MEN SIZDI JEŃISKE JETEDI DEP SENEMIN, NUREKE!

Asa mártebeli, Nursultan Ábishuly!

 Birazdan beri Qazaqstan halqy assambleıasy jaǵynan 2015 jyly merziminen buryn Prezıdent saılaýyn ótkizý týraly usynys túsip jatqany belgili. Qazir bul usynysty qoǵamnyń ár salasy, jekelegen zııaly qaýym ókilderi durys jasalǵan tańdaý dep joǵary baǵalaýda, jarysa ún qosýda.

Mundaı tarıhı, saıası máni zor máseleni, árıne, árkim óz kózqarasy, múddesi turǵysynan zerdeleıdi.

Biz shetten kelgen jáne kelýge qulshynyp otyrǵan qandastaryńyz úshin de bul tańdaýdyń orny tipti bólek.

Qazaq kóshi, alysta júrgen aǵaıyndy Atajurt Qazaqstanǵa shaqyrý – táýelsizdiktiń tańy jańa atqan sonaý alǵashqy jyldary-aq Siz qolǵa alǵan Uly bastama.

Sizdiń qamqorlyǵyńyzdyń arqasynda 2012-jylǵa deıin alys-jaqyn shetelden elimizge 952 882 etnıkalyq qazaq oralypty.

О́kinishke oraı, 2007 jyly Úkimet basyna K.Másimov kelgen kúnnen bastap, Qazaq kóshiniń basyna qara bult úıirile bastady. Sońy 2013 jylǵy tórt jylsyz azamattyq berilmeıtin zańnyń qabyldanýymen aıaqtady...

Siz osynaý saıası qatelikti birden ańǵaryp, halqyńyzdyń baǵyna týǵan ul ekenińizdi taǵy bir márte dáleldep, suńǵylalyq kórsettińiz! Qashannan bergi qalyptasqan kemeńgerlik bolmysyńyzdy áıgilep, ulylyq tanyttyńyz...

Araǵa alty aı salmaı jatyp, atalmysh Zań jobasyna ózgeris engizý týraly buıryq berdińiz. «Qandastarymyzǵa jol ashýymyz kerek. Qazaqtyń jeri keń. Ornalasamyn degen jerin ózi tańdasyn!»,- dep, bir-aq kestińiz!

Soltústikke ornalasqan jeti oblysqa keletin aǵaıyndarǵa erekshe qomqorlyq jasaý týraly sheshim qabyldattyńyz!

Mine, sonyń arqasynda, «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy qazir Májiliste talqylanýda.

Biz soǵan óz tarapymyzdan usynystar berýdemiz. QR Úkimeti jaǵynan shyǵarylǵan №111 Qaýlydaǵy eki kedergi alynyp tastalsa bolǵany, alystan keletin aǵaıynǵa dańǵyl jol ashylmaq.

Qazaq Eliniń aspanynda Azattyqtyń Kók týy jelbiregeli bıyl - 24 jyl.

Biz Sizdiń sol táýlsizdikti jarııalaı salyp, jarty aı ótpeı jatyp-aq: «Qymbatty otandastar! Ejelgi atamekeninen jyraqtap qalǵan Sizderdi keshegi kúnge deıin ata-baba jerine qaıtyp kele alamyz ba degen suraqtyń alańdatyp kelgenin men jaqsy bilemin. Týǵan jerdiń tútini de ystyq deıdi halqymyz. Qandas baýyrlarymyzdy baıyrǵy ata qonysyna tartý maqsatynda adam pravosy týraly elaralyq erejelerdi basshylyqqa ala otyryp, Qazaqstan Úkimeti «Basqa respýblıkalardan jáne shetelderden selolyq jerlerde jumys isteýge tilek bildirýshi baıyrǵy ult adamdaryn Qazaqstanda qonystandyrý tártibi men sharttary týraly» arnaıy qaýly qabyldady. Sondyqtan ata-mekenge kelemin deýshi aǵaıyndarǵa jol ashyq. Ata-baba árýaǵy aldaryńyzdan jarylqasyn!» dep aǵyńyzdan jarylǵan «Aq tilegińizdi» ómir boıy aýzymyzdan tastamaı, aıtyp kelemiz. Ár jazǵan maqalamyzǵa tuzdyq etýden jańylǵan kezimiz joq. Kún ótken saıyn, onyń quny arta túskendeı. Qazaq kóshine kóleńke túse bastasa, birden kóterip shyǵamyz...

Dúnıejúzi Qazaqtary qaýymdastyǵynyń 2002-jyly Túrkistan qalasynda ashylǵan ekinshi quryltaıynda Sizdiń bir jarym saǵat sóılegen jan tebirenterlik sózińiz jazylǵan vıdeony shań basqan arhıvten taýyp, sirgejıar bóligin qaıta-qaıta jańǵyrtýymyzdyń, el esine salýymyzdyń da basty sebebi – sol Sizge degen tileýlestiktiń belgisi.

Kórip otyrmyz, halyqtyń Sizge degen yqylasynda, seniminde shek joq. Sheshenderimiz bul joly da Sizge teń keler, Sizben oryn talasar eshkim joq dep jatyr. Solaı!

Degenmen, N.Á.Nazarbaev otyz jyl El tizginin ustaǵanda, bir izbasar tárbıeleı almapty dese, bul da jaqsylyqtyń nyshany emes-aý. Sonda, bireý: «Qazaqtyń altyn qursaq analary ne bitirip júrgen?!» dese, ne demekpiz?!

Árıne, qazaqta Abaı jalǵyz, Mahambet dara ekeni o bastan shyndyq!

Qudaıǵa táýbe! Otyz jylda Sizdiń tálimińizdi alyp, ýaqyttyń aýyr syndarynan qaımyqpaı ótken, qıyn kezeńderde qasyńyzdan tabylyp kele jatqan, prezıdenttikke laıyq azamattar joq emes, bar. Bireý emes, birnesheý! Dana halqymyz "at tuıaǵyn taı basar" degen. Qudaı jalǵyzdyqtan saqtasyn!!!

Qııýy qashyp, qısyny ketken salany birden qalpyna keltirip, jaınatyp jiberetin, týǵan halqyn týra Siz sekildi jan-júregimen súıetin Imanǵalı Tasmaǵambetov pen Birikken Ulttar Uıymy Bas hatshysynyń orynbasarlyǵyna О́zińiz arqasynan qaǵyp, shyǵaryp salǵan, dıplomatııanyń jiligin shaǵyp, maıyn ishken, bes tilde erkin sóıleıtin Qasym-Jomart Toqaev nege turady?! «Tynysh júrse» Ákejan men Ǵalymjan, tiri bolsa Altynbegińiz kimnen kem edi?! Odan bergi jas tulparlar Erlan Qarın, Berik Ábdiǵalıev, Baýyrjan Baıbekter de bolashaq El tizginin ustaıtyn jigitter.

Qaı-qaısysy da Sizdiń zor maqtanyshyńyz, senimdi serigińiz dep bilemiz.

Biraq, bári-bir, tańdaý men salmaq Sizge túsip tur. Nege?

О́te-móte, Ýkraınadaǵy shıelenisti sheshýde, TMD-daǵy tynyshtyqty saqtaýda Sizdiń rólińizdiń zor ekenine tórtkúl dúnıeniń kózi ábden jetti. Tulǵalyq bolmysyńyz tipti asqaqtaı tústi.

Sizdiń «Qazaqstan halqynyń sanyn 2020-jylǵa qaraı 20 mıllıonǵa jetkizemiz!» degen Uly úndeýińiz bar.

Qazaq kóshi, mine, pále-jaladan arylyp, qaıta jańǵyrý aldynda tur.

Sizdiń tikeleı bastamańyzben qurylǵan  Eýrazııalyq ekonomıkalyq odaq jumysyn jańa bastady.

Batys salǵan sanksııalardan bas kótere almaı qalǵan Reseıdiń Bizdiń ekonomıkamyzǵa áseri aıqyn kórine bastady.

Halqyńyz Sizdiń osy Uly josparlaryńyzdy oıdaǵydaı oryndap shyǵyýyńyzǵa múmkindik berýde, Nureke. Sonymen birge, EEO-ǵa baılanysty  tyǵyryqtan alyp shyǵýdyń da nyq senimi taǵy Sizge júktelip otyr.

Onyń ar jaǵynda «EKSPO-2017» jáne bar...

Jaqynda Qazaqstandaǵy blogerler alıansy Sizdiń prezıdenttik ókilettigińizdi 2022 jylǵa deıin sozatyn referendým uıymdastyraıyq degen bastama kóterdi.

Negizi, osy bastama óte oryndy sekildi.Sebebi, joǵaryda aıtylǵan uly jobalaryńyzdy, Alla amandyǵyn berse, Sizdiń keń kósilip, erkin eńserýińizge, soltústik aımaqty qara orman qandasyńyzǵa toltyryp úlgerýge mol múmkindik týady. Bul – bir.

Ekinshi jaǵynan, Táýelsizdiktiń tól týmalary jetilip úlgeredi.

Mysaly, 1991-jyly týǵandar 2022-jyly otyz jasqa kele bastaıdy. Mektepke barǵandar otyzdy eńserip, qyryqqa taıańqyrap qalady. Al, ýnıversıtetke túskender qyryqtyń qyrqasyna ilinip úlgeredi... Olar biz sekildi Stalın, Máo Szedý́n, Choıbalsandardyń shoqparyn jep óskenderden emes, Táýelsizdiktiń tól perzentteri. Tizginin Siz ustaǵan Egemen Qazaq Eliniń bodandyqqa sanasy ýlanbaǵan, otarshylyqqa júregi shaıylmaǵan naǵyz jaýjúrekteri. Keýdesi asqaq, rýhy bıik. Jatqa jaltaqtaýdy bilmeıdi! Siz jolǵa qoıǵan «Bolashaq» baǵdarlamasy arqyly álemniń barlyq elinen bilim men ǵylymnyń nárin jutqan, tájirıbeden ótken. Kezegi kelgende, memlekettik qyzmettiń qandaıy bolmasyn, shetinen dóńgeletip áketedi. Qazir de olardyń aldy ósip, mınıstrlik dárejeli kreslolarǵa otyra bastady...

El esinde bolsa, qazaqtyń asa kórnekti jazýshysy Qabdesh Jumadilov 1993-jyly jazǵan  «Bolashaqty boljaǵanda» atty maqalasynda «Kóne tarıhqa kóz jibersek, halqymyzdyń osyndaı dáýirlegen, basyna baq qonǵan kezderi az bolmaǵan. Sondaı jalaýly zamandardan keıingi urpaqqa: «Qasym salǵan qasqa jol», «Esim salǵan eski jol» degen eskertkishter qalypty. Sóz joq, bizdiń halqymyz qazir de sondaı jańǵyrý kezeńinde tur. Eger Perezıdent Nazarbaev osyndaı qıyn ótkelden surinbeı ótip, «Qazaqstan» atty kemeni qaqpa tastardyń eshqaısysyna soqtyrmaı, aman alyp shyǵar bolsa, ol tańdaǵan táýelsizdik joly da bolashaqta «Nursultan salǵan nurly jol» atalarynda kúmán joq! Iláıim, solaı bolǵaı! Kemedeginiń jany birge» degendeı, sol joldyń nurly da, baıandy bolýyna azattyq tańyn qatar turyp qarsy alǵan bárimiz de múddelimiz» («Qalyń elim, qazaǵym...» kitaby, Qazaqstan baspasy, 56-, 57-better) degen edi.

Qudaıǵa shúkir, Qazaqstanyńyzdy búginge deıin qanattyǵa qaqtyrmaı, tumsyqtyǵa shoqtyrmaı aman alyp keldińiz.

Biz qazir sol «Nursultan salǵan nurly jolǵa» ilinýdiń sońǵy basqyshtarynda turǵandaımyz.

Aldaǵy kúnderge aparatyn joba-jospar tas-túıin jasaýly!

Demek, Siz, qurmetti Nureke, «Qazaqstan» atty úlken kemeni osy táýelsiz urpaqtyń qolyna aman-saý amanattasańyz eken dep tileımin!

Alysta júrgen aǵaıynnyń Sizge, Sizdiń júrgizip otyrǵan dana saıasatyńyzǵa degen qurmeti bólek. Olar qandaı qıyn-qystaý jaǵdaıdy basynan ótkerip júrse de, О́zińiz aıtqandaı, halqymyzdyń asyl qazynasy-tól mádenıetin joǵaltpaýǵa, tilin, dinin saqtaǵa baryn salyp keledi. Qudaıǵa táýbe, ázirge deıin ózderi turǵan elderde ult aralyq qatynas pen qoǵamdyq tynyshtyqty qatań saqtaǵandarynyń arqasynda, Qazaqstannyń, ony basqaryp otyrǵan Sizdiń bedelińizge záredeı nuqsan jetkizgen emes. Qaıta bul jaǵynan bizge úlgi bolarlyq jaǵdaıda.

Mine, Qazaq memlekettiginiń 550 jyldyǵy toılanady degendi estip, Qytaı Halyq Respýblıkasynan 2014-jyldyń qyrkúıeginde Uly Jibek jolyn boılap, Taraz qalasyn betke alyp mádenıet kerýeni jolǵa shyǵypty. Kerýende 136 túıe, 10 at arba, 25 avtokólik jáne júzden asa kerýenshi bar kórinedi.

Bul da bolsa, Sizge, Otanǵa degen zor qurmettiń, saǵynyshtyń, qoldaýdyń belgisi!

Men óz basym shetten oralǵan qandasyńyz retinde de, aqyn retinde de, Qazaq kóshiniń janashyry turǵysynan da bıyl merziminen buryn Prezıdent saılaýyn ótkizý týraly túsip jatqan usynysty qoldaımyn.

Ári Sizdiń jeńiske jetetinińizge kámil senemin!

Alla Sizdi Jambyl atańyzdyń jasyna jetkizsin!!

Jaratqan Iem ÁLEMDEGI BAR QAZAQTYŃ BASYN negizin Siz óz qolymen qalaǵan táýelsiz Qazaq Elinde qosýǵa násip etsin!!!

Izgi nıet,

zor úmitpen,

aqyn

Aýyt MUQIBEK

 22-aqpan, 2015-jyl

Astana