Májilistiń janynan Qoǵamdyq palata qurylady

Búgin májilis spıkeri Erlan Qoshanovtyń tóraǵalyǵymen Bıýro otyrysy ótip, onda aldaǵy jalpy otyrystyń kún tártibiniń jobasy naqtylandy.

Otyrysta depýtattar jańa dıalog alańyna aınalatyn parlament májilisi janynan Qoǵamdyq palata qurý týraly bastamany qoldady. Bul týraly aldaǵy jalpy otyrysta jan-jaqty talqylanatyn bolady. Onyń quramyna bedeldi sarapshylar, qoǵam qaıretkerleri, saıası partııalar men BAQ ókilderi kiredi dep kútilýde.

Májilis janynan Qoǵamdyq palata qurý týraly bastamany májilis tóraǵasy Ulttyq quryltaıdyń birinshi otyrysynda aıtty. Ol depýtattardyń qaraýyndaǵy zań jobalardy ashyq talqylaýǵa, qoǵamdy tolǵandyratyn basqa da mańyzdy máseleler  boıynsha pikir alysatyn oryn bolmaq. Sonymen qatar Qoǵamdyq palata Ulttyq quryltaıda qabyldanatyn sheshimderdi, sondaı-aq basqa da qoǵamdyq jáne áleýmettik mańyzy bar bastamalardy zańnamalyq iske asyrý alańyna aınalady.

Sondaı-aq májilis aldaǵy jalpy otyrysta «Geodezııa, kartografııa jáne keńistiktik derekter týraly» jáne oǵan ilespe zań jobalaryn birinshi oqylymda qaraıtyn bolady. Zań jobasy geodezııalyq jáne kartografııalyq qyzmet sýbektileri qyzmetiniń jańa jáne jetildirilgen tetikterin engizý maqsatynda ázirlengen. Qujat geodezııalyq, kartografııalyq qyzmetti retteýdiń, osy saladaǵy memlekettik baqylaýdy jetildirýdiń jalpy tanylǵan halyqaralyq qaǵıdattary men tásilderin engizýge baǵyttalǵan.

Jalpy otyrysta palata komıteti «Eýrazııalyq ekonomıkalyq odaqtyń tehnıkalyq reglamentteri talaptarynyń saqtalýyna memlekettik baqylaýdy (qadaǵalaýdy) Eýrazııalyq ekonomıkalyq odaqqa múshe memleketterdiń kórsetilgen saladaǵy zańnamasyn úılestirý maqsatynda júzege asyrý qaǵıdattary men tásilderi týraly kelisimdi ratıfıkasııalaý týraly» zań jobasyn jumysqa alatyn bolady.

Májilistiń baspasóz qyzmeti