AMО́Z-de benzın tógildi. Jelidegi vıdeoǵa qatysty zaýyt basshylyǵy jaýap berdi

Atalǵa vıdeodaǵy jaǵdaıǵa qatysty "Atyraý munaı óńdeý zaýyty" JShS túsinikteme berdi, dep habarlaıdy Qamshy.kz.

Kásiporyn atalǵan oqıǵanyń, keshe, 26 aqpanda jergilikti ýaqyt boıynsha saǵat 18:30-da oryn alǵanyn naqtylady.

"Býtendi olıgomerızasııalaý qondyrǵysynda qondyrǵyny iske qosýǵa arnalǵan tikeleı aıdalatyn benzın kollektorynda aqaý anyqtaldy. О́nimdi tez yǵystyrý úshin bul jelige 15 kgs/kv sm qysymmen sý jiberildi. Qazirgi ýaqytta aqaýly aýmaqty joıý boıynsha jedel sharalar qabyldandy. Barlyq tehnologııalyq qondyrǵy qalypty jumys istep tur, munaı ónimderin óndirý jáne jóneltý josparǵa sáıkes júrgizilýde", dep habarlady baspasóz qyzmeti.

Baspasóz qyzmeti qansha benzın tógilgeni týraly aıtpady, tek qyzmettik tergeý júrip jatqany belgili.  

Aıta ketsek, 2024 jyly 16 aqpanda "Atyraý munaı óńdeý zaýyty" JShS Bas dırektorynyń orynbasary – bas ınjener Ádilet Shoshanbasov Memleket basshysy Qasym-Jomart Toqaevqa júginip, úndeý jarııalady. Ol óz úndeýinde AMО́Z-diń bas dırektory Ǵalymjan Jýsanbaevty máseleni sheshkenniń ornyna orynsyz minez-qulyq tanytýǵa beıim dep aıyptady. Zaýyttyń bas dırektory Prezıdentke hat joldap, ózi qabyldaǵan jańashyldyqtarǵa qol astyndaǵylar daıyn emes ekenin, sol sebepti qysym kórip jatqanyn aıtyp aqtaldy. Qos basshynyń daý-damaıy ekeýiniń de qyzmetten bosatylýymen tynǵan edi. Bul týraly Qamshy.kz saıtyndaǵy "Prezıdent keńesshisi Atyraýǵa shuǵyl ushty. Munaıly óńirde ne bolyp jatyr" atty maqaladan keńirek bilip-tanysa alasyzdar.