Foto: ashyq derekkóz
Bilim jáne ǵylym mınıstri Ashat Aımaǵambetov facebook paraqshasynda balalar quqyǵyn qorǵaý jónindegi balalar ókilderimen kezdeskeni týraly jazdy.
– Jaqynda balalardyń quqyqtaryn qorǵaý jónindegi balalar ókilderimen kezdestim. Nur-Sultan qalasyndaǵy mektep oqýshylarymen dástúrli formatta, al jıynǵa basqa óńirlerden qatysqan oqýshylarmen onlaın formatta áńgimelestik. Jasyna qaramastan, jetkinshekter qoıǵan suraqtardyń mán-mazmuny meni tańqaldyrǵanyn atap ótkim keledi. Biri ǵalymdardyń eńbegi qanshalyqty baǵalanady, ǵylymnyń qaı baǵyttaryn tańdaǵan durys dep surasa, endi biri zamanaýı tehnologııalar balalardyń kúndelikti ómirinde tamyryn tereń jaıyp bara jatqanyna alańdaýly. Sondaı-aq oqýshylardyń oqýǵa degen qyzyǵýshylyǵyn arttyrý boıynsha ıdeıalar da talqylandy, – dep jazdy Aımaǵambetov.
Mınıstr oqýshylarmen kezdesý barysynda osydan bir jyl buryn mektepterde balalar ókildikterin qurý jónindegi sheshim durys bolǵanyna kóz jetkizgenin jazǵan. Ol kitaphanalar jańa formatta jumys istep, balalardyń súıikti ornyna aınalýy týraly aıtqan.
– Kovorkıng ortalyqtarynda jas jetkinshekter bas qosyp, birge kitap oqyp, oqyǵandaryn ózara talqylap, pikirtalasqa túse alady. Sonymen birge kórkem ádebıetti memlekettik tilde oqý máselesine nazarlaryn aýdardym.
Talqylanǵan taǵy bir usynys – balalar men muǵalimderge mekteptegi qarjylyq prosesterge qatysýǵa múmkindik berý. Iаǵnı olar mektep bıýdjetiniń belgili bir bóligin, tipti asa kóp bóligi bolmasa da, mektepti jaqsartý úshin qajet jáne mańyzdy dep sanaıtyn baǵyttarǵa jumsaý boıynsha sheshim qabyldaý rásimine qatystyrý.
Mundaı birlesken sheshimder pedagogter men oqýshylar arasyndaǵy baılanysty nyǵaıtyp, balalardyń oqýǵa degen qyzyǵýshylyǵyn arttyrady dep aıtyldy. Osy sııaqty birneshe mańyzdy bastamalardy talqyladyq. Synyptastarynyń múddelerin qorǵap júrgen mektep oqýshylary búgingi kezdesýden keıin de belsendi ári jańashyl bolyp qala beredi dep senemin, – delingen mınıstr jazbasynda.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir