"Qyzymnyń ómiri úzilmeý úshin kimge bolsyn jalynýǵa barmyn" degen Anna Dýdıchke qyzymen kezdesýge ruhsat etilmegen. Ol qyzyn ózine taǵylǵan aıypty "moıyndaǵan" vıdeodan ǵana kórgen.

 

25 mamyrda Protasevıch pen Sapega ózderine taǵylǵan aıypty moıyndaǵan qysqa vıdeo jarııalanǵan. Ol jerde Protasevıch jappaı tártipsizdik uıymdastyrdy degen aıypty, al Sapega kúsh qurylymynyń jeke derekterin jarııalaǵanyn moıyndaıdy. Biraq Protasevıch pen Sapeganyń jaqyndary bul sózderdi "olarǵa kúshtep aıtqyzǵan" dep sanaıdy. Protasevıchtiń ákesi uly vıdeoda mazasyzdanyp turǵanyn, murnynyń ústi synǵan bolýy múmkin ekenin aıtsa, Sapeganyń anasy "Sofııa vıdeoda kózin aınaldyryp, oınatady. Bul oǵan tán áreket emes. Sofııa belsendi bolmaǵan, Belarýstegi daýly prezıdent saılaýynan keıingi narazylyq aksııalaryna qatyspaǵan. Ol Protasevıchpen baılanysy bolǵany úshin ǵana qamalyp otyr" degen pikirde.

23 mamyrda Ryanair áýejelisiniń ushaǵy  Grekııa astanasy Afınydan Latvııa astanasy Vılnıýske ushyp bara jatyp, "bortta bomba bar" degen sebeppen ıstrebıtelderdiń kómegimen kúshtep Belarýs astanasy Mınskke qondyrylǵan. Ushaq qonysymen, bortta bolǵan 26 jastaǵy jýrnalıst Roman Protasevıch pen súıiktisi Sofııa Sapega qamaýǵa alynǵan.

 

Ushaqty qondyrý týraly buıryqty Belarýs prezıdenti Aleksandr Lýkashenko bergen. Batys elderi Lýkashenkonyń bul áreketin aıyptap, Eýropalyq odaq Belarýstiń áýe kompanııalaryna Eýropa aspanynda ushýǵa tyıym salý týraly sheshim qabyldady. Sondaı-aq aldaǵy ýaqytta EO avıakompanııalaryna Belarýs ústinen ushyp ótpeýdi buıyrdy jáne ekonomıkalyq sanksııalar odan ári jalǵasatynyn aıtty.

Al AQSh prezıdenti Djo Baıden Belarýs bıliginiń áreketin "shekten shyqqan" dep aıyptap, bul "saıası kelispeýshilikke de, baspasóz bostandyǵyna da uıat shabýyl" dep málimdegen.

Aleksandr Lýkashenko "ushaqtaǵy bomba" týraly aqparat HAMAS toby (Gaza Sektoryn baqylap otyrǵan keı memleketter lańkestik top dep tanyǵan uıym) tarapynan Shveısarııadan túskenin aıtady. HAMAS toby muny teristese, Shveısarııa mundaı aqparattyń taraǵanyn anyqtaı almaǵanyn málim etti.

Protasevıch kim?

Protasevıch Nexta medıa-kompanııasynyń, Telegram kanalynyń burynǵy redaktory. Ol 2019 jyly Belarýsten ketip, 2020 jylǵy prezıdent saılaýy barysyn aqparattandyryp otyrǵan. Nexta Belarýstegi prezıdent saılaýy kezinde opposısııanyń daýys berýinde sheshýshi ról atqardy. Oppozısııa Lýkashenko daýys urlady dep sanaıdy. Úkimet jańalyqtardy taratpaı qoıǵannyn keıin bul pikirdegi adamdar kóbeı tústi. Osydan keıin oǵan terrorızm men tártipsizdikti qozdyrý boıynsha aıyp taǵylǵan.

Batys lıderleri oppozısııa basshysy kandıdat Svetlana Tıhanovskaıany qoldaǵan. Saılaýdan keıin Lýkashenkonyń jeńisine narazy ondaǵan myń adam birneshe aı boıǵy alańǵa shyqqan. Narazylyq aksııasyna shyqqandardy jergilikti polısııa uryp-soqqan, azaptaǵan áreketter kóptep bolyp, ondaı jaǵdaılardy Nexta udaıy jarııalap otyrǵan. Bıyldyń ózinde polısııa talapynan jasalǵan aıaýsyz áreketterdiń kóptegen jaǵdaılary tirkelip, 2700-den astam sottaý isteri bolǵan.

Aleksandy Lýkashenko Belarýsti 1994 jyldan beri basqaryp keledi. Ol prezıdent retinde 6 márte qaıta saılanǵan. Onyń saıasatta "Eýropanyń sońǵy dıktatory" degen aty bar.