kezinde Sh. Aımanov atyndaǵy «Qazaqfılmdi» salýǵa atsalysqan  Amandyq myrza Almaty oblysyndaǵy qurylystardyń boı túzeýine de aıtarlyqtaı yqpal etken kórinedi.

Al Amandyq Ǵabbasulynyń Qyzylaǵashtaǵy alapat apat kezindegi eńbegin el áli kúnge aýyzynan tastamaıdy.

Bir aıta keterligi, Serik Úmbetov myrza Almaty oblysynyń ákimi qyzmetinen ketkennen keıin Almatydaǵy BAQ ókilderi bul óńirden múldem beıhabar qalǵandaı bolyp edi... Tipti osy aımaqta ne bolyp jatqanyn jurt aýyzyndaǵy qaýesetten ǵana estıtin jaǵdaıǵa túskendeı kúı keshken. Sońǵy kezderi Oblys ákiminiń apparatyna Baqtııar О́nerbaev, Ǵalıasqar Sarybaev syndy basshylardyń kelýimen, sondaı-aq, Taldyqorǵan qalasynyń baspasóz tizginin ustaǵan Ǵalımurat Júkeldiń arqasynda  bul kemshiliktiń de oryny tolyǵatyn sııaqty...

Al, saýalnamamyzdyń alǵashqy kúnderinde top jarǵan Qyrymbek Kósherbaev óz ýaqytynda qanǵa boıalǵan "Jańaózendi" baqarǵanyna qaramastan Qyzylorda halqynyń aldynda ájeptáýir at-ataqqa, qurmetke ıe eken. Sóıtip, Q.Kósherbaev 23% daýyspen ekinshi orynǵa turaqtady.

Saýalnama nátıjesinde shyraıly Ońtústik óńirdiń birinshi qoly bolyp otyrǵan Asqar Myrzahmetovtiń de halyq aldyndaǵy bedeliniń tym tómende jatpaǵany belgili boldy. Iskerligi men óz halqy úshin jasap jatqan ıgi isteriniń arqasynda «ákimder saıysynda» úshinshi orynǵa turaqtady. Ásirese sońǵy ýaqyttardaǵy Ońtústik ımıdjiniń jaqsarýyna osy óńirdiń Ishki saıasatyn ustap otyrǵan Berik Ýálı myrzanyń yqpaly zor bolsa kerek...

Ataýǵa turarlyq alǵashqy úshtik osy. Endi halyq nazarynan múlde kóterilip ketken, bary men joǵy belgisiz ákimderdi de ataı ketýdi jón kórdik. Aqmola oblysynyń ákimi Sergeı Kýlagın. Bar-joǵy 8-aq daýyspen 0% kórsetkishte tursa, Astana qalasy, Qaraǵandy oblysy, Qostanaı oblysynyń ákimideri 1% daýyspen joqqa teńesip tur.

7000 ret qaralyp, 215 pikir jazylyp, 2000-ǵa jýyq adam daýys bergen saýalnamamyzdyń qortyndysy boıynsha eldegi ákimderdiń halyq arasyndaǵy kórsetkishi múlde tómen. Tipti resmı is qaǵazdary bolmasa atyn da estip kórmegen ákimder jaıly jazylǵan pikirler boldy.

Amandyq Batalov myrzanyń qyzmetine sáttilik tileımiz! Elbasynyń ǵana emes Eldiń de senimine ıe bolǵan ákimderdiń qatary kóp bolsa  eken...

Jebe Noıan