"Meniń basty nazarymda". Nazarbaev jastarǵa úndeý jasady

«Nur Otan» partııasynyń tóraǵasy Nursultan Nazarbaev partııanyń jastar fraksııasy – "Jas Otan"-nyń 20 jyldyq mereıtoıymen jáne kele jatqan Táýelsizdik kúni merekesimen quttyqtady.

Nazarbaev táýelsizdik jyldary qol jetkizgen negizgi jetistikterge toqtalyp, osy jolda úlken jumys atqarylǵanyn atap ótti.

– Men búgingi tańda kúlli qazaqstandyqtar maqtan tutatyn tabystarymyzǵa jetý qanshalyqty qıyn bolǵanyn jaqsy bilemin. О́skeleń urpaq qolda bardy qadirleýge, Otanymyzdyń ári qaraı órkendeýin oılastyrýǵa, óz elin maqtanysh etýge tıis. Jastar múddesi árdaıym meniń basty nazarymda, – dedi "Nur Otan" partııasynyń tóraǵasy.

Tuńǵysh prezıdent egemendik jyldary elimizde naqty ári tıimdi áleýmettik lıftter qurylǵanyn aıtty.

– Meniń bastamammen el úshin eń kúrdeli kezeńde iske qosylǵan «Bolashaq» baǵdarlamasymen 15 myńǵa jýyq jas qazaqstandyq bilim aldy. Bes jyl buryn Nazarbaev Ýnıversıteti stýdentteriniń alǵashqy legi túlep ushty. Osy jyldardyń ishinde oqý ornynda bes myńǵa jýyq maman daıarlandy. Memleket iske qosqan áleýmettik lıftterdiń arqasynda myńdaǵan jas qazaqstandyq tabysqa jetti, – dedi Nursultan Nazarbaev.

«Nur Otan» partııasynyń tóraǵasy partııanyń jastar qanatynyń múshelerine pandemııa kezindegi qaıyrymdylyq sharalaryna jáne volonterlik qyzmetke belsene atsalysqany úshin zor rızashylyǵyn bildirdi.

Sondaı-aq ol jastar belsendiligi árdaıym saıası progrestiń qozǵaýshy kúshteriniń biri bolǵanyna nazar aýdardy.

– Qazirgi kezde jigerli ári bastamashyl bolýdyń mańyzy erekshe. О́ıtkeni biz tez ózgerip jatqan álemde ómir súrip otyrmyz. Kópshilikke tanys ómir salty artta qalǵany sózsiz. Tehnologııalar múmkindikterimizdiń áleýetin aıtarlyqtaı arttyrýda, – dedi Nursultan Nazarbaev.

Elbasy eldi damytý jáne Qazaqstannyń táýelsizdigin nyǵaıtý isine jastardyń belsene atsalysýynyń mańyzyn atap ótti.

– El erteńi men ult taǵdyry jastarǵa tikeleı baılanysty. Qazirgi urpaq zaman talabyna saı damyp otyrýy kerek. Búgin aıtylǵandardyń bárin meniń ósıetim dep túsinińder, – dedi Qazaqstannyń tuńǵysh prezıdenti.