"Ulylar elin, urylar eline aınaldyrmaq bolǵandar arasynan ketti". Baltash Tursynbaev aqtyq saparǵa attandy

Almatyda jurtshylyq  qoǵam jáne memleket qaıratkeri Baltash Tursynbaevty sońǵy saparǵa shyǵaryp saldy.

Ǵylym ordasynda ótken qaraly jıynǵa adam kóp jınaldy. Ásirese oıyn ashyq aıtyp júrgen azamattar, qoǵam belsendileri kóptep keldi.

Qaraly jıynda akademık Orazaly Sábden Baltash Tursynbaev 53 jasyna deıin qyzmette bolyp, ótkir oı, ashyq kózqarasyn bildirgeni úshin bılikten shettetilip, odan keıin udaıy saıası-qoǵamdyq oqıǵalardyń, sońǵy Qańtar oqıǵalary, odan keıingi jaıttardyń báriniń bel ortasynan tabylǵanyn atap ótti.

Akademık marqum sońǵy ýaqytta "qańtardyń" shyndyǵyn ashýdy talap etip, bar ýaqytyn sol jolǵa arnaǵanyn, qaıratkerdiń oryndalmaı ketken talaby keıingi urpaqqa amanattaı bolyp qalǵanyn aıtty. Qańtar oqıǵasynyń shyndyǵyn ashýǵa qol jetkizý – qazirgi azamattardyń moınynda ekenin jetkizdi.

Qazaqtyń tuńǵysh ǵaryshkeri, marqumnyń jaqyn dosy Toqtar Áýbákirov Baltash Tursymbaevty júregi keń, aqkóńil, batyl da bilimdi, sózdi salmaqtap, saralap aıtqan adam bolǵan dep sıpattady.

Birde jumyssyz, kóliksiz qalǵanynda "sen jaıaý júrme, seniń jaıaý júrgeniń halqyńa aýyr bolady" dep óz kóligin ákep bergenin aıtady.

Sondaı-aq ol Baltash Tursymbaev 90 jyldary-aq, ózi laýazymdy qyzmetter atqara júrip bıliktiń kemshiligin aıtýdan esh taısalmady deıdi. "Aýyldy qurtamyz ǵoı" dep kolhoz, sovhozdardy taratýǵa, odan keıin 1995 jylǵy konstıtýsııaǵa qarsy shyqqanyn eske aldy. Ony qabyldaý durys jolǵa bastamaıtynyn, qabyldansa, Qazaqstan dıkratýraǵa túsip ketedi degen qaýpi bolǵanyn bildirgen.

Ǵaryshker sóziniń sońynda joldasty sońǵy saparǵa attandyrǵan qıyn ekenin, dosy endi bu dúnıede joq ekenin júregi qabyldamaı, mıy senbeı turǵanyn aıtty.

Almaty qalasy ákimshiliginiń atynan sóılegen qala basshysynyń orynbasary Arman Qyryqbaev Baltash Tursymbaevty "qashanda pikirin, pozısııasyn anyq bildiretin, tik minezdi adam boldy" dep eske aldy.

Qaıratkerdi, onyń aıtqandary men jasaǵandaryn minsiz etip kórsetý – kerisinshe onyń baǵasyn tómendetip jiberýi múmkin ekenine nazar aýdaryp, marqumnyń el úshin qylǵan qyzmeti laıyqty ornyn alady dep esepteıtinin málim etti.

Sondaı-aq ol qoǵamda áralýan pikir bolǵanymen, sol ár kózqarastaǵy adamdar ult múddesi úshin kerek kezde birige alýy asa mańyzdy ekenine toqtaldy.

Sońǵy úshi jylda túrli qoǵamdyq ister boıynsha birge júrgen jýrnalıst, qoǵam qaıratkeri Rysbek Sársembaı Baltash Tursymbaevty qaıratker, elin súıgen, eli úshin kerek bolsa kúrese bilgen adam edi dep atady.

Úsh jyl birge júrgende qaıtpas qaısarlyǵy, neni qalaı isteý kerektigin biletin parasattyǵy tánti qylǵanyn málim etti.

Rysbek Sársembaıdyń aıtýynsha, Baltash Tursymbaev ne aıtsa da, jazsa da, synasa da el múddesi úshin jasaǵan, bılik sony uǵa almady.

Jýrnalıst "marqum qoǵamdyq jumysty ózin aıamastan atqardy, el aralap júrgende Qyzylordada densaýlyǵy syr berip, naýqastanyp bir qorqytqany bar,  júrip keterden 3-4 kún buryn telefonmen sóılestik, aldaǵy ýaqyttaǵy jumystardy pysyqtap, pikir almastyq" deıdi.

"Ulylar elin, urylar eline aınaldyrmaq bolǵandar arasynan ketti" degen ol Baltash Tursymbaev óz jaǵdaıyn oılamaı halyq múddesi úshin qyzmet etkeni úlken qurmetke laıyq ekenin jetkizdi.

Baltash Moldabaıuly Tursymbaev 1946 jyly 24 qazanda Reseıdiń qazirgi Omby oblysy Kishi Borankól aýylynda týǵan.

1969 jyly Omby aýyl sharýashylyq ınstıtýtyn bitirgen. 1969 jyldan bastap Soltústik Qazaqstan oblysynda zootehnık, bas zootehnık, Presnov aýdandyq aýyl sharýashylyq basqarmasy bastyǵynyń orynbasary qyzmetterin atqarǵan.

Odan keıin ár jyldary "Jambyl" keńsharynyń dırektory, Bıshikól aýdandyq partııa komıtetiniń 2-hatshysy,  Selınnyı aýdandyq partııa komıtetiniń 1-hatshysy, Soltústik Qazaqstan oblysy atqarý komıtetiniń tóraǵasy, Qazaq KSR-i Memlekettik agrokeshen komıtetiniń tóraǵasy, aýyl sharýashylyq, azyq-túlik jáne ekologııa jónindegi Qazaq KSR-i memlekettik keńesshisi, Qazaq KSR-i premer-mınıstriniń orynbasary, Aýyl sharýashylyq mınıstri, Qostanaı oblysynyń ákimi, Qaýipsizdik keńesiniń hatshysy, elshi, QR Premer-mınıstri orynbasary, Qazaqstannyń Túrkııadaǵy elshisi qyzmetterin atqarǵan.

1999 jyldan jeke kásipkerlikpen aınalysqan.

Sońǵy jyldary eks-prezıdent N.Nazarbaev júıesin synap, oppozısııalyq kózqarastaryn bildirip júrdi.

Bıylǵy mamyrda jaqtastarymen birge eki jyldan beri qoǵamdyq uıym retinde jumys istep kelgen "El men Jer" qozǵalysyn saıası partııaǵa aınaldyratynyn habarlaǵan.

Saıasatker qazasyna júrek syrqaty sebep bolǵan.