12 Qarasha, 2020 Ekonomıka
Kórneki sýret
Karantın sharalary saldarynan bıznesi turalap qalǵan kásipkerlerge salyqtyń 2 túri birden 3%-ǵa deıin 2 jylǵa tómendetildi. Endi korporatıvter úshin 10-20% jáne jeke tabys salyǵy boıynsha 10% ornyna kompanııalar men jeke kásipkerler 3% ǵana balama bólshek salyǵyn tóleýi kerek bolady.
Sonymen qatar, pandemııa saldarynan shyǵynǵa ushyraǵan kompanııalar qosymsha qun salyǵynan jáne áleýmettik salyqtan bosatylady. Bul ózgerister aqsha aınalymynyń kólemine qaramastan barlyq kásipkerlerge ortaq bolady.
– Pandemııa kezinde erekshe zardap shekken sektorlarǵa qoldaý úshin shaǵyn jáne orta bızneske 2 jylǵa arnaıy salyq rejımin – bólshek salyq rejımin qoldaný usynylady, onyń mólsheri tabystyń 3% quraıdy. Bul salyq aýyrtpalyǵyn azaıtyp, prosedýralardy jeńildetedi, – dedi senat spıkeri Máýlen Áshimbaev.
Senat depýtattary birneshe márte shaǵyn jáne orta bızneske qoldaýdy arnaıy salyq rejımderin qurý túrinde de, salyqtyq ákimshilendirýdi jeńildetý turǵysynan da uıymdastyrý qajettiligi týraly talqylady.
– Shaǵyn jáne orta bıznes qıyn kezeńderdi bastan ótkerýde, olar pandemııanyń aýyrtpalyǵyn óz moınyna alyp otyr, – dedi senator.
Senat shaǵyn jáne orta bızneske qoldaý kórsetý maqsatynda Salyq kodeksine ózge de túzetýlerdi engizdi. Depýtattar shekteýlerdiń saldarynan tabysynan aırylǵan kásipkerlerdiń qaıta qalypqa kelýi úshin birneshe aı qajet bolady degen pikirge keldi.
Sondyqtan senat depýtattary salyq júktemesin azaıtyp qana qoımaı, bızneske memleket tarapynan basqa da qoldaý kórsetýdi qajet dep sanaıdy. Al eń kóp shyǵynǵa ushyraǵan ekonomıkalyq sektorlardyń tizimin úkimet aıqyndaıtyn boldy.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir