Qanat Islam: Amerıkadaǵy Qazaq elshiliginen «Ýaǵalaleıkýmassalam» degendi estigende, Otanymnyń baryna sheksiz qýandym

 Turanker: Qosh keldińiz Qanat aǵa! Eldi saǵyndyńyz ba? Shette júrgende sizdiń saǵynyshyńyzdy ne basady??

- Árıne, eldi saǵynamyn. Biraq,  ol jerde basty maqsat qazaqtyń namysyn bermeý, nátıje men tabys. Ol úshin kóp jattyǵý, tynbaı eńbektený kerek. Shynyn aıtsam el-jurtym dep saǵynýǵa ýaqyt ta taba almaısyń.

Arys: Assalaýmaǵaleıkúm jerlesim, bala kezińde, Qabada sendermen birge Abzal deıtin bala daıyndalǵan ba edi? Ánshi Qajymuratpen aralasyp turasyń ba? Rahmet!

- Ýaǵalaıkúmassalam! Abzal qazir Almaty qalasynda.  Eki balaǵa áke bolyp, aman-saý júrip jatyr. Qajymurat aýyldasym ǵoı, jaqsy syılaımyn.

Aına: Amansyz ba Qanat aǵa?! Sizdiń elge kelgenińizdi estip qýanyp qaldyq, AQSh-taǵy kúnderińiz qalaı ótti, sizdiń qol jetkizgen jeńisterińizge dán rızamyz, ár qashan sizdiń jeńis týyn jelbiretken kezińizde marqaıyp qalamyz, talmańyz aǵa, jeńiske jete berińiz!?

- Tilegińizge rahmet! Ol jaqtaǵy kúnderimiz tek qana daıyndyqpen, tynbaıtyn jattyǵýmen ótti,  ár sátim jeńiske degen umtylys qana.

Dastan: Aman oraldyńyz ba batyr baýyrym, maǵan sizge AQSh-taǵy jasalatyn kútimniń jaıy qyzyq, qansha degenmen de jyly jumsaǵyn aldyńyzǵa tosatyn anańyz qasyńyzda emes, qazy-qarta, jal-jaıasyn daıyndaıtyn kóp qazaq ta joq onda, jalpy densaýlyǵyńyz qalaı? Ol jaqtaǵy kútim kóńildegideı me??

- Allaǵa shúkir, densaýlyǵym jaqsy. Árıne, qazaqtyń qanyna sińip ketken tamaǵy - qazy-qartany saǵynasyń. Bizdiń el «ólesiń» desede et jeıtin halyq qoı. Degenmen, ol jaqtaǵy negizgi tamaq balyq pen taýyq jáne túrli kókónis. Mende tamaq tańdap jeý quqyǵy joq, talap etilgen tamaqty jeımin. Kútim oıdaǵydaı, alańdaýshylyǵyńyzǵa rahmet!

Kemel Qarataı: Qanat inim, qalyń jaqsy ma? Aınalaıyn jalynyń sónbesin, arynyń basylmasyn! Bul joly qansha ýaqyt bolmaqsyń elde, munda qashan bir jola kelesin, kóńil-kúıiń qalaı?

-  Jaqsymyn aǵa. 20 qyrkúıek meniń promoýterim keledi, 30-yna  deıin birge  qaıta ushyp ketýimiz múmkin. О́ıtkeni maǵan demalýǵa bolmaıdy. Bir kúndik demalysym 10 kúndik jattyǵý eńbegimdi joǵaltady. Kózdegen bıik, alǵa maqsat oryndalsa, shetelde bir kúnde turmaımyn.

Jeksen:  Qanat, sizdiń sońǵy jekpe-jegińizde “Allahýakbar! Alǵa, Qazaqstan!” dep aıǵaılaǵanyńyzdy estigen sátte erekshe tebireniske túsip kettim, sizdiń qarsylas shydatpaıtyn bilegińizdi emes, Qazaqstandy, Qazaqty súıetin júregińizdi qatty syılaımyn, ámánda aman júrińiz, mereıińiz ústem bola bergeı, qasqaıyp bar Qazaqtyń qanaty bolyp júre berińiz! Qoıatyn suraǵym, sheteldik BAQ sizden jıi suhbattar ala ma? Sheteldiń basylym betteri siz týraly qalaı jazady??

- Peıilińizge alǵys bildiremin. Iá, meniń jeńisterim týraly «Domınıka Kolýmbııa», «Ekýator Amerıka» basylymdarynda shyqqanyn estidim.  «Keldi, qysqa ýaqytta úlken nátıjelerge jetti, rekordtarǵa qol jetkizdi»  dep jazyp jatatyn kórinedi.  

Dúısenbek: Assalaýmaǵaleıkým Qanat aǵa, sizge árqashan amandyq tileımin. Kelesi jekpe – jegińiz qashan bolady jáne odan keıin chempıondyq ataqqa talasýǵa múmkindigińiz barma?

- Shynyn aıtqanda osy jolǵy jarys chempıondyqqa talasýdyń kelip turǵan múmkindigi edi. Biraq meni áýesqoı boksta bári tanyǵanymen, kásipqoı boksta qazirge men eshkim emespin. Kásipqoı bokspen aınalysqan  eki jyldyń ishinde men basqasha Qanat boldym. Meniń promoýter, jattyqtyrýshylarym osy ataǵymdy qorǵaýym kerek ekenin, WBA reıtınginde dárejem taǵyda kóterilýi kerek ekenin aıtyp, chempıondyq saıysqa jibermeı otyr. Kelesi kezdesýden keıin chempıondyq ataqqa talasamyn, Alla buıyrtsa. Endigi kezdesýdi qazannyń 30-y dep josparlap otyrmyz, ózgerýi de múmkin.  

Amanjol: Týǵan jurtyńyzdyń, otanyńyzdyń taǵdyryna alańdaıtynyńyz anyq, negizinen qandaı qazaq baspasózderin qaraısyz, kitap oqýǵa, ınternet qaraýǵa ýaqytyńyz bolyp jata ma?

- Árıne, ýaqyt bola qalǵan kezde Qazaq eliniń jańalyqtaryn, Qytaı qazaqtarynyń basynda bolyp jatqan oqıǵalardy qalt jibermeı oqyp otyramyn. О́ıtkeni óz elimniń taǵdyry árqashan nazarymda. Elden jyraqta júrip, beıjaı otyra almaısyń.

Altynbek TО́RE: Assalaýmaǵaleıkúm, Qanat baýyrym! meniń ózińe qoıatyn 3 suraǵym bar edi: 1) endi shamamen qansha kezdesý ótkizýiń kerek chempıon bolýyń úshin? 2) Nege bizdiń elden barǵandardyń barlyǵy WBA tujyrymy boıynsha bokstasady? nege WBC-ten bastamaıdy nemese sol tujyrymnyń chempıony bolýǵa talpynbaıdy? basqa tujyrymnyń chempıondyǵyna talasýǵa qandaı kedergiler bar? 3) Úshinshi sábıiń AQSh-ta dúnıege kelipti, baýy berik, óskende saǵan serik bolsyn! AQSh zańy boıynsha ol birden sol jaqtyń azamattyǵyn aldy. bolashaqta balalaryńdy AQSh-ta qaldyryp, sol jaqta birjolata ósirip, sol eldiń jergilikti turǵyny qylý josparda bar ma?

- Alǵashqy suraǵyńyzǵa joǵaryda jaýap berildi. Chempıondyq ataqqa kelesi básekeden soń-aq talasa alamyn. Al, tujyrymdama boıynsha eshqandaı kedergi joq. WBC, WBA, WBO, IBF  tujyrymdamalarynyń kez kelgenin tańdaýyńa bolady. Degenmen boksshynyń kelisim-shartqa otyrǵannan keıin tańdaý quqyǵy bolmaıdy. Basynda jumys qalaı bastaldy, solaı kete beresiń. Onyń ústine birden bárine shamań kelmeıdi, dárejeń kóterilip, kóp kezdesý ótkizseń kez kelgenin alýyńa bolady. Mysaly Genadıı Golovkın bireýin alyp, endi ekinshi tujyrymdamada bokstasyp júr. Meniń de kelesi jyldan bastap WBC boıynsha baq synaýym múmkin. Balalaryma kelsek, bolashaqta AQSh-ta qalmaıdy, olar da Qazaq eli úshin jumys isteýi kerek. AQSh-taǵy jumysym aıaqtalǵan kezde olar da menimen birge Otanyna oralady.

Zekeı.E: Qanat baýyrym alla amandyǵyńdy bersin! Men seniń Erlan aǵańnyń 新疆大学 de qatar oqyǵan sabaqtasy bolam, aǵań Erlan qazir qaıda? Eger múmkin bolsa [email protected] ǵa qat jazyp habarlassyn. Al ózińe qoıar suraǵym ári tilegim alla qalasa kásiptik bokstan álem Chempıony bolyp armanyń oryndalsa kelesi qadam qazaq jastaryna bokstan jeke mektep ashý bolar? ári solaı isteseń degen ótinishim bar!

- Ámın, Erjan aǵa. Aǵam Erlan qazir osy jaqta, elge kelip eńbek etip, shákirt tárbıelep jatyr. Ol kisiniń biraz ýaqyt buryn osy «Qamshy» portalynda suhbaty jarııalandy. Maqsat etken jeńisterge jetken soń men de qara domalaqtardy shynyqtyrýǵa den qoıatyn bolamyn.

- Kókshoqy: Qanat qazaq! Men seni osylaı ataǵym keledi. Sen qazaqsyń, qazaq sen. Sondyqtan seniń amanatyń aýyr. tek judyryqtasyp qana eldiń azamaty ataný azdyq etedi. Búkil Alashtyń azattyǵyn, Qazaqstannyń erteńin oıla. Men bilemin. Shetelden kelgen ár qazaq óz álinshe jumys atqaryp jatyr. Endi judyryqtaı jumylyp, qazaqtyń baqytty bolashaǵyn jaratýǵa qyzmet etýge tıissińder. Meniń sózime kelisesiń be? Amanatty arqalaýǵa daıynsyń ba? Al qalyń qazaq seniń arqasúıeriń. Saspa!

- Senimińizge, qurmetińizge rahmet! Bári de aldaǵy ýaqyttyń enshisinde. Alla qalasa el úshin qolymyzdan kelgenin aıanyp qalmaımyz.

Alań: Táýelsizdik eń uly qundylyǵymyz desek te,osy 23 jylda qazaq sıyrdyń búıregindeı qyryqqa bólindi. Taza qazaq, shala qazaq, oralman qazaq, jergilikti qazaq, salaf qazaq, sofy qazaq…. qoıshy, qolyna tússe bir-birin aıaıyn dep otyrǵan joq. О́ziń qandaı pikirdesiń? Qashan, qalaı bir aýyzdy, bir tilekti bolamyz. Elimizdegi dinı ahýalǵa kózqarasyńdy bilgim keledi. Alda-jalda Alashtyń ózi dinı alaýyzdyqqa urynsa, qaı ustanymda bolasyń?

- Biz memleketi bar ultpyz jáne osy memleketti urpaqqa aman jetkizý – kez kelgenimizdiń moınymyzdaǵy paryz. Memleket bárimizdiń úıimiz, alaýyzdyqqa urynyp, óz úıinen dalaǵa júgirgen adamǵa ne deýge bolady?! Ýaqyttyń synynan ótip, tek birliktiń ǵana qazaqty «ushpaqqa» shyǵaratynyn shyn túsinetin kez keledi dep oılaımyn.

Orys: О́zge saladaǵy “Qanat Islamdardy” ataı alasyń ba? álde shetelden kelgen qazaq tek sportta ǵana ózin dáleldedi me?

- Shetelden kelgen baýyrlarymyzdyń arasynda óz salasynyń maıtalman mamandary az emes, ony sanamalap jatýdyń qajeti de joq. Olar áli de eline eńbek etedi, áli de shetelde júrgen myqty qazaqtar elge keledi.

Abylaı: Eldiń úmit artqan azamaty retinde Qazirgi Qazaqstannyń eń úlken úsh artyqshylyǵy men úsh kemshiligin atap bershi…

- Qazaq eliniń ózgelerden ozyq tustaryn úsheýmen shekteý qııanat bolar. Al meni eń alańdatatyny joǵaryda aıtqandaı qazaqtyń aýyz birshiligi men ana tiliniń búgingi jaıy. Sondyqtan, kez kelgen qazaq azamaty «meniki ǵana durys» degendi qoıý kerek. Al óz elinde, óz Otanynda júrip ózge tilge erik bergen, ana tilin aıaqqa taptaǵan azamattardy túsinbeımin. Til – árbirimizdiń abyroımyz, bedelimiz jáne urpaǵymyzdyń bolashaǵy. Tilimizdi syılata almaı otyryp, ózimdi syıla deý – bekershilik.  

Ertýǵan: Bizdiń qazaqtyń ǵana sportshylary, ónerpazdary saıasatqa sarań kele me? álde ash páleden qash pále dep júre bere me? Nege el namysy tarazyǵa túsken sátterde bir aýyz “myńq” etýge jaramaıdy? Pýtın memleketiń joq dedi, Jırınovskıı Qazaqstandy basyp alý kerek dedi… oıyna kelgen ottap jatyr. Osylarǵa jaýapty tek jýrnalıster ǵana berý kerek pe?

 - Men azamat retinde el namysyn kóterýge qashan da daıynmyn. Al sportshy retinde aıtar bolsam, meni áli álem tanyǵan joq. Birdeńe aıtý úshin sózińniń dalaǵa ketpegeni, sózińmen tyńdaǵan jurt sanasatyn bolýy kerek. Bul turǵydan meniń saıasatqa aralasýym ázirge erte. Biraq tarıhtyń tarazysy, ósip kele jatqan urpaq – memlekettiligimiz týraly aıtylǵan árbir sózge jaýap alatyn bolady.

Álıjan: Kelesi kezdesýińiz 13 qazanda bolady dep estidik, kimmen judyryqtasatynyńyz sheshildi me? Jeńisterińizdiń ekonomıkalyq paıdasy qanshalyq?

 -  Meniń kezdesýim 30 qazanǵa josparlanǵany týraly joǵaryda aıttym, menimen kolýmbııalyq jáne amerıkalyq eki boksshynyń bireýi kezdesýi múmkin. Alaıda kimmen judyryqtasatynymdy men sheshpeımin. Men baq synap júrgen WBA tujyrymy boksshylardy ózderi saralaıdy. Olar árıne upaılary, jeńisteri jaǵynan deńgeıles boksshylardy básekelestiredi. Ázirge jeńisterimniń ekonomıkalyq kirisi  bolǵan joq.

Muhtar: Assalaýmaǵaleıkúm Qanat myrza, sizdiń qanjyǵańyz ár maılanǵan saıyn biz de qýanyshqa kómilip jatamyz, qýanyp qana qoımaı Alladan amandyǵyńdy tilep júremiz, ıláıim eshqashan mysyń qurymasyn! Suraǵym araǵa birneshe jyldar salyp, amandyq bolyp osy bokstyń bar belesin baǵyndyrsań elge kelip, el tizgininiń bir shetinen ustaý týraly oıladyń ba, men seni Ýkraınanyń Vıtalıı Klıchkosy sııaqty kóremin, sen sııaqty jigitter qashan da elge kerek, sebebi eldi aqyldy, aqshalylar ǵana emes aıbarlylar da basqarý kerek! Bulaı dep moınyńa kóp júk artsam aıyp etpe, alaıda sen áli de Qazaqtyń bıiginde jarqyraıtyn juldyzy bol!

-  Ystyq yqylasyńyzǵa úlken rahmet! Shyndyǵyn aıtqanda bárimizdiń istep júrgen jumysymyzdyń túpki maqsaty - elge bir septigi tıse eken degen talpynys. Erteń bul jerde siz ben meniń urpaqtarymyz, urpaǵymyzdyń urpaqtary alańsyz ómir súrýi kerek, ol úshin biz olarǵa birdeńe qaldyra alýymyz qajet. Bul turǵydan men de qolymnan kelgenin aıanyp qalmaıtyn bolamyn. Nege biz orysqa jaltaq bolýymyz, bolmasa basqa bireý kelip nege bizge ústemdik kórsetý kerek? Osy sebepten de bárimiz basqalardy bizben sanasýǵa májbúr etýge tıispiz, ol úshin áli kóp ter tógilýi kerek. Árbir azamat ózi isinde «shyńǵa» shyǵyp, myqty qazaq ekenin dáleldeı alsa biraz máseleler ózdiginen sheshiletin bolady.

Aqylbaı: AQSh jerinde júrgende jadyńa ne túıdiń Qanat, ne úırendiń jat jerden, Qytaıda boldyń, AQSh-ta boldyń, Qazaqstannyń olardan eń basty qabyldaý kerek tájirıbesi ne bolýy múmkin, Qazaqstandy aıtyp maqatanaıyn deseń maqtanatyn eshteńe tappaı qalyp qysylatyn kezderiń bola ma?

-  Qytaıdy alyp qaraıtyn bolsaq, olar damýynyń alǵashqy qadamdarynda yntymaqty, tynyshtyqty uran qylyp jiberdi. Sonyń arqasynda on jyldyń ishinde álem sanasatyndaı taýar óndirýshi derjava boldy. Sóıtip tynyshtyqtyń, ózara yntymaqtyń jemisin kórdi. Al, Amerıkaǵa qyzyǵatynym - ondaǵy adamdar ózderi jasap jatqan memlekettiń zańyn qatty qurmetteıdi, qatal baǵynady. Buǵan árıne Amerıka óziniń memleket bolyp qurylý jolyndaǵy birneshe ǵasyrda áreń qol jetkizdi. Al bundaı memleketterde ózińniń jańadan ǵana qabyrǵasy bekip kele jatqan memleketińmen maqtaný qıyndaý. Eń bastysy - elimizdiń irgesin shaıqaltyp almaýymyz kerek.

Nazgúl: Qanat aǵa jaraısyz! Bul jaqtaǵy Baqtııar Artaev, Ardaq Nazarovtar sizge habarlasyp qalińizdi bilip tura ma?

- Iá, aman-saýlyǵymyzdy bilip, jaǵdaı surasyp turamyz.

Jýldyz: Maıamıde daıyndyq qaı tilde bolady sizderde, aǵylshynyńyz qalaı, jetilip qaldy ma? Balalaryńyz erjetip keledi, ol jaqta qazaq az, olardyń tárbıesin qaıtyp jatsyz, tilderi qazaqsha shyǵyp jatyr ma?

-  Daıyndyq aǵylshyn tilinde júriledi. Sondyqtan óz salama, kúndelikti turmysqa qajetti sózderdi ıgerdim. «Aǵylshynsham» kúnnen kúnge jaqsy bolyp keledi. Al balalarym qazaq tilinde sóıleıdi, qazaqsha oılaıdy. О́ıtkeni biz otbasymyzda tek qazaq tilin ǵana qoldanamyz. Onyń ústine jastary áli kishkene, mektepke bara qoıǵan joq.

Berikbol: http://qamshy.kz/?p=63 Myna siltemede osy saıtpen alǵashqy ınternet-konferensııada bolǵanyńyzda: – eger, London olımpıadasyna barsam Qytaıdaǵy biraz laýazymdy ornynan keter edi depsiz. Jalpy Qytaıǵa baryp turasyz ba, ol jaqta birge daıyndalǵan, birge júrgen ulty qazaq emes dostaryńyz barma?

-  Árıne, aıtady ǵoı, «Ulttyń jamany joq, adamnyń jamany bar» dep. Qudaıǵa shúkir eki eldiń yntymaǵy jaqsaryp keledi. Qytaı bolsyn, uıǵyr bolsyn jaqsy dostarym bar, habarlasyp, halimdi bilim turady.  Sportta birge bolǵan barlyǵymen dos retinde, adam retinde jaqsy syılasyp turamyz.

Shoqpar: Rıo-de-Janeıroda 2016 jyly bolatyn jazǵy olımpııada oıyndaryna qatysasyz ba aǵa, Qazaqstan atynan shyǵatyn shyǵarsyz ıá?!

-  Qatyspaımyn.

Oralbek Almas: Alash aspanynan ushyp, muhıttyń arǵy jaǵynda judyryq túıistirip júrgen baýyrymyz úshin barlyq qazaq maqtaný kerek. Jaraısyń qandas, tek qana alǵa!!!!!!

- Rahmet, Almas.

Aýyt Muqıbek: QANAT ISLAMǴA

Qanat inim qaı qurlyqta júr eken,

Alash jurty, oǵan jeńis tile sen!

Keseń eger tolyp tunyq baqytqa,

Deseń eger shyn jarysqa ilesem!

Ýaqyt ózi arnasymen dóńgeler,

Shyn batyrǵa asqar shyń da jol berer.

Sen emes pe eń, anaý alys qıyrdan,

Qazaqstan, qaıdasyń dep kelgen er!

Shyn batyrsyn, Ospandaıyn batyrsyn,

Bes qurlyqqa jetti seniń atyń shyn.

Qazaq týyn jelbiretip bıikte,

Kezdeskendi qyryp kele jatyrsyń!

О́mirińe qoıǵan jansyń belgi sap,

Sen otyrǵan sanaımyn men tórdi taq!

Bir qysýǵa jaramady seni kep,

Ilıany qushaqtaǵan Keń qushaq!

Emes ediń sen, árıne, bótenim,

Jetpegenin keshesiń be jeteniń?!

Bir súıýge jaramady seni kep,

Manezany súıgen anaý Ot erin!

Seni alyp О́r Altaıdan shyqqan jol,

Ary asyrdy qalasynan Ystambul.

Bir qysýǵa jaramady qolyńdy,

Shyn Shan Lonyń qolyn kelip qysqan Qol!..

Saǵan baqyt tilegenmen qurbyń ár,

Shettegi eliń – shynymenen muńlylar.

Týǵan Otan tuǵyryna tartpasa,

Bul qorlyqqa sen jylamaı, kim jylar!

Bul sumdyqqa qalaı ǵana shydaısyń,

Bolyp qaldy Qazaqstan túbi aıqyn.

Estidiń be, kele jatyr kún týyp,

Bes mıllıon qazaq túgel jylaıtyn!

Soqpaq ta joq, biz júretin jol turmaq,

Depýtatyń shetterinen solqyldaq.

Nıette eken Qazaqstan kóz jaspen,

Qurǵap qalǵan Aral sýyn toltyrmaq!!!  - Astana. 2013

-  Yqylasyńyzǵa rahmet, aǵa!

Janyashyr Demeý: Ustamdylyq pen Sáttilik! Golovkınmen birge jattyǵý josparda bar ma? Qazaqstandy qanshalyqty biledi eken ol jaqta? Qazaq tili keń kólemde ótimdi, kerekti bolý úshin ne qajet, óz taldaýyń?

-  Árıne. Boksta myqty bolýyń úshin sondaı myqtylarmen birge jattyǵýyń kerek. Aldaǵy ýaqytta birge shynyǵý oıda bar. Al, Amerıkanyń jurty Qazaqstandy keremet biledi eken dep ótirik aıta almaımyn. Olar kóbinese tek alpaýyt elderdi ǵana tanıdy. Qazaq tiline kelsek, eń bastysy, óziń óz tilińde sóıle, sosyn ózge ulttan talap et.

Yqylas-Qoja: Assalamý aleıkým Qanat aǵa! Qosh keldińiz. Siz naǵyz qazaq dep bas barmaqpen maqtana kórsetetin azamatsyz. Asyra maqtaǵandyq emes, ony siz isińizben de, sózińizben de dáleldep júrsiz. Allanyń bergen kúsh qýatymen jeńgen ár jeńisińizge shúkir etip qýanamyn. Jaratýshy Iemiz basyńyzǵa hıdaıat, júregińizge tereń ıman, bilegińizge kúsh-qýat bersin! Alla Taǵala sizge otbasyńyzǵa eki dúnıeniń baqytyn bersin! Amın!

-  Ámın, Alla razy bolsyn!

Qolqoıýsyz: Seniń bolatyn jekpe-jekterińdi nege aldyn ala habarlamaısyń? Eger aldyn ala qashan jáne qaıda bolatynyn bilsek múmkin ınternetten izdep kórer edik. Vıdeolaryńdy da shyǵaryp turý kerek. Komandan jáne Nelson Lopes qashan osylardy qolǵa alady?

-  Barlyǵyn endi qolǵa alyp jatyrmyz. Osy jolǵy elge kelýdegi basty maqsatym da sol. Alla qalas, aldaǵy kúnde árbir saıysymdy kóre alatyn bolasyzdar.

E.Tóleýbaı: Assalaýmaǵalaıkúm! Bul joly qansha ýaqytqa demalysqa keldiń? Kelisim-shart jaıly ne deısiń, 2 jyldyq kelisimniń ýaqyty aıaqtaldy ma? Kelesi jekpe-jekter kimdermen , qashan? Qanshaýy belgili ázirge?

-  «2 jyl» dep kesip aıtarlyq kelisim joq. Basqa suraqtaryńyzǵa joǵaryda jaýap berildi.

Sendep: Qanat Islam aldymenen qazirge deıin jetken jetistikterińe qutty bolsyn aıtamyn,ózińe qoıar saýalym: О́zińniń kótergen jekpe-jekterińdi ýaqyty ótkennen keıin ǵalamtordan bilip jatamyz，keıde taǵatymyz taýsylyp «Nelsons» promoýterlik kompanııasymen habarlasyr mán-jaıdy bilip jatamyz，boxrec.com saıtyna da artynan tirkelip jatady，«Nelsons» promoýterlik kompanııasynyń saıtynyń jańalanýy da óte baıaý，qazir saıt jabylyp qalypty， qýanarlyǵy qazaqstanda eki azamat ózińniń jekelik saıtyńdy ashqaly jatypty，meniń bilgim kelgeni jekpe-jektiń aldy-artyndaǵy aqparattyq úgit jumysta kim jaýapty?

-  Aqparattyq úgit jumystaryna promoýterlik kompanııa jaýapty, jumystyń sapsyna da solar jaýap beredi.

Shádıar: Týǵan kúnińizben aǵa, sizdiń úsh balanyń ákesi deıdi, balalaryńyz týraly aıtyńyzshy, sizge tartqany bar ma? Erteń bokser bolam deı me olar?

-  Olar áli kishkene ǵoı, men úshin bastysy qazaq bolyp, ımandy bolyp erjetkeni kerek. О́mirdegi tańdaýlaryn ózderi jasaıtyn bolady.

Sendep: Qanat ózińniń jekpe-jekterińdi qashan HBO , Showtime qatarly tele arnalardan kóre alamyz，chempıondyq beldikke alla qalasa neshe kezdesýden keıin ， qansha ýaqytta talasýyń múmkin. Qazaqtyń kók baıraǵyn áýeletip,elińdi álemge tanyta ber. Ár qashan súıinshili habaryńdy qazaq halqyna jetkizip keldim，álem chempıony bolýyńa tilektespin.

-  Tilegińizge rahmet!

Sendep: 1. Astana prezıdenttik sport klýbymen kelisim-shart qalaı bolyp jatyr， alda olardan qarjylaı qoldaý bolama? 2.Basqa tujyrymda，basqa salmaqta baq synaý josparda bar ma?

-  Mende sony kútip otyrmyn, áli sheshilgen joq. Basqa tujyrymda baq synaý týraly joǵaryda aıttym. Árıne aldaǵy josparlarda bar.

Sultan Janbolatov: О́zińe álgi súıekten músin jasaǵan jigtpen birge bolaǵnnan soń kezige almadym. Biraq birge júrgendeı-aqpyn. Saǵan ǵana emes, ınternetke de rahmet! (meniń blogymda http://ramazanuli.blogcn.com/ da barsyń).18 jeńisińe 18 ret qýandym desem az aıtqan bolarmyn. Jalǵyz-aq úmitim men tilegim bar. Ol – densaýlyǵyńa asa muqııat ta quntty bol! Dárigerler aqylyn qulaǵyńnan túsirme! Sóıtip júrsiń be? Alla jar saǵan! Ultjandylyq – keremet rýh!

-  Alań kóńilińizge, aq tilegińizge úlken rahmet, aǵa! Mindetti túrde keńesińizge qulaq asamyn. Sizge de Alla kúsh qýat bersin! Ǵumyryńyz uzaq bolsyn!

Qýatjan: Aǵa siz eki jyldan beri sheteldesiz, vıza máselesin qalaı sheship jatyrsyzdar?

-  Bári de zańdy túrde sheshilip jatyr.

Nurǵalı Nurtaı: Assalaýmaǵaleıkúm Qanat aǵa! AQSh-ta turǵylyqty qazaqtar baryn estıtin edik, ol jaqtaǵy qazaqtar sizge sálemdesip kelip tura ma? Nemese ózińiz izdep baryp aralas-quralastyq jasaısyz ba? Qazaqstannyń ol jaqtaǵy elshiliginen sizge qoldaý-kómekter bar ma?

-  Árıne, ol jaqtaǵy bolsyn, onda joly túsken qazaqtar bolsyn sálemdesip, yqlastaryn bildirip turady. «Jarystaryńa shaqyr, kóreıik, qoldaý bildireıik» dep jatady. Elshilikpen de habarlasyp turamyz. Qyzym týylǵan kezde qujat jóninen keńes surap telefon shaldym.

 – Allo, Assalaýmaǵaleıkúm, - desem,

- Ýaǵalaıkúmassalam, - deıdi qońyraý kótergen elshilik qyzmetkeri. Ondaı sózdi Amerıkada turyp estigende qatty tolqydym.

Keremet qoı, muhıttyń ar jaǵyndaǵy alyp elde seniń memleketińniń elshiligi bar. Saǵan ıe bolatyn Otanyń bar.

– Qazaqsha sóılesýge bolama? – desem,

- Aıta ber, baýyrym! – deıdi. Maǵan odan artyq ne kómek kerek bolsyn?! Bul meniń esimde qalǵan Amerıkadaǵy eń áserli jaǵdaı.

Zarına: Sálemetsiz be aǵa! Qazaqta batyr týsa el yrysy deıdi, siz búginde eldiń namysyn kóterip júrgen batyrsyz. Bizdiń ultta qaı-qashanda da batyrdyń birneshe áıeli bolǵan, sizde jeńgemizdiń ústinen áıel alý týraly oılar bar ma? Jeńgemizdiń oǵan degen pikiri qalaı? Jalpy, kóp áıel alý degenge qalaı qaraısyz, qazaqtyń kóbeıgeni jaqsy ǵoı!

-  Qazaq qyzdarynyń basqa ult ókilimen ketip bara jatqanyn kórsem, qatty qyzǵanamyn. Áketip bara jatqandy emes, ilesip bara jatqan qaryndasymdy aıaımyn. Namystanamyn. Judyryqpen sheshile salatyn bolsa ǵoı... Al, ekinshi áıel máselesin oılaıtyn bir mınýt artyq ýaqyt joq. Múmkindik bolyp jatsa nege taǵy bir arýdyń jary bolmasqa?! Islam dininiń qaǵıdalaryna saı, múmkindigi jetip turyp, ekinshi áıel alǵandardy áıelqumarlyqtan emes, ulttyn erteńin oılaǵan, qazaq qyzdarynyń jat qolynda ketýine jol bermegen dep túsinetin ýaqyt jetti. Kóp áıel máselesin bylaı qoıǵanda, jasy birazǵa baryp qalǵansha boıdaq júre beretin jastar da «men ultyma ne berip jatyrmyn?» dep oılanýy kerek.

Baıan: Osy saıtta jarııalanǵan aǵańyzdyń suhbatyn oqyǵanbyz, onda sizdi Alla buıyrtsa álem chempıony bolady dep úlken úmit artyp otyr, biz sizdiń Álem chempıony bolatynyńyzǵa senemiz, suraǵym boksshy úshin álem chempıonynan da bıik ataq bar ma? Iаǵnı siz Álem chempıony bolǵan soń qandaı ataq úshin ter tógesiz?

-  Daıyndalyp, maqsat qoıa bilse ár qandaı adam chempıon bola alady. Iаǵnı ómirimniń máni, jalǵasy «chempıon» bolýmen shektelip qalmaıdy. Bastysy Allanyń quly, Alashtyń uly deıtin atqa laıyq bolý.  

Ars: Qanattyń jeke kezdesýleri toptalǵan keskin jınaqtaryn kóptep basyp taratý kerek qazaq jastaryna.

-  Jaqsy usynys. Rahmet, peıilińe!

Jomart-Qasym: Qazaqstan azamaty bolǵanyńyz sebepti qandaı da bir nársege qolyńyz jetpeı qalǵan kezder, nemese bir jarysqa qatysa almaı qalǵan ýaqytyńyz boldy ma? Aldaǵy ýaqytta Qazaqstannan basqa eldiń azamaty bolýyńyz múmkin be?

-  Basqa el azamaty atanýdan Qudaı saqtasyn. Otanǵa kelý, Otanda ólý – árbir qazaqtyń armany dep oılaımyn. Maǵan Qazaqstan azamaty bolǵanym úshin eshqashan kedergiler bolyp kórgen  joq.

Nazar: Siz kelgeli birneshe kún bolsa da áli memlekettik telearnalar sizdi ekrannan kórsetpedi, ádette bireý shetelge baryp jáı ǵana jarysqa qatysyp kelse de gúl berip qarsy alyp jatady, sizge degen úlken aqparattyq qoldaý baıqaı qoımadym, bul turǵydan ókpeńiz bar ma?

-  Qudaıǵa shúkir, ýaqyt aıyrmashylyǵynan sál qateleskenimiz bolmasa, aeroportqa kútip alýǵa barǵan baýyrlarym, jýrnalıster qaýymyna myń alǵys! Elge eshqandaı ókpe joq, qaıta aq peıilderin kórsetip jatqandaryna rahmet!

Gúljaýhar: Qanat myrza sizge Alla qýat bersin! Sońǵy aptalarda siz týraly saıt ashylǵanyn estigen edik, bul saıt jóninde ne aıtasyz? Sizdiń habaryńyz bar ma? Bul saıt kesh ashylǵan joq pa?

-  Amerıkadaǵy jattyqtyrýshymmen arnaıy kelisim-shart bar. Sondyqtan saıt týraly da aldaǵy ýaqytta naqty kelisimge keletin bolamyz. Al sol jumysty qolǵa alyp, júrgizeıik dep nıet bildirgen jigitterge kóp rahmet.

Birjan: Qanat baýyrym, elge kelgenińe qýanyp qaldyq, elden ne ózgeris baıqadyń?

-  Eldiń eńsesi tiktele túsken, burynǵydaı emes qazaqylyq baıqalady. Kóshede bolsyn, áýejaıda bolsyn qazaq tilinde qyzmet kórsetý kóbeıgeni qýantty.

Erbol: Qanat myrza, Amerıkada sizdi baptaýǵa jumys jasaıtyn topta qansha adam qyzmet etedi, olardyń nesheýi qazaqtar(qazaqstandyqtar)? Jattyǵý rejımińiz qalaı?

-  Ol jerde 2 jattyqtyrýshym, menedjerim bar. Komandam jaqsy jasaqtalǵan. Men úshin 4-5 adam jumys istep jatyr. Tańǵy bes pen 7-8 der arasynda jattyǵamyn. Odan keıin demalys, tústen keıin taǵy da 3-4 saǵat jattyǵý zalynda bolamyn.

Saıa: Aǵajan, Siz qandaı taǵamdardy súıip jeısiz? Jeńgemiz asty dámdi ázirleı me?

-  Biz úshin astyń tóresi, eń súıiktisi – qazaqsha et qoı. Al jeńgeńniń «aspazdyǵyna» kelsek, qazaq qyzdary qashan da tek dámdi taǵam ázirleıdi emes pe?!

Murat: Ǵalamtor, áleýmettik jeli degenderdi paıdalanasyz ba? Qandaı úlgidegi uıaly telefondy paıdalanasyz?

-  Dostarymmen hat-habar alysý úshin áleýmettik jelilerdi paıdalanyp turamyn.

Aıdyn: Boksqa kelýine jeke ózińiz sebep bolyp, qazir top jaryp júrgen shákirtterińiz bar ma?

-  Tap ózim tárbıelemesem de izimdi basyp kele jatqan jigitter jeterlik. Bizder ushqan ortada osy salanyń jeńimpazy bolyp, top jaryp júrgen jigitter túgeldeı ózimniń inilerim. Erteń menen de myqty talaı jigit shyǵatynyna senemin.

Jaqsylyq: Baıqaıtynym, Kýba eliniń boksshylary álemde aldyńǵy qatarda, olardyń ondaı myqty bolýynyń syry nede bolýy múmkin?

-  Kýba týraly aıtatyn bolsaq, meniń jattyqtyrýshym ózi ıspan bolǵanymen Kýbada týylǵan. Olar eńbektene biledi. Áıtpese kýbalyqtar dene jaǵynan bolsyn, gendik jaǵynan bolsyn qazaqtardan eshqandaı artyq emes. Chempıon bola almaıtyn boksshy joq, chempıon tárbıeleı almaıtyn jattyqtyrýshy kóp. Bári de jattyǵý men jattyqtyrýǵa baılanysty.

Aqkisi Jankerim: Aman-saý júrsiz be Qanat aǵa! Denińizge saýlyq tileımin! Qoıaıyn degen suraǵym 2008 jylǵy Beıjiń olımpıadasynda sizdi jeńgen Banto Sýares Karlospen qaıta bir ret bokstasyp kórdińiz be? Kórmegen bolsańyz onymen taǵy bir bokstasýǵa daıynsyz ba? Jalpy ol boksshy qaıda júr qazir? Onyń karerasy qandaı? Nendeı tabystarǵa jetti?

-  Ol jigit Baqyt Sársekbavtan taıaq jegen soń habarsyz ketti ǵoı :-)

Muhamed: Neden qorqasyz?

-  Alladan.

Temirtas: Sizdiń Alldan paryz etilgen Namaz qulshylyǵyn ótep júrgenińizdi bilemiz, Maıamıde meshit bar ma? Sizdi jattyqtyrýshylar musylmandyǵyńyzǵa qalaı qaraıdy?

-  Qudaıǵa shúkir, ol qalada meshit bar. Ár juma saıyn baramyn. Oraza aıtty da jaqsy qarsy aldyq. Jattyqtyrýshylarym dinı ustanymyma qurmetpen qaraıdy.

Shaızat Asengalıýly: Assalaýmaǵalaıkúm Qanat aǵa !!!! Elge hosh keldińiz !!! Denińiz saý bolsyn, meıli qaıda júrseńiz de aman júrińiz !!!! Biz sizdi jaqsy kóremiz, Alla qoldasyn sizdi !!!

-  Ámın!

Arys: Qashanda qasyńyzdan tabylatyn senimdi dostaryńyz kimder?

-  Meniń jeńisime qýanyp, óz jeńisindeı qabyldaıtyn ár qazaq senimdi dosym. Qoldaýyn aıamaıtyn dostarym jeterlik, olarǵa Alla razy bolsyn!

Jalyn: О́tkende Qytaıdaǵy Qazaqtardyń Qytaılardan taıaq jegeni týraly estigen bolarsyz. Bul týraly ne aıtasyz…

-  Qany bir qazaq retinde janym aýyrady. Ol árkimniń «úıiniń» jeke sharýasy. Kelem degenderge Qazaqstannyń esigi 23 jyldan beri ashyq turdy. Áli de ashyq. 

Suraq: Orystyń quldyǵynan qashan qutylamyz dep oılaısyz? ásirese kóp qandasymyzdyń sanasyna sińip qalǵan “oryssyz kúnim qarań” degen quldyq sanadan qandastarymyzdy qalaı aryltsaq bolady? ultshyl azamat retinde osy suraqtarǵa sizdiń pikirińizdi bilgimiz keledi.

-  Abaı atamyz «Birińdi qazaq biriń dos, kórmeseń istiń bári bos» degen. Ár qazaqty júregińmen dosym dep, et jaqynym dep qabylda. Mıllıondaǵan qazaq urpaǵy ósip kele jatyr. Kimniń qul, kimniń ul ekenin solar kórsetetin bolady. 

«Qamshy» portaly: Qymbat ýaqytyńyzdy bólip, oqyrmandarymyzben búkpesiz syrlasqanyńyzǵa úlken alǵys bildiremiz.