Atyraý oblysynda shóp órtenýi saldarynan 3 bala qaıtys boldy (vıdeo)

Atyraý oblysynyń Mahambet aýdanynda býma shóp órtenip, sonyń saldarynan 3 bala qaıtys boldy. Bul týraly QR TJM resmı ókili Talǵat Ýálı málimdedi.

– 2021 jyldyń 5 qazanynda saǵat 19:27-de kezekshi pýltine Mahambet aýdany, Ortaqshyl aýyly, Jaskelenov kóshesindegi úıdiń aýlasyna jınalǵan 22 dana býma shóp janyp jatqany týraly habar kelip tústi.  Oqıǵa ornyna №11 О́SB-niń órt sóndirýshileri 19:45-te jetip, órt 23:07-de  tolyǵymen sóndirildi, – deıdi Talǵat Ýálı.

Sol arada, 6 qazan saǵat 00:02-de Mahambet aýdandyq polısııa bólimine Ortaqshyl aýylynda kámelet jasyna tolmaǵan 3 balanyń belgisiz jaǵdaıda joǵalǵany týraly habarlama kelip túsedi. 

– Joǵalǵan 2014 jylǵy eki bala men 2012 jylǵy bir balanyń denesi órtengen shóptiń arasynan tabyldy. Olardyń denesi polısııa departamenti qyzmetkerlerine tapsyrylyp, sot-medısınalyq saraptamasy taǵaıyndaldy, – deıdi baspasóz qyzmeti.

TJM qazaqstandyqtarǵa órt qaýipsizdigi sharalaryn qatań saqtap, balalardy qaraýsyz qaldyrmaý kerektigin eskertedi.