2021 jyly 1 mln adam zeınetaqy jınaqtaryn paıdalana alady

Bıyldan bastap elimizdegi 1 mıllıonǵa jýyq adam zeınetaqy qoryndaǵy jınaqtaryn paıdalana alady, dep habarlady «Habar 24».

Bul rette «Otbasy bank» biryńǵaı operator qyzmetin atqarady. Qarajatty paıdalaný úshin zeınetaqy qorynyń salymshylary eń aldymen óz jınaǵy týraly málimetti bilýige tıis. Ony elektrondyq úkimet portaly nemese mobıldik qosymshalar arqyly anyqtaýǵa bolady. Osy bastama aıasynda Biryńǵaı jınaqtaýshy zeınetaqy qory 2,4 trln teńgeni turǵyn úı alý, emdelý jáne kapıtaldy basqarý kompanııalaryna berýdi josparlap otyr.

Aıta keterligi, sırek kezdesetin aýrýlardan emdelý, dıagnostıkadan ótý, stomatologııalyq emge de qarjyńyzdy ala alasyz. Onkologııalyq aýrýdan emdelý kerek bolsa, onda da arnaıy terapııalarǵa qarjy bólinedi. Sonymen qatar zeınetke shyqqan adamdar da shekti somadan asqan qarjyǵa qol jetkize alady. Mundaı azamattar sany el boıynsha 170 myńǵa jýyqtaıdy. Eń bastysy, zeınetaqy qoryndaǵy esepshotta shekti soma qalýy shart. Shekti soma ár jastaǵy adam úshin ártúrli. Sondaı-aq jınaqtyń bir bóligin alǵanda bıýdjetke tabys salyǵy tólenýge tıis.

Lázzat Ibragımova «Qazaqstannyń turǵyn úı qurylys jınaq banki «Otbasy bank» AQ basqarma tóraǵasy:

- Páter alǵanda ekinshi naryqtan alýǵa bolady. Zastroıshıkten de. Ekinshi suraqqa kelgende týystaryna ótinish jazyp, olardyń jınaqtaryn alýǵa ruqsat bolady. Sosyn qujattardy jiberý kerek. Biz ony tekseremiz.

О́tinishti arnaıy onlaın platformada elektrondy negizde qaldyrýǵa bolady. Ol úshin elektrondy sıfrlyq qoltańba qajet. «Otbasy bankinde» arnaıy jańa esepshot ashylady. Resmı resýrsta qarjyny qoldaný maqsaty tańdalyp, tıisti qujattar júkteledi. 45 kúnniń ishinde salymshyǵa jaýap keledi.