Foto: Májilistiń baspasóz qyzmeti
Májilis spıkeri Erlan Qoshanov Birikken Arab Ámirlikteriniń Ulttyq kúnine oraı uıymdastyrylǵan saltanatty jıynǵa qatysyp, Memleket basshysynyń jáne Parlament depýtattarynyń atynan aıtýly merekemen quttyqtady.
Májilis tóraǵasy Ámirlikterdiń táýelsizdiktiń alǵashqy kúnderinen bastap Qazaqstanǵa jan-jaqty qoldaý kórsetkeni úshin alǵysyn bildirip, eki el arasyndaǵy shynaıy dostyqtyń jyl sanap artyp kele jatqanyna erekshe mán berdi.
Palata tóraǵasy Ámirlikter Qazaqstannyń mańyzdy ári senimdi seriktesi ekenin, sondaı-aq jarty ǵasyr ishinde ekonomıkasy órge basqan, qýatty memleketke aınalǵanyn atap ótti.
– Elderimiz arasyndaǵy ekijaqty syndarly baılanys pen barlyq saladaǵy yntymaqtastyǵymyz jemisti damyp keledi. Ol, árıne, Memleketterimizdiń basshylarynyń úndesken saıasatynyń arqasy. Bıyl qańtarda Qazaqstan Respýblıkasynyń Prezıdenti Qasym-Jomart Kemeluly Toqaev Birikken Arab Ámirlikterine resmı saparmen bardy. Eki el basshylyǵynyń turaqty kezdesýleri saıası dıalog pen saýda-ekonomıkalyq yntymaqtastyqty jańa deńgeıge kóterdi. Aldaǵy ýaqytta kóshbasshylarymyzdyń seriktestikti tereńdetýge baǵyttalǵan jumysyn Parlament deńgeıinde jalǵastyramyz, – dedi Májilis spıkeri.
Erlan Qoshanov Birikken Arab Ámirlikteriniń búkil álemde jańartylatyn energııa kózderi jobalaryn tıimdi júzege asyryp, osy saladaǵy ozyq tehnologııalardyń ortalyǵyna aınalǵanyna nazar aýdardy. Osy oraıda jaqynda Dýbaıda ótetin Klımattyń ózgerýi jónindegi 28-shi konferensııanyń tabysty ótýine tilektestik bildirdi.
– Eki eldiń uqsas qundylyqtary men umtylystary, syndarly saıasaty men baıypty ustanymdary, ózara syılastyǵy Qazaqstan-Ámirlikter qarym-qatynasyn jemisti yntymaqtastyqtyń úlgisine aınaldyrdy desek artyq aıtqandyq emes. Dostas eki memleket arasyndaǵy qarym-qatynastyń áleýeti budan da zor. Birge baǵyndyrar belester áli alda dep bilemin, – dedi Erlan Qoshanov.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir