Bir top depýtat Q.Toqaev bastamasynyń tıimsiz tusyn áshkereledi

Májilistegi "Qazaqstan halyq partııasy" fraksııasynyń depýtattary zeınetaqy jınaǵyn turǵynúı jaǵdaıyn jaqsartý maqsatynda paıdalaný jobasynyń aralyq qorytyndysyn shyǵarý qajet dep sanaıdy.

Premer-mınıstriniń orynbasary Roman Sklıarǵa baǵyttalǵan depýtattyq saýalda Aıqyn Qońyrov 313 myń adam 1 trıllıon 400 mıllıard teńge kólemindegi jınaq somasyn alǵanyn, budan negizinen Nur-Sultan men Almaty qalalaryndaǵy qurylys júrgizetin kompanııalar, bankter men ımportshylar ekonomıkalyq paıda kórgenin aıtady. Al baspana qoljetimsizdigi sekildi júıeli problema sheshimin tappaǵan. Sózderinshe, qoǵamdaǵy turǵyn úı alshaqtyǵy asqyna túsken.

Depýtattar jobanyń jalpyekonomıkalyq ósimdegi yntalandyrý áseri de shekteýli bolǵanyn málim etti. Kerisinshe, úı men qurylys materıaldary baǵasynyń aspandaýyna, jalpy qymbatshylyqqa ákelip soqtyrǵan.

Máselen, "zeınetaqy kampanııasy" iske qosylǵan 2021 jylǵy 1 qańtardan beri páter quny 8,3 paıyzǵa, al 2020 jylǵy mamyrdan 2021 jylǵy mamyrǵa deıin 22 paıyzǵa ósken.

Nátıjesinde jappaı qymbatshylyq jaılaǵan, al zeınetaqy jınaǵyn paıdalaný jobasy halyqtyń 2 paıyzyn ǵana qamtyǵan. 

Depýtattyq saýalda joba otandyq ónerkásipti óristetýge de ser boa almaǵan. О́ıtkeni otandyq qurylys materıaldary negizinen tabıǵa shıkizatqa negizdelgen. Sonyń saldarynan zeınetaqy jınaǵynan alynǵan qarajattan sheteldik alyp-satarlar paıda kórgen.

Jobanyń osyndaı tıimsiz tustaryn ataǵan depýtattar jobany jalǵastyrarda mindetti qosymsha sharalar engizý mańyzdy ekenin aıtty. Ol sharalar qoǵamnyń belgili bir tobynyń múddesinen ǵana shyqpaı, barlyǵyna birdeı eseptelýi kerek.

"Qazaqstan halyq partııasy" jeke turǵynúı qurylysyn jandandyrý maqsatynda "jer úı" dep atalatyn baǵdarlama iske qosý asa qajet degen pikirde. Depýtattar bul bastama jeke turǵynúı qurylysyn júrgizý úshin azamattardy jer ýchaskesimen qamtýdyń aqylǵa qonymdy tetigi ekenine senimdi. Sondaı-aq ol atalmysh baǵdarlama qurylys materıaldary, ásirese ishki jumystarǵa arnalǵan materıaldar jáne ilespeli taýarlar men qyzmet túrlerin damytýǵa arnalǵan sharalar qamtýǵa tıis dep sanaıdy.

Turǵynúı jaǵdaıyn jaqsartý úshin zeınetaqy jınaqtaryn paıdalaný jobasy prezıdent Q.Toqaevtyń tapsyrmasyna saı júzege asqan. Joba sharttary boıynsha azamattardyń jas ereksheligine qaraı zeınetaqy jınaǵynyń eń az jetkilikti shegi belgilengen.

Azamattar qordaǵy jınaqtyń jetkilikti shekten asqan bóligin ǵana paıdalana alady. Al ondaı azamattar is júzinde kóp bolmaı shyqty.

Joba iske qosylǵaly turǵynúı naryǵynda suranys joǵarylap, baspana baǵasy qymbattap ketti.