Ańyzǵa aınalǵan "Qara maıor" qaıtys boldy

"Qara maıor" atymen tanymal Borıs Kerimbaev 71 jasynda baqılyq boldy dep jazady Qamshy.kz aqparat agenttigi. Bul týraly Shoqan Syzdyquly óziniń feısbýk paraqshasyna jazdy. 

"Qosh bol aǵa!

— "GRÝ - qataldyqqa úıretetin mektep. Men sol mekteptiń aıla tásilin názik júregimmen qabyldap, júrek qalaýymen názik júregimmen soǵystym", degen. "Qara maıor" aǵamnyń búgin tań aldynda názik júregi toqtady. "Balam, elim barda ulylyq eskerýsiz qalmaıdy", dep edi sońǵy kezdeskende. "Aspandaı berme, jerden uzap ketesiń. Jerden uzap ketseń, elden uzap ketesiń. Elden uzap ketseń, Barsakelmeske ketesiń", dep urysyp-urysyp alýshy edi. Búgin mine ańyz adam Borıs Tókenuly Kerimbaev kelmestiń kemesine minip Barsakelmeske attanyp ketti. Qosh bol Aǵa!, - dep jazdy Shoqan Syzdyquly. 

Aıta ketsek, keshe Qorǵanys mınıstri Nurlan Ermekbev aýrýhanada jatqan Borıs Kerimbaevtyń palatasyna baryp kóńilin surap, ony  áskerı barlaýdyń "Altyn úki" belgisimen marapattaǵan bolatyn. 

***

Borıs Tókenuly Kerimbaev 1948 jyly 12 qańtarda Almaty oblysy Jambyl aýdanynda dúnıege kelgen. 1970 jyly V.I.Lenın atyndaǵy Tashkent áskerı ýchılıshesin támamdaǵan. 1980-1983 jyldary Aýǵan soǵysyna qatysyp arnaıy tapsyrmalardy oryndaıtyn musylman batalonynyń komandıri boldy.

Saýatty basshylyqtyń arqasynda batyr komandırdiń sarbazdary az shyǵynǵa ushyrap, kóbinese jeńiske jetip otyrǵanyn jurtshylyq jaqsy biledi. Onyń erligi ańyzǵa aınalyp «Qara maıor» degen laqap aty kúlli aımaqqa jaıyldy.

«Spesnaz GRÝ SSSR» degen kitaptaǵy tizim boıynsha tórtinshi oryndy nyq ıelengen qazaq jigitin sol kezdegi keńestik saıasattyń ózi osylaı joǵary kóterip moıyndaǵan. 1992 jyly densaýlyǵyna baılanysty polkovnık shenimen otstavkaǵa shyqty. Batyr týraly «Qara maıor» fılmi túsirildi.

Usynǵan: Ásel Bolatqyzy