Fransııada toǵyz jastaǵy bala eki jyl jalǵyz ómir súrgen

Kúni keshe Fransııada eki jyl jalǵyz ómir súrgen balanyń anasyna qatysty sot úkimi shyqty. Bezbúırek ana 18 aıǵa túrmege toǵytyldy.

CNN telearnasynyń habarlaýynsha, Fransııanyń eki myńnan astam turǵyny bar Nersak qalasynda 2020 jyldan 2022 jylǵa deıingi aralyqta toǵyz jastaǵy bala óz páterinde jalǵyz turyp kelgen.

Anasy Nersaktan bes shaqyrymda ornalasqan basqa qaladaǵy kóńil qosqan er adamynyń qolyna kóship alǵan, ulyna óte sırek baryp turǵan.

Al bala ash qalmas úshin urlyq jasaǵan. Osylaısha ol eki jyl boıyna qolyna túsken pechene, qalbyrdaǵy tamaq ónimderi, qyzanaq syndy kókónisterdi talǵajý etip ómir súripti.

Qysta páterde ystyq sý men jylý jıi bolmaǵan. Soǵan qaramastan, bala mektepke baryp júrgen, sabaq úlgerimi de jaqsy bolǵan. Balanyń japadan jalǵyz óz betimen qıyn jaǵdaıda ómir súrip jatqanyn jergilikti bılik eki jyldan keıin bir-aq bilgen.

"Maǵan balanyń sheshesi 2022 jyldyń mamyrynda jolyqty. Ol aqshaǵa qatysty máseleleri baryn aıtyp, óz shaǵymyn aıtty. Sodan keıin biz oǵan tórt azyq-túlik talonyn berdik. Biraq ol odan bas tartyp, onyń ornyna daıyn qurǵaq taǵamdardy alýdy jón kórdi. Osy arasy mende kúdik týǵyzdy. Keıbir adamdar qalada jalǵyz turatyn bala baryn aıtqan. Sodan osy fakti boıynsha polısııaǵa habarlastym", deıdi Nersak meri Barbara Kýtıýre.

Osy oqıǵadan keıin áıel adamǵa qatysty tergeý bastalyp, aqyrynda ol ustalyp, sottaldy. Al bala qyrkúıek aıynan bastap áleýmettik qyzmet qamqorlyǵyna alynypty.