Qarttar kúnine oraı «Domalaq ana» operasy qoıyldy

1 qazan halyqaralyq Qarttar kúnine oraı Shymkent qalalyq opera jáne balet teatrynda «Domalaq ana» operasynyń qoıylymy ótti. Atalǵan sharaǵa qalanyń túkpir-túkpirinen qazynaly qarııalar shaqyryldy. Merekege arnaıy qoıylǵan opera bul joly tegin kórsetilip otyr.

Qalalyq opera jáne balet teatrynda qarttar kúnine oraı «Domalaq ana» operasy qoıyldy. Bul jolǵy qoıylym tegin, ujymnyń qarııalarǵa syılyǵy deıdi uıymdastyrýshylar. Spektakldi tamashalaýǵa arnaıy kelgen 81 jastaǵy Abdýrahym Abdrashıdov te qoıylymnan jaqsy áser alǵanyn, úlken tolǵanyspen qabyldaǵanyn jetkizdi.

Abdýrahym Abdrashıdov, Qaratóbe aýylynyń turǵyny
- Men Qaratóbeden arnaıy keldim. Kelip, kórip, qýanyshty bolyp otyrmyz. Jasym 81-de. Shaqyryp, ártister bizder úshin qyzmet etip, jaqsy konsert, opera berip jatyr. О́zim ózbek ultynyń ókilimin. Bul ulttar arasyndaǵy qurmet, bir-birimizge syılastyq dep bilemin.

Qoıylymnyń tusaýkeseri naýryz aıynda ótken. Sodan beri turaqty kórsetilip keledi. Sahnalanatyn árbir qoıylymǵa 4-5 aı kóleminde daıyndyq júrgiziletin kórinedi. «Sebebi bir qoıylym arqyly biz tarıhty nasıhattaımyz» deıdi teatr ártisteri.

Úrálhan Seıilbekova, Shymkent qalalyq opera jáne balet teatrynyń solısti
- «Domalaq ana» operasynda men Domalaq ananyń, Nurılanyń rólin somdaımyn. Ol óte úlken jaýapkershilik. Oǵan úlken daıyndyqpen keldik. Árbir oryndalatyn arııasyn, dýeetterin jeke, birge daıyndalyp, búkil ujym bolyp daıyndalyp, osy sahnada birneshe kún daıyndyqtamyz. Mine, búgin kórermenge usynyp otyrmyz».

«Domalaq ana» operasy teatrdyń «Táýelsizdiktiń 30 jyldyq merekesi» aıasynda qoıǵan alǵashqy spektakli. Eki merekeni ushtastyra uıymdastyrylǵan sharaǵa ónersúıer qaýym da óz rızashylyǵyn bildirdi.

Aıta keteıik, atalǵan qoıylym qalamyzdaǵy opera jáne balet teatrynda 31 – ret kórsetilip jatyr.