Prezıdent keńesshisi Atyraýǵa shuǵyl ushty. Munaıly óńirde ne bop jatyr?

Bul, negizi, resmı nusqa. Alaıda Prezıdent keńesshisiniń munaıly óńirge arnaıy jol tartýy atalǵan máseliniń arǵy jaǵynda saıası astar bar-joǵyn anyqtaý bolýy yqtımal degen dúdámal oı kóptiń basynda jylt etedi.

Qalaı degenmen de sońǵy kezderi shı shyqsa, osy Batys óńirden shyǵatyny belgili ǵoı.

Qamshy.kz saıtyna pikir bildirgen saıasattanýshy Ázimbaı Ǵalı úlken aqsha júrgen jerde mundaı daý-damaıdyń bolýy belgili bir deńgeıde zańdy  qubylys ekenin aıtady.

Sonymen munaıly óńirde ne bolyp jatyr degenge keletin bolsaq, áńgimeniń álqısassy Atyraý munaı óńdeý zaýytynyń bas ınjeneri Ádilet Shoshanbasovtyń Prezıdentke, Energetıka mınıstrligine, «QazMunaıGaz» AQ basshylyǵyna úndeý hat joldaýynan bastalady. Odan keıin bir aı buryn ǵana zaýyt basshylyǵyna taǵaıyndalǵan Ǵalymjan Jýsanbaev ózine jala jabylyp jatqanyn aıtyp, Memleket basshysynan kómek surady, vıdeo úndeý joldady. Buǵan jaýap retinde ile-shala áleýmettik jelide 436 adam qol qoıǵan AMО́Z jumysshylarynyń bas dırektordy qyzmetinen bosatýdy suraǵan petısııasy jarııalandy. Atyraýlyq áriptesterin qoldaıtynyn bildirip, bir mezette Shymkent pen Pavlodardaǵy munaı óńdeıtin zaýyttardyń ujymy da ún qosty. Sóıtip, aqyrynda daýlasqan ekeý qyzmetinen aıyrylyp tyndy. Bárinen buryn, aınaldyrǵan 3-4 kún ishindegi zaýyttyń bas dırektory men bas ınjeneri arasyndaǵy daý-damaı kásiporyndaǵy kóp bylyq-shylyqtyń betin ashyp tastady. Atap aıtqanda:

1. Bas dırektor zaýyt jumysshylarynyń jalaqysy qorynan 14 keńesshini joǵary jalaqyǵa jumysqa alǵan;
2. bilikti qyzmetkerler jumystan shyǵarylǵan;
3. 2020 jyldan 2023 jylǵa deıingi kezeńde úlestes kompanııalar tobynan taýarlardy, jumystardy jáne qyzmetterdi jalpy somasy 150 mlrd teńgeden asatyn joǵarylatylǵan baǵamen satyp alǵan. Bul satyp alýlar kóptegen zań buzýshylyqtarmen júzege asyrylǵan;
4. koks pen túıirshiktelgen kúkirtti normatıvten tys saqtaý turǵysynan ekologııalyq zańnama buzýshylyqtary bar;
5. Tájikstan Respýblıkasyna gýmanıtarlyq kómek kórsetý aıasynda 15 myń tonna mazýtty jetkizý ýaqytynan keshiktirilgen. Oǵan mazýt qubyrynyń qatyp qalýy, jetekshilik etetin bas dırektordyń orynbasarlary men jaýapty ITQ (ınjenerlik-tehnıkalyq qyzmetkerler) tarapynan jumysty uıymdastyrý jáne baqylaýdyń bolmaýy sebep bolǵan;
6. 2024 jyldyń 15 aqpanynda munaı óńdeıtin jáne munaı ónimderin tereń kúkirtsizdendiretin negizgi tehnologııalyq qondyrǵylarynda aınalym kompressory isten shyǵady. Aldyn ala tergep-tekserý barysynda jabdyqqa josparly jóndeý jumystary júrgizilmegeni anyqtaldy;
7. jóndeý jumystaryn júrgizetin kompanııanyń úlestes toptarynyń músheleri bolyp tabylady. Sondyqtan bul arada kóz juma qaraý jıi oryn alady. Kommersııalyq qurylymdar osylaı negizsiz joǵary tabysqa keńelip otyrǵan.

Munyń barlyǵy - qos taraptyń daý-damaıy kezinde aıtylǵan aıyptaýlar ekenin eske salamyz. Al olardy tekserip, anyqtaý arnaıy komıssııanyń enshisindegi dúnıe. Alaıda keshe «QazMunaıGaz» UK» AQ basqarma tóraǵasynyń orynbasary Dmıtrıı Makeev bastaǵan komıssııa ókilderi «AMО́Z» JShS zaýytynda jıyn ótkizip, onyń barysynda qyzmetinen aıyrylǵan Jýsanbaev pen Shoshanbasov qol alysyp úlgeripti. Al bas dırektordyń mindetin atqarý ári qaraı sheshim qabyldanǵanǵa deıin Atyraý munaı óńdeý zaýyty bas dırektorynyń orynbasary – tehnıkalyq dırektor Oleg Aleksandrovıch Lyzlovqa buıyrǵan kórinedi. Endi alda Atyraýda júrgen Prezıdent keńesshisi Bolat Aqsholaqov málimdeme jasaýy tıis.

Ol «osyǵan deıin qabyldanǵan sharalar durys» deıdi me, álde jumystan aıyrylǵan ekeýdiń birin qaıta ornyna qoıdyrta alady ma, ol jaǵy belgisiz. Belgilisi, munaı salasyn jaqsy biletin ári osy óńirdiń týmasy Aqsholaqovtyń alda ne aıtatyny kimge de bolsyn qyzyq bolyp tur...  

Aıta ketsek, Atyraý munaı óńdeý zaýytynyń qojaıyny - «QazMunaıGaz» UK» AQ (99%).