«Qylmystyq qýdalaýdan bas tartty». Baıbek Mamaıǵa azamattyq talap qoıdy

NurOtan partııasy tóraǵasynyń birinshi orynbasary Baýyrjan Baıbektiń ókili Aıjan Táshenova óziniń Facebook-tegi paraqshasynda belsendi Janbolat Mamaı men onyń jubaıy Inga Imanbaevaǵa qatysty Almaty qalasy Áýezov aýdany №2 aýdandyq sotyna azamattyq tártippen ar-namysty, abyroı men iskerlik bedeldi qorǵaý týraly talap aryz bergeni týraly habarlady.

«Qurmetti dostar! Búgin men Baýyrjan Qydyrǵalıuly Baıbektiń múddesin bildirýshi zańger retinde Janbolat Mamaı men onyń jubaıy Inga Imanbaevaǵa qatysty Almaty qalasy Áýezov aýdany №2 aýdandyq sotyna azamattyq tártippen ar-namysty, abyroı men iskerlik bedeldi qorǵaý týraly talap aryz berdim.

Bul talap aryzdy berýge J.Mamaı men I.Imanbaevanyń bıylǵy 13 sáýirde «Demokratııaly Qazaqstan/Demokratıcheskıı Kazahstan» youtube-arnasynda jáne áleýmettik jelilerde ornalastyrǵan birqatar beınematerıaldary negiz bolyp otyr. Jarııalanǵan materıaldarda jaýapkerler «jýrnalıstik zertteýdi» sebep etip, B.Baıbekti sybaılas jemqorlyqpen jáne qyzmet babyn asyra paıdalandy dep jarııa túrde, úzildi-kesildi jáne dálelsiz aıyptaıdy.

Atalǵan materıaldarǵa jasalǵan taldaý beınerolıkterde jalǵyz aqparat kózi – anonımdik «Uzyn Qulaq» telegram-arnasynyń aqparatyn ǵana negizge alǵan. Bul arna – ósek-aıańdy, dolbardy, tekserilmegen jáne shyndyqqa janaspaıtyn aqparatty taratýmen aınalysatyny málim.

Talapker (B. Baıbek) atyna qarata aıtylǵan aıyptaýlardyń budan bólek shynaıy dáleldemelik bazasy men rastalǵan deregi J.Mamaı men I.Imanbaevanyń beınematerıaldarynda da, tirkelmegen QDP saıtynda da usynylmaǵan.

Bıyl 19 sáýirde, bir aptaǵa jetpeıtin ýaqytta Baýyrjan Baıbek qajetti resmı qujattar men basqa da materıaldardy kórsete otyryp, barlyq aıyptaýlardy jarııa túrde joqqa shyǵardy (https://www.youtube.com/channel/UCi6ACkF-ZbYD4NuyIIMMRqw). Bul rette, J.Mamaı men I.Imanbaevanyń aıtqan sózderiniń jalǵandyǵyn, jalańsózdiligin jáne arsyzdyǵyn eskere otyryp, B.Baıbek óziniń ar-namysyn, abyroıy men bedelin sot arqyly qorǵaý quqyǵyn paıdalaný jóninde sheshim qabyldady.

Sondyqtan azamattyq zańnama aıasynda biz beınematerıaldar avtorlary aıyptaýlarynyń negizsizdigi men maǵynasyzdyǵyn dáleldeýge nıettenip otyrmyz.

Talapkerdiń el aldynda júrgen tulǵa ekendigin, soǵan oraı bul jaǵdaı men aldaǵy prosestiń úlken rezonans týdyratynyn eskerip, sondaı-aq J.Mamaıdyń ár túrli tásildi qoldaný arqyly qoǵamdyq pikirdi burmalaý yqtımaldyǵyn boldyrmaý úshin, men jurtshylyqty sot prosesiniń barysymen jedel jáne obektıvti túrde habardar etip otyratyn bolamyn. Muny eshqandaı saıasatqa aralastyrmaı, iske qatysy joq baǵalaýlarsyz tek quqyqtyq aıada atqaramyn.

Osyǵan oraı talap aryz berýge baılanysty kelesi jaıttarǵa toqtalyp, basyn asha ketý qajet dep esepteımin.

Birinshiden, qoldanystaǵy zańnamaǵa sáıkes elimizdiń kez kelgen azamaty quqyǵy buzylǵan jaǵdaıda ony úsh túrli aıada qorǵaı alady: qylmystyq, ákimshilik jáne azamattyq.

Baýyrjan Baıbek Qazaqstan Respýblıkasynyń Konstıtýsııasyna sáıkes, sondaı-aq óziniń jeke ustanymyna súıenip, jaýapkerlerdi qylmystyq jáne ákimshilik qýdalaýdan bas tartyp, isti azamattyq qaraýmen shektelýdi jón kórdi. Osylaısha, ol jeke tulǵa retinde talap aryzdy ózin negizsiz jáne jarııa túrde aýyr qylmyspen aıyptap otyrǵan basqa jeke tulǵalarǵa qatysty beredi.

Osy oraıda Baýyrjan Baıbektiń aqıqatqa kóz jetkizý, J.Mamaı men I.Imanbaeva taratqan málimetterdiń jalǵandyǵyn dáleldeý, sondaı-aq óziniń bedelin qalpyna keltirý maqsatyn ǵana basshylyqqa ala otyryp, keltirilgen moraldyq zalalǵa materıaldyq ótemaqy óndirip alýdan da bas tartyp otyrǵanyn erekshe atap ótkim keledi.

Ekinshiden, Azamattyq zańnamanyń ereksheligi mynada. Jaýapkerler J.Mamaı men I.Imanbaeva jarııa túrde B.Baıbekti júıeli túrde sybaılas jemqorlyqqa bardy, sondaı-aq memlekettik qyzmette júrgen kezeńde qyzmet babyn asyra paıdalandy degen aıyptaýynda súıengen aıǵaqtary men qujattaryn usynýy tıis. Iаǵnı, aıyptaǵan tarap muny naqty faktilermen dáleldeýi qajet.

Sonymen qatar Baýyrjan Baıbek jaýapkerlerdiń ótirik aıyptaýlaryn teriske shyǵaratyn barlyq qajetti qujattar men faktilerdi sotqa usyný boıynsha óz quqyǵyn paıdalanady. Bul – ákimdiktiń 20-dan astam qaýlysy, sonymen qatar basqa da qujattarmen rastalǵan málimetter.

Úshinshiden, jaýapkerler taratqan jalǵan, B.Baıbektiń bedeline nuqsan keltiretin rolıkter negizinde talapker «Almaty qalasynyń ákimi laýazymynda bolǵan 4 jyl ishinde jeke bıznes-ımperııasyn qura otyryp, zańsyz 1 mıllıard AQSh dollaryn tapty. Qazaqfılmniń, Atakenttiń jáne Ile-Alataý ulttyq parkiniń jerlerin qurylys salýǵa jáne turaq jasaýǵa jeke tulǵalarǵa berdi. Avtobýstar satyp alýda para aldy. Kómir mafııasyn «qanatynyń astyna alyp», Almatydaǵy TES-2-ni gazǵa kóshirýge tosqaýyl qoıdy» dep jalǵan aıyptaýǵa barǵan. Iаǵnı maǵan senim bildirgen tulǵanyń eń aldymen Almaty ákimi laýazymynda sharýashylyq-bólý fýnksııalaryn oryndaǵan kezdegi qyzmeti qozǵalady.

Endi munyń barlyǵyn jaýapkerler bos málimdemelermen emes, naqty faktiler men qujattar negizinde dáleldeýi tıis.

Sondyqtan da bizdiń talap aryzymyzǵa, eń aldymen, J.Mamaı men onyń jubaıynyń talapkerdiń ońtústik megapolıstiń basshysy retindegi jumys kezeńine qatysty aıyptaýlaryn teriske shyǵarý talaby qoıyldy.

Sondaı-aq talap aryzǵa táýelsiz psıhologııalyq-fılologııalyq saraptama qosa berildi. Ol J.Mamaı men I.Imanbaevanyń aıtqan sózderi – B.Baıbektiń qyzmeti týraly jarııa túrde aıtylǵan jaǵymsyz aqparat ekendigin, olar shyndyqqa janaspaǵan jaǵdaıda, talapkerdiń ar-namysyna, abyroıy men bedeline nuqsan keltiretin aıyptaýlar qataryna jatatynyn rastaıdy.

Tórtinshiden, J.Mamaı men I.Imanbaevanyń óz beınematerıaldarynda úshinshi tulǵalardyń da múddelerin qozǵaıdy, olardy ár túrli qylmystarmen jalań aıyptaıdy.

Mysaly, B.Baıbektiń 100-den astam jeke kompanııanyń qatysýymen «úlken bıznes-ımperııanyń ıesi» dep negizsiz málimdengen. Munymen qosa, úkimettik emes áleýmettik baǵdardaǵy uıymdarǵa qosalqy quryltaıshylyǵy jeke bızneske jatqyzylǵan.

Áıtse de bul maǵan senim bildirgen tulǵaǵa tikeleı qatysy bolmaǵandyqtan, bizdiń talap aryzymyzda jaýapkerlerdiń úshinshi tulǵalarǵa qatysty sózderi qozǵalmaıdy. Alaıda J.Mamaı men onyń jubaıynyń rolıkterinde negizsiz aıyptaýǵa ushyrap otyrǵan olar osy faktiler boıynsha sotqa talap aryzben júginýi múmkin.

J.Mamaı men I.Imanbaevanyń B.Baıbekke tańyp otyrǵan quqyq qorǵaý organdaryna, sotqa jáne Ortalyq saılaý komıssııasyna yqpal etetin erekshe múmkindigi jónindegi bos dolbarlary men kópe-kórneý ótirigi de talap aryzǵa qosylmaǵandyǵyn erekshe atap ótkim keledi. О́ıtkeni bular zańnama deńgeıinde joqqa shyǵarylǵan basy ashyq aqıqat.

Besinshiden, J.Mamaı men I.Imanbaevaǵa qatysty talap aryzdy sot qanaǵattandyrǵan jaǵdaıda, atalǵan azamattar B.Baıbektiń ar-namysy men abyroıyna nuqsan keltiretin materıaldardy joıýy, sondaı-aq tıisti áleýmettik jelilerde jáne YouTube-arnada barlyq negizsiz, shyndyqqa janaspaıtyn aıyptaýlaryn joqqa shyǵarýy tıis.

Ispen muqııat tanysyp, materıaldardy jan-jaqty zerttegennen keıin, men, kásibı zańger jáne azamat retinde maǵan senim bildirýshi Baýyrjan Baıbektiń negizsiz aıyptaýlar men kemsitýge jol bermeý týraly ustanymyn tolyq qoldaımyn.

Adam men azamattyń ary men abyroıy – irgeli quqyqtar, oǵan Konstıtýsııada árbir azamatqa qyzmetine nemese qoǵamdyq mártebesine qaramastan kepildik berilgen. О́kinishke qaraı, Qazaqstanda osynaý qundylyqtardy qorǵaý boıynsha quqyqtyq mádenıet áli de damı qoımaǵan. Kórip otyrǵanymyzdaı, ol Ekonomıkalyq yntymaqtastyq jáne damý uıymynyń barlyq elderinde (AQSh, Fransııa, Germanııa, Ulybrıtanııa jáne basqalary) keńinen taralǵan.

Sot – bul zań ústemdik quratyn, sottyń teń quqyqty eki taraptyń ashyq tartysy barysynda aqıqatqa jetýine múmkindik beretin naqty dálelder men dáıekterdi keltiretin oryn ekendigin atap ótkim keledi. Sotta jalań saıasat soǵý men dolbarǵa oryn joq, tek tekserilgen faktiler ǵana esepke alynady.

Quqyq ústemdigi – biz quryp jatqan kez kelgen damyǵan demokratııalyq quqyqtyq memlekettiń negizi. Kórip otyrǵanymyzdaı, J.Mamaı da osyny jıi tilge tıek etedi.

Sondyqtan J.Mamaı myrza men I.Imanbaeva hanymdy Qazaqstan Respýblıkasynyń zańdy quqyqtary men mindetteri bar azamattary retinde sot prosesin saıasılandyrýdan bas tartyp, onyń ashyq ta konstrýktıvti aıada ótýine qoldaý kórsetýge jáne aıtylǵan aıyptaýlarǵa zańǵa sáıkes dáleldemeler usynýǵa shaqyramyn.

Sonymen birge BAQ ókilderine, Feısbýk pen basqa da áleýmettik jeliler aýdıtorııasyna ótinish bildiremin.

«Jańa medıanyń» qaı-qaısymyzdyń da ómirimizge yqpalyn eskersek, jeke basty, otbasyn, balalar men jaqyndardyń quqyqtary men múddelerin qozǵaıtyn jáne qorlaıtyn ósek-aıańdar elimizdiń árbir azamatyna, árqaısymyzǵa qatysty da aıtylýy múmkin.

О́ziniń áleýmettik mártebesi men jaǵdaıyna, saıası kózqarasy men dúnıetanymyna qaramastan, barlyq azamat zańnama negizinde óz ar-namysyn sotta qorǵaı alatynyna senimdi bolýy tıis!

Osy iske qyzyǵýshylyq tanytqan árbir azamattyń bizdiń ustanymymyzdyń durystyǵyna óz betinshe kóz jetkizýine múmkindik beretin sotqa talap aryz ben psıhologııalyq-fılologııalyq saraptamany qosa berip otyrmyn», - dep jazdy zańger.