Eń úzdik oblys baıqaýy: Mańǵystaý oblysy  kósh bastady!

 Bıyl 2015 jyl Qazaqstan halqy úshin dúbirli oqıǵalarǵa toly jyl bolmaq. Qazaq handyǵynyń 550 jyldyǵy, Táýelsizdigimizdiń 24 jyldyǵy, Fashısttik Germanııany jeńgenimizge 70 jyl t.s.s. Memleket deńgeıinde osyndaı orasan mánge ıe merekelermen qatar, bıyl Qazaqstanda kezekten tys Prezıdent saılaýy ótkiziletini taǵy bar. Al Elbasy óziniń bıylǵy joldaýynda "damyǵan 30 eldiń qataryna qosylý maqsatymyzdy" basa aıtqan bolatyn. Sondaı-aq,  2020 jylǵa qaraı qazaqstandyqtardyń jan sanyn 20 mıllıonǵa jetkizý de áldeqashan josparlanǵan.

Al Memleket basshysy qoıǵan mejeden kórinýge oblystarymyz daıyn ba? Osyǵan oraı,  Qamshy.kz  portaly saıtymyzda "Eń úzdik oblysty tańdańyz" degen halyqtyq saýalnama júrgizgen bolatyn. Saýalnamanyń talaptary boıynsha daýys berýshi – joly, ekonomıkasy, mádenıeti, baspasózi, týrızmi, medısına, HQK salalary boıynsha ózderine unaǵan oblysqa óz daýysyn bergen. Daýys berý ádil bolý úshin bir kompıýterden tek bir ret qana daýys berý múmkindigin usynǵanbyz.

Sonymen, Qazaqstannyń 14 oblysynyń ishinen eń úzdigin tańdaý qorytyndysy tómendegideı boldy.

Jalpy, saýalnamaǵa barlyǵy - 11 myńǵa jýyq adam qatysqan. Solardyń - 4000-nan astamy daýys bergen. 500-ge jýyq adam pikir jazǵan.

Biz júrgizgen saýalnama qorytyndysy boıynsha alǵashqy úshtikti Qyzylorda oblysy túıindeıdi. 600-ge jýyq adamnyń daýysyn jınaǵan Qyzylorda oblysy  Qyrymbek Kósherbaev myrzanyń tizgin ustaýymen biraz bıikterdi baǵyndyryp keledi. Esterińizde bolsa, «Jańaózen» qasireti kezinde osy Qyrymbek myrza Mańǵystaý oblysynyń ákimi edi. Iаǵnı osy oqıǵaǵa baılanysty biraz «jaman aty» shyqqan. Endi mine ózi týǵan óńiri Qyzylordanyń kóshin alǵa súıreýge myqtap kirisken sııaqty.

Al ekinshi orynda OQO jalpy esepte 1000-ǵa jýyq daýys jınaǵan.

Aıta keterligi –  Ońtústik Qazaqstan oblysynyń ekonomıkalyq ósimi óz aldyna. Ásirese, ákimshilik apparatyna Berik Ýálı myrza barǵaly beri ońtústiktegilerdiń ımıdji barǵan saıyn bıiktedi desek artyq aıtqandyq bolmas.  Atap aıtar bolsaq - Táýelsizdik merekesin toılaý, naýyryz meıramyn qarsy alý, eskertkishter, Jeńis soldattaryn 70 kún ulyqtaý, Qazaqstandyq ónimderdi qoldaý aksııasy sekildi mańyzdy sharalar jurtqa etene tanys.

Al saýalnama qorytyndysy boıynsha eń kóp daýysqa ıe bolyp,  daýys berýshilerdiń 30 paıyzǵa jýyǵy, ıaǵnı 1200 adamnyń daýysyn jınaǵan  Mańǵystaý oblysy – Qazaqstannyń eń úzdik oblysy atandy. Alık Aıdarbaev myrza basshylyq etetin oblys qalaı úzdik atandy? Biz Mańǵystaý oblysynda atqarylǵan birneshe ıgilikti jumystardyń tizimin jasap kórdik.

1. «Aq bulaq» baǵdarlamasyn iske asyrý nátıjesinde ortalyqtandyrylǵan sý júıesimen  qalalyq jerler - 87 %-ǵa, aýyldyq jerler - 28 %-ǵa qamtylǵan.
2. Turǵyn úı–kommýnaldyq sharýashylyǵyn jańǵyrtý baǵdarlamasy aıasynda bıylǵy jyly Aqtaý qalasynyń 2-shi, 3-shi, jáne 3-shi «a»  shaǵyn aýdandaryndaǵy 10 turǵyn úıde kúrdeli jóndeý jumystary júrgizilgen.
3. Oblysta «Balapan» baǵdarlamasyn iske asyrý nátıjesinde 3 jas pen 6 jas aralyǵyndaǵy sábılerdi mektepke deıingi tárbıemen qamtý júıeli qolǵa alynǵan.Iаǵnı bul kúnde balabaqshamen qamtý – 81 % bolsa, 2020 jylǵa deıin balabaqshamen qamtýdy 100 %-ǵa jetkizý josparlanǵan. Osy nátıjege jetý úshin bıyldyń ózinde 660 oryndyq 4 bala baqshanyń qurylysy bitip, paıdalanýǵa berilgen.
4. Bıylǵy jyly «Qoljetimdi turǵyn úı - 2020»baǵdarlamasynyń barlyq baǵyttary boıynsha 487 myń sharshy metr úıdi paıdalanýǵa berý josparlanǵan.  Qazirgi ýaqytta onyń 280 myń sharshy metri qoldanysqa berilgen. Bul ótken jylmen salystyrǵanda 30 %-ǵa artqan.
5. Mańǵystaý oblysynda jyldan jylǵa halyq sany da artyp keledi. Búginde oblysta 595 myń adam turady, al jyl saıynǵy ósim kórsetkishi 4%-dy quraıdy.

Sondaı-aq, óńirdegi jalpy ishki ónimniń qorytyndysy boıynsha turaqty ósim - 1 trln. 880 mlrd. teńgeni quraǵan. Jan basyna shaqqandaǵy jalpy óńirlik ónim boıynsha oblys basqa óńirler arasynda tórtinshi orynda. Al Mańǵystaý oblysyndaǵy eń joǵarǵy jalaqy kórsetkishi - 222 myń teńgeni quraıdy eken.

 «Bárekeldi» deıik! Is ilgeri bolsyn!

Al qaı oblystar kóshtiń sońynda qaldy? Qamshy.kz  portaly júrgizgen saýalnama qortyndysy boıynsha eń tómen daýys jınaǵan - Soltústik óńirler boldy. Jalpy daýys berýshilerdiń 0 paıyzyn jınaǵan SQO-ǵa bar-joǵy 13 adam daýys bergen. Al Aqmola oblysyna daýys bergenderdiń sany - 19 adam. Eń soraqy nátejıelerge ıe bolǵan  soltústik oblystardyń úshtigin Qostanaı oblysy bastap-aq tur. Qorytyndy nátejıede 1 paıyzǵa áýpirimdep júrip ilingen Qostanaı oblysyna ne bári- 38 adam daýys bergen. Kún saıyn 20 myńnan astam oqyrmany bar saıtymyzda júrgizilgen saýalnamaǵa Soltústik О́ńirlerden tym quryǵanda 50 adam ún qatpaǵanyna tańǵaldyq. Bul Soltústik Qazaqstan, Pavlodar, Qostanaı, Aqmola sııaqty óńirlerdiń Memlekettik tilge pysqyrmaıtynyn taǵy bir dáleldegendeı boldy. Soǵan qaraǵanda bul oblystar Prezıdent Nursultan Nazarbaev qadaǵalap otyrǵan, Soltústiktegi bos jumys orynyna Ońtústik turǵyndaryn tartý syndy Uly bastamaǵadada «pishtý» deıtin sııaqty.

Al Aqtóbe, Almaty, Atyraý, Qaraǵandy, Jambyl, Shyǵys Qazaqstan, Batys Qazaqstan oblystary ógiz ólmeıtin, arba synbaıtyn bel ortany kórsetti.

Árıne, «Eń úzdik oblys» tańdaýy munymen shektelmeıdi. Degenmen kúnine 20 myńnan astam oqyrmany bar, Qazaqstandaǵy qazaqtildi saıttardyń kósh basynda kele jatqan «Qamshy» saýalnamasynan da biraz nárseni ańǵarýǵa bolatyn sııaqty. Alda «Eń úzdik» aıdarymen áli talaı sańlaqtardy saraptaıtyn bolamyz.