Aqtaýlyq «Kaspıı» Jańaózende ótken birinshi lıgada qarsylasyn jeńdi

Aqtaýlyq «Kaspıı» fýtbol klýby birinshi lıga aıasynda óskemendik «Altaı» komandasyna qarsy oıyn ótkizip, jeńiske jetti. Sondaı-aq, bul oıyn Jańaózende alǵash ret ótkizilip otyr, dep habarlaıdy Qoǵamdyq kommýnıkasııa ortalyǵy.

12 sáýir kúni ótken oıynǵa Jańaózen qalasynyń ákimi Janseıit Qaınarbaev arnaıy qatysty. Ol óz sózinde, búgingi lıga qala úshin tarıhı sát bolǵanyn atap ótti.

-Jańaózende ashyq fýtboldan alǵash ret jarys ótip jatyr. Aldymen osy oıynnyń ótýine úlken septigin tıgizgen oblys ákimi Noǵaev Nurlan Asqarulyna alǵysymdy bildiremin. Bul oıyn bizdiń jastarymyzǵa, óskeleń urpaqqa sporttyń jańa baǵytyn kórsetip, serpin beredi degen úmittemin. Fýtbol - halyq arasynda joǵary tanymaldylyqqa ıe bolýda. Sondyqtan, ary qaraı fýtboldy Jańaózen qalasynda damytýdy jalǵastyramyz degen senimdemin, - dedi Janseıit Qaınarbaev.

Jarys Jańaózen qalasyndaǵy Ámın Tuıaqov atyndaǵy stadıonda boldy. Oıynǵa myńdaǵan jankúıerler qatysyp, jerlesterimizge qoldaý kórsetti.

Birinishi lıga nátıjesinde, «Kaspıı» fýtbol klýby 4:1 esebimen jeńiske jetti.
«Kaspıı» fýtbol klýbynyń basshysy Nurjan Jalǵasbaev jarysqa sportshylardyń daıyndyǵy joǵary deńgeıde bolǵanyn aıtyp ótti.

-Birinshi lıgaga aqpan aıynan bastap daıyndyqty bastadyq. Bul «Kaspıı» fýtbol klýby úshin jyl basynan beri ekinshi oıyn boldy. Alǵashqy oıyn Arys qalasynda ótip, jeńispen oralǵan bolatynbyz. Dál sol nátıjeni búgin kórsettik, - dedi Nurjan Jalǵasbaev.

Oıyn sońynda eki komandanyń ókilderi baspasóz konferensııasyna qatysyp, búgingi lıga týraly óz pikirlerimen bólisti. Aldaǵy ýaqytta «Kaspıı» fýtbol klýbynyń óz jerimizde bolatyn jarystarynyń barlyǵy Jańaózende ótetin bolady.

-32 jyldan keıin qalamyzǵa úlken fýtbol qaıta oraldy. Men osyndaı joǵary deńgeıdegi jarysqa alǵash ret kelip turmyn. О́te qatty unap jatyr. Atmosferasy tym bólek. «Kaspıı» fýtbol klýbynyń jankúıerimin. Meniń janymda dostarym da bar. Barlyǵymyz aqtaýlyq komandaǵa senemiz. «Kaspıı» alǵa! Sportshylarymyz jaqsy oıyn kórsetip jatyr. Ary qaraı da úlken jeńister kútemiz. Búgingideı jarystar Jańaózende kóbeıse, jankúıer retinde qýanatyn bolamyz, - dedi jankúıer Ernar Nurlanuly.

Aıta keteıik, qala ákimdigi halyqtyń fýtbolǵa degen zor qyzyǵýshylyǵyn kórip, Jańaózende «Kaspıı» fýtbol ortalyǵy bólimshesiniń ashýǵa qoldaý bildiretinin jetkizdi.