Foto: qamshy.kz
Almatydaǵy qaıǵyly oqıǵadan keıin májilis depýtaty Andreı Lınnık "Jeke tulǵa bankrottyǵy" týraly zań jobasyn ázirlep, kredıt stavkasyn tómendetýdi aıtty.
– Eki kún buryn Almaty qalasynda qaıǵyly oqıǵa oryn aldy. Bank boryshkerin shyǵarý kezinde 5 adam qaza tapty. Qaıǵyly oqıǵanyń basty sebebi dármensiz boryshkerdiń baspana úshin bankpen daý-damaıy bolǵany belgili. 121 mıllıon teńge qaryz bolǵan boryshkerden bank baǵalaý quny 184 mıllıon teńge bolatyn jer ýchaskesi bar turǵyn emes úı-jaıdy alyp qoıdy. Ony bank 96 mıllıon teńgege baǵalaǵan. Iаǵnı bastapqy somadan eki ese az. Sonymen qatar, bank boryshkerdiń turǵyn úıin de alýǵa sheshim qabyldaǵan. Birneshe jyldan keıin bank óz degenine qol jetkizdi. Boryshkerdi kóshede qaldyryp, jalǵyz baspanadan ǵana emes, onyń kámeletke tolmaǵan balalarynan da aıyrdy, – dedi Lınnık premer-mınıstrdiń birinshi orynbasary men qarjy naryǵyn retteý agenttiginiń tóraǵasy Álıhan Smaıylovqa joldaǵan depýtattyq saýalynda.
Deýpatat bul isti quqyq qorǵaý organdaryn jiti tekserip, oqıǵanyń mán-jaıyn anyqtaýy tıis ekenin atap aıtty.
– Mundaı jaǵdaıǵa kásip ashýǵa bel býǵan nemese jaı ǵana kredıt alǵan myńdaǵan azamat ushyraıdy. Boryshkerdiń kóbi, tipti, sýısıdke deıin barady. Biraq myna oqıǵada boryshker basqa adamdarǵa oq jaýdyrdy. Bul halyqtyń qyrýar qaryzǵa batqanyn, bul máselege tez arada nazar aýdarý qajettigin kórsetedi. Ulttyq banktiń joǵary bazalyq stavkasy, osyndaı daýlarǵa qatysty ádiletsiz sot sheshimderi, sot oryndaýshylary men bank qyzmetkerleriniń aldyn ala sóz baılasýy jaǵdaıdy odan saıyn ýshyqtyryp otyr, – dedi depýtat.
Onyń aıtýynsha, "Aq jol" fraksııasy ondaǵan ret "jeke tulǵalardyń bankrottyǵy týraly" zańdy ázirleýdi usynǵan. Alaıda úkimet bul zań jobasyn qabyldaýdy únemi keıinge shegergen.
– 2015 jyly memlekettik organdardyń bas tartýyna baılanysty biz tipti úkimet tarapynan buǵattalǵan ózimizdiń zań jobasyn ázirledik. Ýákiletti organdardyń ózi bul qujatty qabyldaýdy únemi keıinge qaldyrady. Keshe oryn alǵan qaıǵyly jaǵdaı – myńdaǵan shaǵyn kásipkerler men qarapaıym boryshkerlerdiń jaǵdaıyna nemquraıly qaraýdyń saldary. Banktiń áreketin túsinýge bolady, óıtkeni onyń mindeti – aqsha tabý. Biraq boryshkerdiń kepildegi múlkin tárkileý kezinde baǵalaý qunynan aýytqý 10-15%-ten aspaýy kerek dep sanaımyz. Osyǵan baılanysty qarjy naryǵyn retteý agenttigine bankter boryshkerdiń tárkilenetin múlkiniń qunyn tómendetý múmkindigin shekteýdi usynamyz, – dedi Lınnık.
Sondaı-aq ol kredıt boıynsha mólsherlemeni tómendetý qajettigin jáne Ulttyq Banktiń bazalyq stavkaǵa qatysty saıasatyn qaıta qaraýdy atap ótti. Onyń sózinshe, búginde ol kez kelgen jaǵdaıda ınflıasııany tejemeıdi, biraq ekinshi deńgeıdegi bankterdiń mólsherlemesiniń jetkiliksiz joǵary bolýyna sebep bolady.
Depýtat bolashaqta mundaı qaıǵyly jaǵdaı oryn almas úshin "Jeke tulǵalardyń bankrottyǵy týraly" zań jobasyn tez arada ázirleýdi usyndy.
Eske sala keteıik, Almatydaǵy Aqbulaq yqshamaýdanynda 20 qyrkúıek kúni keshki saǵat 17:00 shamasynda atys boldy. Resmı derekterge súıensek, sot sheshimin oryndaýshylar eki adamnyń menshik quqyǵyna qatysty daýǵa baılanysty kúdiktiniń úıine kelgen. Sot sheshimimen estigen azamat úıinen qarý alyp shyǵyp, sot oryndaýshysyna, ýchaskelik polısııa ınspektorlaryna jáne aýlada bolǵan basqa adamdarǵa qarýdan oq atqan. Nátıjesinde 5 adam oqıǵa ornynda qaıtys boldy. Onyń ishinde úıdiń jańa ıesi men taǵy bir turǵyn bar.
Oqı otyryńyz: “Eki polıseıdiń máıitin kórdim”. Kýágerler Almatydaǵy atystyń qalaı bolǵanyn aıtyp berdi
Aqbulaqtaǵy tragedııa: Qaıtys bolǵandar týraly aqparat belgili boldy
Almatydaǵy atys: 5 adamdy óltirgen kúdikti kim ekeni anyqtaldy
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir