Qys mezgili bastalysymen etikshilerdiń jumysy qyza túsip, kásibi órge domalaıdy. Etikshilerdiń halyqaralyq kúninde QazUÝ qalashyǵy mańynda osy kásipten nápaqasyn taýyp júrgen sheber – 67 jastaǵy zeınetker Gúlbahram Tursynbaıqyzy týraly áńgimelemekpiz.

"ETIKShI BOLÝYMA ÁKEM SEBEPKER BOLDY..."

Gúlbahram Tursynbaıqyzy О́zbekstanda týǵan. Mektepti támamdaǵan soń Qazaqstanǵa kelip, sodan beri atamekeninen alystamaǵan. Túrli jaǵdaıǵa baılanysty joǵary oqý ornynda oqymaǵan. Esesine sharýaǵa erte aralasyp, 17 jasynan qolyna biz ustaǵan. Onysy úshin ákesine qaryzdar. Ákesi de etikshi edi.

– Etik tigý – otbasymyzdyń negizgi kásibi. Meni bul iske alǵash ákem baýlyǵan. 10-synyptan bastap ákeme kómektesip júrdim. Keıin ózimniń de qyzyǵýshylyǵym oıandy. Árıne, basynda qıyndyqtar boldy. Biraq men olardy eńserip, birtindep etik tigýdiń qyr-syryn meńgerdim. Jumysym ózime qatty unaıdy, – deıdi ol.

Etikshiniń shaǵyn sheberhanasy QazUÝ qalashyǵy mańynda ornalasqan. Osy jerde eńbek etip kele jetqanyna 43 jyl bolady. Kúnine orta eseppen 7-10 shaqty adamǵa qyzmet kórsetedi.

– Zeınette bolsam da úıde tynysh otyra almaımyn. Zerigip ketem. Men úshin sheberhanaǵa kelip, súıikti ispen shuǵyldanýdyń ózi bir baqyt. Aıaq-kıimmen qatar sómke de tigemiz, kilt te jasaımyz, – deıdi sheber.

Etikshiniń úsh qyzy bar. Kúıeýimen joldary ekige aıyrylǵan. Búginde bir qyzymen turady.

 

"AIYNA ShAMAMEN 300 MYŃDAI ShYǴARAMYZ"

Dál qazirgi sátte etikshilerdiń jumysy qaýyrt. Etikshiler jumysynda "sezon" kúzde bastalyp, kóktemge deıin jalǵasady. Kún jyly kezderde jumys saıabyrsıdy. Ondaı kezde sheber nemerelerine qarap, úıde otyrady. Al sharýanyń qyzǵan shaǵynda aıyna 300 myń teńgege deıin tabatyn kezder bolady.

– Kúz ben qys mezgili bastalysymen jumys qyzyp, kásibime oralamyn. Jaz mezgilinde bul isten paıda joq. Biren-saran adam kelmese, bylaısha tabyssyz qalamyz. Biraq qazir burynǵydaı qaptaǵan klıent joq. Sheberhanamyz ýnıversıtetke, jataqhanaǵa jaqyn ornalasqandyqtan klıentterdiń basym kópshiligi stýdentter. Qazir olar úılerinen oqyp jatyr. Sondyqtan etigin tiktirýge negizinen osy mańdaǵy turǵyndar keledi. Olar kóp emes qoı. sol sebepti búgingi jaǵdaıda jumys turalap tur. Jumysymyzǵa kóp te suramaımyz. Qatyp qalǵan baǵa joq. Bir aıaq-kıimdi 500-den bastap 2500-3000 teńgege deıin tigemin. Kelgen klıenttiń jaǵdaıyna qaraı jeńildik jasaıtyn kezder de bolady. Tipti tegin tigip bergen jaǵdaılar da kezdesken. Kóbine stýdentter keletindikten arzanǵa tiktirgisi keledi. Osynsha jyldan beri istep jatqandyqtan, biz ony jaqsy bilemiz. Bizge klıentterdiń rıza bolyp ketkeni, shyn yqylaspen alǵys aıtqany mańyzdyraq. Sonda kelýshiler de úzilmeıdi. Jumys toqtamaǵan kezderi aıyna shamamen 300 myńdaı (teńge –  red) shyǵaramyz, –  dedi zeınetker.

AIаQ-KIIMDI QALAI TAŃDAǴAN DURYS?

Sheber aıaq-kıim satyp alǵanda onyń tartymdylyǵyna ǵana emes, sapasyna da kóńil bólý kerektigin aıtty. Onyń sózinshe, qymbatyraq bolsa da bylǵarydan jasalǵan aıaq-kıim alǵan durys. Ondaı aıaq-kıimderdi birneshe jyl kııýge bolady. Onyń ústine bylǵary etikti jóndeý de jeńilirek bolatyn kórinedi.

– Kóp adamdar etik satyp alǵannan keıin kımeı turyp, aınaldyryp tiktirip alyp jatady. Negizi bulaı jasaýdyń qajeti joq. Ony kıip, tozyǵy jetkennen keıin jóndegen jón, – dep keńes berýdi de umytpady sheber. 

Etikshi karantınge baılanysty keı áriptesteri baǵasyn eki esege qymbattatyp jatqanyn durys emes dep sanaıtynyn jetkizdi. "Onsyz da jaǵdaıy aýyr halyqtyńodan beter qınaı bergen durys emes qoı" degen ol karantın ózderin de kádimgideı qysqanyn aıtyp, sonda da bul tyǵyryqtan uzamaı shyǵatynyna senim bildirdi.

– Eshteńe joq, shydaımyz. Qazir kimge ońaı? Bul kúnder de artta qalar, –  deıdi zeınetker etikshi.

Nursulý Temirhanqyzy

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi
Ilmek sózder: Etikshi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir