Aqmola oblysynda sý tasqynynan keıin úı salýǵa bólingen qarajattyń 300 mıllıon teńgesi urlanǵan

Úkimettiń málimetinshe, Aqmola oblysynyń arnaıy prokýrorlarymen 300 mıllıon teńgeden astam qarajatty jymqyrǵany úshin Atbasar aýdanynyń ákimdigine qarasty qurylys bólimi, "Prestıj Stroı 7" jáne "Fýndamental" JShS-tiń basshylaryna qatysty sotqa deıingi tergep-tekserý aıaqtaldy.

"Atalǵan qarajattar 2021 jyly úkimet rezervinen Atbasar aýdanynda sý tasqyny aımaǵynda turatyn 200 januıany kóshirý úshin eki 100 páterli úılerdi salýǵa bólingen. Kúdiktiler áreketteri asa iri kólemde jymqyrý – talan-tarajǵa salý, ıaǵnı Qylmystyq kodekstiń 189-baby 4-bóligi boıynsha saralandy. Kórsetilgen bap boıynsha múlkin tárkileýmen qosa 12 jylǵa deıin bas bostandyǵynan aıyrý jazasy qarastyrylǵan", – delingen habarlamada.

Eki kúdikti sot sanksııasymen kúzetpen ustaýǵa, qylmysqa úshinshi seriktes úıqamaqqa alyndy.

Tergeý barysynda qylmystyq jolmen alynǵan múlik – Almaty, Astana qalalarynda kommersııalyq jyljymaıtyn múlik, arnaıy tehnıka, qurylys qurylǵylar jáne banktyq shottarda 50mln teńgeden astam aqshalaı qarajat tabyldy. Tıym salynǵan múliktiń baǵalanǵan qundylyǵy 335 mıllıon teńgeden asty.

Prokýrorlarmen, atalǵan múliktiń bir bóligi jalǵa berilip, qylmystyq paıda túsirilgeni anyqtaldy.

Sol sebepti, bir kúdiktiniń áreketi qylmystyq jolmen alynǵan aqshany jáne ózge múlikti zańdastyrý (jylystatý), ıaǵnı Qylmystyq kodekstiń 218-baby 3-bóligi boıynsha qosymsha saralandy. Bul úshin múlkin tárkileýmen qosa 10 jylǵa deıin bas bostandyǵynan aıyrý jazasy qarastyrylǵan. Qazir qylmystyq proseske qatysýshylarmen  qylmystyq is materıaldarymen tanysý júrip jatyr.