Muǵalim: Dırektor vıdeoǵa túsirip, orynbasary búıirimnen tepti (VIDEO)

Shymkent qalasyndaǵy Ońdasynov atyndaǵy №38 mektep-gımnazııasynyń muǵalimi Júsipova Aıman Sultanbekqyzy Elbasy Nursultan Nazarbaev pen Bilim  jáne ǵylym mınıstri Erlan Saǵadıevke mektep basshylyǵy tarapynan qorlyq kórgenin aıtyp, ǵalamtorǵa vıdeoúndeý jarııalady dep habarlaıdy Qamshy aqparattyq agenttigi.

«Qurmetti QR Prezıdenti Nursultan Ábishulynyń nazaryna. Men Shymkent qalasyndaǵy Ońdasynov atyndaǵy №38 mektep-gımnazııasynyń muǵalimimin. Qazirgi tańda osy atalǵan mekteptiń basshysy Júsipova Aıman Sultanbekqyzy men orynbasarlary Asylbekova Dana Dúısenbekqyzy jáne Qozybekova Aıjamal Shardarbekqyzynyń tarapynan qatty qysym kórip otyrǵanymdy málimdegim keledi. Mektep basshylary osy jyldyń 4-12 sáýir aralyǵynda bizdi negizsiz iske jumsap, turǵyndardyń statýsyn anyqtaýdy mindettedi. Atap aıtar bolsam, turǵyndardyń jumys isteıtinin nemese istemeıtinin, habar-osharsyz joǵalǵan jáne sot tergeýinen qashyp júrgender bolsa, solardy anyqtadyq. Bul jumysyn atqaryp bolǵannan soń 8 sáýir kúni anamnyń halin suraýǵa aýylǵa ketken edim. Sol kezde mektep basshylyǵy maǵan habarlasyp ákimshilikten taǵy da jumys kelip túskenin aıtty. Jaǵdaıymdy aıtyp túsindirmek bolyp edim, tyńdamaq turmaq, ózime aıqaılap, «taksımen jetseń de dereý jet, jetpeseń basshylyqtyń aldyna alyp baramyn» dep tutqany qoıa saldy. Men ol kúni jete almadym. Keıinnen 10 sáýir kúni mektepke kelgenimde mektep dırektory orynbasarlarymen kabınetke kirgizip alyp, jeke basymdy qorlady, quqyǵymdy taptap, namysyma tıdi. Bul isterimen qoımaı, endigi senimen bolsyn dep meni qorqytty...» - dep ishtegi kúıigin ashyna jetkizdi muǵalim.

Mektep muǵaliminiń aıtýynsha, keıin de mektep basshylyǵy bul kisiniń jeke basyna tıisýlerin qoımaǵan. Qatty qysymǵa shydaı almaǵan muǵalim qan qysymy kóterilip, qulap qalǵan kezinde dırektordyń orynbasary búıirinen teýip, al dırektordyń ózi muǵalimdi vıdeoǵa túsirip qorlaǵan.

Ashynǵan muǵalim mektep ujymyndaǵy ózge muǵalimder jeke bastary úshin qorqyp, ózinen alshaqtaı bastaǵandyǵyn da jetkizdi.

Facebook áleýmettik jelisinde taralǵan bul vıdeo jaýapty tulǵalardyń qulaǵyna jetip, bir shara qoldanady dep senemiz.

Esterińizge sala ketsek, bilim mınıstri E.Saǵadıev myrza mektep muǵalmderi endi ózderiniń mindetterine jatpaıtyn jumystarǵa jegilmeıdi dep málimdeme jasaǵan bolatyn. Alaıda, bul sózge qulaq asyp otyrǵan basshylyq joq sekildi. Muǵalimderdiń quqyǵyn qorǵaý úshin jaýapty tulǵalardyń jáne oqyrman nazaryna mektep muǵaliminiń bar jaǵdaıyn ashyna jetkizgen vıdeosyn usynamyz.

Qamshyger: Nazerke Labıhan