Májilis tóraǵasy: Fraksııaǵa túbegeıli reforma jasap, qaıta qurý qajet

Otyrysta Erlan Qoshanov májilistegi «Nur Otan» fraksııasynyń jetekshisi bolyp saılandy.

Májilis spıkeriniń kandıdatýrasyn vıse-spıker Pavel Kazansev usynyp, depýtattar biraýyzdan qoldady.

О́z kezeginde palata spıkeri depýtattarǵa fraksııa jetekshisi retinde qoldaǵandary úshin alǵys bildirdi. Erlan Qoshanov fraksııa jumysyn jańa deńgeıge kóteretinin aıtyp, memleket basshysy, «Nur Otan» partııasynyń tóraǵasy Qasym-Jomart Toqaevtyń 2022 jylǵy 28 qańtardaǵy «Nur Otan» partııasynyń kezekten tys XXI sezinde fraksııa jumysyn qaıta bastaý týraly tapsyrmasyna erekshe nazar aýdardy.

Fraksııa basshysy óz sózinde partııa tóraǵasy qoıǵan jeti basym baǵytty atap, fraksııaǵa túbegeıli reforma jasap, qaıta qurý qajettigine nazar aýdardy. Palata tóraǵasy barlyq depýtat senim mandatyn alyp, kópshilik depýtattar praımerız arqyly ótip, óńirlerdiń tirshiligin jaqsy biletinin alǵa tartty. Sonymen qatar bul aımaqtardaǵy ózekti máselelerdi der kezinde sheshýge múmkindik beretinine toqtaldy.

Otyrysta májilis spıkeri fraksııa aldynda turǵan jańa mindetterdi eskere otyryp, zań jobalaý qyzmetiniń sapasyn arttyrý, depýtattyq saýaldardyń ózektiligin arttyrý, taldaý jáne óńirlerdegi jumys máseleleri boıynsha partııanyń Ortalyq apparatymen ózara is-qımyldy kúsheıtýdi tapsyryp, fraksııa depýtattary aqparattyq jumysqa, onyń ishinde áleýmettik jelilerge de basa nazar aýdarýy kerek ekenin aıtty.

Májilis tóraǵasy aǵymdaǵy jyldyń aqpan aıynda depýtattardyń óńirlerge shyǵýyna baılanysty fraksııa múshelerine birqatar tapsyrmalar júktedi.

Aldaǵy jumystardyń mańyzdylyǵyn atap ótken Erlan Qoshanov turǵyndarmen kezdesý azamattardyń naqty máselelerin jergilikti jerde talqylaý arqyly ótý kerektigin eske saldy. Palata spıkeriniń aıtýynsha, depýtattardyń halyqpen kezdesýleri tek ortalyqtarmen, qalalarmen ǵana shektelmeı, shalǵaıdaǵy eldi mekenderde, aýyldarda ótýi tıis. Onyń ishinde jastarǵa memleket tarapynan kórsetiletin qoldaýlar jaıynda túsindirip,  erekshe kóńil adarý qajet ekenin jetkizdi.  Sondaı-aq Erlan Qoshanov issaparlar barysynda depýtattar qoǵamdyq keńes múshelermen kezdesýler ótkizip, partııanyń qoǵamdyq qabyldaý bólimderinde azamattardy qabyldap, olardyń shynaıy máselelerin kóterýi kerek ekenin aıtty.

Otyrys barysynda jańa mindetterdi eskere otyryp, májilismender fraksııanyń sapalyq quramyna ózgerister engizdi. Atap aıtqanda, májilis depýtaty Erlan Saırov fraksııa tóraǵasynyń orynbasary jáne prezıdıým múshesi, al májilis depýtattary Elnur Beısenbaev pen Ekaterına Smyshlıaeva fraksııa tóralqasynyń múshesi bolyp saılandy.

Sonymen qatar, fraksııa otyrysyna «Nur Otan» partııasynyń Atqarýshy hatshysy Ashat Oralov qatysty.

Májilistiń baspasóz qyzmeti