Almatyda ál-Farabı atyndaǵy Qazaq ulttyq ýnıversıtetinde QR Memlekettik hatshysy, Ábý Nasyr ál-Farabıdiń 1150 jyldyǵyn daıyndaý jáne ótkizý jónindegi memlekettik komıssııanyń tóraǵasy Qyrymbek Kósherbaevtyń qatysýymen birneshe is-shara ótti.

Sharaǵa bilim jáne ǵylym mınıstri Ashat Aımaǵambetov, mádenıet jáne sport mınıstri Aqtoty Raıymqulova, QazUÝ rektory Ǵalym Mutanov, akademııalyq qoǵamdastyq pen BAQ ókilderi, ýnıversıtet oqytýshylary men stýdentteri qatysty.

Kezdesý aıasynda álemde tuńǵysh ret jaryq kórgen «Ál-Farabı» ensıklopedııasynyń tusaýkeseri ótti. Ensıklopedııanyń mazmuny tarıhı derekter, málimetter, geografııalyq nysandar, ómirbaıandyq málimetter, oıshyldyń ómir joly men ǵylymı muralaryn (traktattary men olarǵa túsindirmeler), uǵymdar men termınder, arab-musylman Renessans kezeńindegi belgili ǵalymdardyń eńbekterin qamtıdy.

Onda zamanaýı zertteýshiler men qazaqstandyq farabıtanýshylar, sondaı-aq, ıslam fılosofııasy, din, mádenıet, ǵylym jáne bilim máselelerimen aınalysatyn barsha ǵalymdar týraly bıblıografııalyq málimetter keltirilgen.

«Bul - qazaq tilindegi biregeı ensıklopedııa. Munda ǵylymı ózekti materıaldar, bıyl josparlanǵan sharalar, búgingi sharaǵa qatysty materıaldar toptastyrylǵan. Ensıklopedııa adamnyń bilim kókjıegin keńeıtedi. Bul eńbek odan ary da tolyqtyryla beredi. Birinshi kezekte jastarymyzdyń gýmanızm qaǵıdattaryna negizdelgen Farabı murasyn jete túsingeni kerek. Jastarǵa qoljetimdi bolýy úshin biz bul eńbekterdi orys jáne aǵylshyn tilderine aýdarmaqpyz», - dedi ál-Farabı ortalyǵynyń dırektory Bekjan Meıirbaev.

Dóńgelek ústel barysynda Qyrymbek Kósherbaev qazaqstandyq farabıtanýshylarǵa pandemııaǵa qaramastan sińirgen eńbegi úshin alǵysyn aıtty.



Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir